ନୂଆଦିଲ୍ଲୀ ୨୮/୧୦: ଫୁଟବଲ ଜଗତର ସୁପରଷ୍ଟାର କ୍ରିଷ୍ଟିଆନୋ ରୋନାଲ୍ଡୋଙ୍କର ସାରା ବିଶ୍ୱରେ ଅଗଣିତ ପ୍ରଶଂସକ ଅଛନ୍ତି । ତେବେ ଚୀନ୍ର ୨୪ ବର୍ଷୀୟ ଗୋଙ୍ଗଙ୍କର କଥା ଟିକେ ନିଆରା । ନିଜର ପ୍ରିୟ ଖେଳାଳିଙ୍କୁ ଭେଟିବା ଲାଗି ସେ ସାଇକେଲରେ ୧୩ ହଜାର କିମି ଯାତ୍ରା କରି ନିକଟରେ ଚୀନ୍ରୁ ସାଉଦି ଆରବ ପହଞ୍ଚିଥିଲେ । ଏଥିପାଇଁ ତାଙ୍କୁ ୭ ମାସ ସମୟ ଲାଗିଥିଲା ।
ମାର୍ଚ୍ଚ ୧୮ରେ ପୂର୍ବ ଚୀନ୍ର ଆଙ୍ଗୁଇ ପ୍ରଦେଶସ୍ଥିତ ନିଜ ଘରୁ ଯାତ୍ରାରମ୍ଭ କରିଥିଲେ ଗୋଙ୍ଗ୍ । ପରବର୍ତ୍ତୀ ସମୟରେ ସେ ସିନ୍ଜିଆଙ୍ଗ ପ୍ରଦେଶ ଦେଇ କାଜାଖସ୍ତାନରେ ପ୍ରବେଶ କରିଥିଲେ । ଏହାପରେ ଜର୍ଜିଆ, ଇରାନ୍, କାତାର ଭଳି ଅନ୍ୟ ୬ ଦେଶ ଦେଇ ରୋନାଲ୍ଡୋ ରହୁଥିବା ସାଉଦି ଆରବର ରାଜଧାନୀ ରିୟାଦ୍ରେ ପହଞ୍ଚିଥିଲେ । ଚଳିତମାସ ୨୦ ତାରିଖରେ ଅଲ୍ ନାସର ଫୁଟବଲ୍ କ୍ଲବ୍ ସାମ୍ନାରେ ସେ ତାଙ୍କ ହିରୋଙ୍କୁ ଭେଟିଥିଲେ ।
ଗତ ଫେବ୍ରୁଆରୀ ମାସରେ ଆଘାତ ଯୋଗୁ ରୋନାଲ୍ଡୋ ଚୀନ୍ ଗସ୍ତକୁ ବାତିଲ କରିବା ପରେ ଗୋଙ୍ଗଙ୍କ ମନରେ ସାଇକେଲ୍ ଚଳାଇ ନିଜର ପ୍ରିୟ ତାରକାଙ୍କୁ ଭେଟିବାର ଚିନ୍ତାଧାରା ଆସିଥିଲା । ଏଥିଲାଗି ପ୍ରସ୍ତୁତି ସ୍ୱରୂପ ସେ ସାଇକେଲ୍ରେ ଏକ ତମ୍ବୁ, ରୋଷେଇବାସ ସାମଗ୍ରୀ, ପୋଷାକ ଓ ଅନ୍ୟ କିଛି ଜରୁରି ଉପକରଣ ଲଦିଥିଲେ । ଗୋଙ୍ଗଙ୍କ ସାଇକେଲରେ ତାଙ୍କର ମିସନ୍ ସଂପର୍କରେ ଏକ କାର୍ଡବୋର୍ଡରେ ବି ଲେଖାଯାଇଛି । ଖାଦ୍ୟ ସାମଗ୍ରୀ ମହଙ୍ଗା ଥିବା କିଛି ଦେଶରେ ସେ ପାଉଁରୁଟି ଖାଇଥିଲେ । ସ୍ଥାନୀୟ ଲୋକଙ୍କ ସହିତ ଭାବ ବିନିମୟ ଲାଗି ଟ୍ରାନ୍ସଲେସନ୍ ସଫ୍ଟୱେର ବ୍ୟବହାର କରିଥିଲେ ।
ଅଗଷ୍ଟ ମାସରେ ଆର୍ମେନିଆରେ ଭୀଷଣ ଜ୍ୱର ଯୋଗୁ ସେ ରାସ୍ତା କଡ଼ରେ ବେହୋସ ହୋଇଯାଇଥିଲେ । ତେବେ ସ୍ଥାନୀୟ ଲୋକେ ତାଙ୍କୁ ଉଠାଇ ହସ୍ପିଟାଲରେ ଭର୍ତ୍ତି କରିଥିଲେ । ସେଠାରେ ତାଙ୍କୁ ମାଗଣା ଚିକିତ୍ସା କରାଯାଇଥିଲା । ଗୋଙ୍ଗଙ୍କ ଅନୁସାରେ, ଏହି ଯାତ୍ରା ମଧ୍ୟରେ ସେ ଅନେକ ନୂଆ ବନ୍ଧୁ ସୃଷ୍ଟି କରିଛନ୍ତି । ଏହା ତାଙ୍କୁ ଅଧିକ ଧୈର୍ଯ୍ୟବାନ ଓ ପରିପକ୍ୱ କରିଛି । ଅକ୍ଟୋବର ୧୦ରେ ସାଉଦି ଆରବରେ ସେ ପହଞ୍ଚିବାବେଳକୁ ରୋନାଲ୍ଡୋ ଏକ ମ୍ୟାଚ୍ ଲାଗି ୟୁରୋପରେ ଥିଲେ । କିନ୍ତୁ ଅଲ୍ ନାସର ଫୁଟବଲ କ୍ଲବ୍ର ଜଣେ କର୍ମଚାରୀ ନିଜର ହିରୋଙ୍କ ସହିତ ଏକ ମିନିଟ୍ର ସାକ୍ଷାତ ଲାଗି ବ୍ୟବସ୍ଥା କରିବାକୁ ତାଙ୍କୁ ପ୍ରତିଶ୍ରୁତି ଦେଇଥିଲେ ।
ଅକ୍ଟୋବର ୧୯ ତାରିଖରେ ଚୀନ୍ରୁ ଆସିଥିବା ରୋନାଲ୍ଡୋଙ୍କର ଆଉ ଜଣେ ପ୍ରଶଂସକ ଗୋଙ୍ଗଙ୍କୁ ଅଲ୍ ନାସର ଓ ଅଲ ଶବାବ୍ କ୍ଲବ୍ ମଧ୍ୟରେ ଅନୁଷ୍ଠିତ ଏକ ମ୍ୟାଚ୍ ଦେଖିବାର ସୁଯୋଗ ଦେଇଥିଲେ । ସେହି ମ୍ୟାଚ୍ରେ ରୋନାଲ୍ଡୋ ଖେଳୁଥିବାବେଳେ ଗୋଙ୍ଗ ପ୍ରଥମ ଥର ଲାଗି ନିଜ ହିରୋଙ୍କୁ ବାସ୍ତବରେ ଦେଖିଲେ । ପରେ ତାଙ୍କ ସହ ଏକ ମିନିଟ୍ ସାକ୍ଷାତର ଅବକାଶ ତାଙ୍କୁ ମିଳିଲା । ସ୍ୱପ୍ନ ଭଳି ଲାଗୁଥିବା ସେହି ଏକ ମିନିଟ୍ ସମୟ ମଧ୍ୟରେ ରୋନାଲ୍ଡୋ ତାଙ୍କ ସହିତ ହାତ ମିଳାଇଥିଲେ, ଆଲିଙ୍ଗନ କରିଥିଲେ । ତାଙ୍କୁ ଅଟୋଗ୍ରାଫ୍ ବି ଦେଇଥିଲେ। ରୋନାଲ୍ଡୋଙ୍କୁ ଭେଟିବାର ସେହି ଆବେଗମୟ ମୁହୂର୍ତ୍ତକୁ ଗୋଙ୍ଗ ତାଙ୍କ ସୋସିଆଲ୍ ମିଡିଆ ପ୍ଲାଟ୍ଫର୍ମରେ ଶେୟାର କରିଛନ୍ତି । ଆଗକୁ ରୋନାଲ୍ଡୋଙ୍କର ହୋମ୍ଟାଉନ୍ ପର୍ତ୍ତୁଗାଲ୍ ଗସ୍ତରେ ଯିବା ତାଙ୍କର ଲକ୍ଷ୍ୟ ବୋଲି ସେ ପ୍ରକାଶ କରିଛନ୍ତି ।
