ନୂଆଦିଲ୍ଲୀ,୧୧।୧: ଚୀନ୍ର ଶିନାଜିୟାଙ୍ଗ ପ୍ରଦେଶରେ ଚୀନ୍ ସରକାର ଉଇଗର ମୁସଲମାନଙ୍କ ଉପରେ ଲଗାତାର ଅତ୍ୟାଚାର କରୁଛି। ନିକଟରେ ଜଣେ ମହିଳାଙ୍କୁ ନିଜର ଓ ପଡୋଶୀ ପିଲାଙ୍କୁ ଇସଲାମ ତାଲିମ ଦେବା ନେଇ ମିଳିଛି ଜେଲ୍ ଦଣ୍ଡ। ମହିଳା ଜଣଙ୍କୁ ୧୭ ବର୍ଷର କଠୋର କାରଦଣ୍ଡ ଶୁଣାଯାଇଛି। ଚୀନ୍ ଅଧିକାରୀଙ୍କ କହିବା ଅନୁସାରେ, ବେଆଇନ ଭୂମିଗତ ଧାର୍ମିକ ଗତିବିଧି ଥିଲା, ଯାହାକୁ ରୋକିବା ଜରୁରୀ ଥିଲା। ଚୀନ୍ ସରକାର ମହିଳାଙ୍କୁ ସଜା ଦେବାରେ ଅଟକି ନଥିଲେ। ସେଠାରେ ପଢୁଥିବା ପିଲାଙ୍କୁ ଜେଲ୍ ସଜା ଶୁଣାଇଛନ୍ତି।
ଏଏନ୍ଆଇର ରିପୋର୍ଟ ଅନୁସାରେ, ଶିନାଜିୟାଙ୍ଗର କୋନାଶେହର କାଉଣ୍ଟିର ଉଇଗୁର ମହିଳା ସୋଲିହାନ୍ ରୋଜି ନିଜ ପୁଅ ଓ ଜଣେ ପଡୋଶୀର ପୁଅକୁ ଇସଲାମ ତାଲିମ ଦେଉଥିଲେ। ଏହି ସମୟରେ ତାଙ୍କୁ ଚୀନ୍ ଅଧିକାରୀ ଧରି ନେଇଥିଲେ। ଏବେ ଏହି ମାମଲାରେ ସଜା ଶୁଣାଣି କୋର୍ଟ ରୋଜିଙ୍କୁ ୧୭ ବର୍ଷର ସଜା ଦେଇଛନ୍ତି। ରୋଜିଙ୍କ ଗୋଟିଏ ପୁଅକୁ ୧୦ ବର୍ଷର ସଜା ମିଳିଛି, ସେଭଳି ଦ୍ବିତୀୟ ପୁଅକୁ ୭ ବର୍ଷର ଜେଲ୍ ସଜା ମିଳିଛି। ପୁଅ ସହ ପଢୁଥିବା ପଡୋଶର ୟାକୁପ୍ ହିଦାୟତକୁ ମଧ୍ୟ କୋର୍ଟ ୯ ବର୍ଷର ସଜା ଶୁଣାଇଛନ୍ତି।
ରେଡିଓ ଫ୍ରି ଏସିଆର ସୂଚନା ଅନୁସାରେ, ରୋଜିଭ୍କୁ ଧାର୍ମିକ ଶିକ୍ଷା ଦେବା ଅଭିଯୋଗରେ ଦୋଷୀ ସାବ୍ୟସ୍ତ କରାଯାଇଛି। ଏହି ମାମଲାକୁ ସମ୍ଭାଳୁଥିବା ପୋଲିସ ଅଧିକାରୀଙ୍କ କହିବା ଅନୁସାରେ,ଚୀନ୍ରେ ଧାର୍ମିକ ଶିକ୍ଷାକୁ ଏଭଳି ଭାବରେ ଦେବା ବିରୋଧରେ କଡା ନିୟମ ରହିଛି। ତାଙ୍କର ଏଭଳି ଶିକ୍ଷା ପ୍ରଣାଳୀକୁ ବେଆଇନ୍ ବୋଲି କୁହାଯାଉଛି। ସେ ଏହି ନିୟମକୁ ଉଲଂଘନ କରିଛନ୍ତି। ଏହି କାରଣରୁ ତାଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
