ନୂଆଦିଲ୍ଲୀ ୨୨/୦୮: ଅପରେସନ୍ ସିନ୍ଦୂରରେ ପାକିସ୍ତାନର ୫ ଫାଇଟର୍ ଜେଟ୍କୁ ଖସାଇଥିଲା ଭାରତ । ଏହି ସମୟରେ ମିସାଇଲ ଡିଫେନ୍ସ ସିଷ୍ଟମ୍ ଏସ୍-୪୦୦ର ଲଞ୍ଚର୍ ଦାୟିତ୍ୱରେ ଥିଲେ ଚୁରୁର ଯବାନ ଭଲେ ସିଂହ । ଭାରତୀୟ ବାୟୁସେନାରେ ସାର୍ଜେଣ୍ଟ୍ ପଦରେ ଅବସ୍ଥାପିତ ଭଲେ ସିଂହଙ୍କୁ ରାଷ୍ଟ୍ରପତିଙ୍କ ଦ୍ୱାରା ବୀରତା ପଦକ ପୁରସ୍କାର ଦ୍ୱାରା ସମ୍ମାନିତ କରାଯିବ । ସାହସିକତା ଓ କର୍ତ୍ତବ୍ୟନିଷ୍ଠା ପାଇଁ ତାଙ୍କୁ ଏହି ସମ୍ମାନ ପ୍ରଦାନ କରାଯିବ ।
ଗତ ବୁଧବାର ନିଜ ଗାଁ ହାସିୟାବାସ (ଚୁରୁ) ଆସିଥିବା ଭଲେ ସିଂହ ଅପରେସନ୍ ସିନ୍ଦୂରର ଏକ ଗୁରୁତ୍ୱପୂର୍ଣ୍ଣ ମୁହୂର୍ତ୍ତ କଥା ମନେପକାଇ କହିଛନ୍ତି, ଶତ୍ରୁପକ୍ଷର ମିସାଇଲ ଆକ୍ରମଣ ସମୟରେ ଏକ ଲଞ୍ଚର୍ ସିଷ୍ଟମ୍ ଖରାପ ହୋଇଗଲା । କାରଣ ସେହି ସିଷ୍ଟମ୍ରୁ ସେମାନେ ଅନେକ ମିସାଇଲ୍ ଲଞ୍ଚ୍ କରିସାରିଥିଲେ । ରାତିର ଅନ୍ଧାରରେ ତାଙ୍କ ଟିମ୍ ପାଖରେ ଗୋଟିଏ ବିକଳ୍ପ ଥିଲା । ଖରାପ ଲଞ୍ଚର୍ ସିଷ୍ଟମ୍କୁ ସେଠାରେ ଛାଡ଼ି ଆଗକୁ ବଢ଼ିବା । କାରଣ ସେତେବେଳେ ପାକିସ୍ତାନ ଲଗାତାର ମିସାଇଲ ଆକ୍ରମଣ କରୁଥିଲା । କିନ୍ତୁ ଯଦି ସେମାନେ ଲଞ୍ଚର୍ ଛାଡ଼ି ଚାଲିଯାଇଥାନ୍ତେ, ପାଖରେ ଥିବା ମିସାଇଲ୍ଗୁଡ଼ିକ ନଷ୍ଟ ହେବାର ଆଶଙ୍କା ଅଧିକ ଥିଲା । କାରଣ ଶତ୍ରୁ ଲଗାତାର ଡ୍ରୋନ୍ ଆକ୍ରମଣ କରୁଥିଲା ।
ଏହି ଘଡ଼ିସନ୍ଧି ମୁହୂର୍ତ୍ତରେ ଭଲେ ସିଂହଙ୍କ ଟିମ୍ ସ୍ଥିର କଲେ, ସିଷ୍ଟମ୍କୁ ଛାଡ଼ି ଯିବେନାହିଁ । ସେମାନେ ଏକ ୪ ଜଣିଆ ଟିମ୍ ଗଢ଼ିଲେ । ଲଞ୍ଚର୍ ସିଷ୍ଟମ୍କୁ ସଜାଡ଼ି ତା’ର ସ୍ଥାନକୁ ନେଇଗଲେ । ଏହି କାମ ସମ୍ପୂର୍ଣ୍ଣ ଅନ୍ଧାରରେ ଏବଂ ଗୁପ୍ତ ଭାବେ କରାଯାଉଥିଲା । ସିଷ୍ଟମ୍କୁ ସଜାଡ଼ିବା ପରେ ସେଥିରୁ ସେମାନେ ଦୁଇଟି ଟାର୍ଗେଟ୍କୁ ନଷ୍ଟ କଲେ । ତନ୍ମଧ୍ୟରେ ପାକିସ୍ତାନର ଅୱାକ୍ସ ଫାଇଟର୍ ଜେଟ୍ ଥିଲା । ପେଶାୱର ନିକଟସ୍ଥ ରନ୍ୱେରୁ ଉଡ଼ାଣ ଆରମ୍ଭ ସମୟରେ ୩୧୪ କିମି ଦୂରରୁ ତାକୁ ନଷ୍ଟ କରାଗଲା ।
ଭଲେ ସିଂହ କହିଛନ୍ତି, ଅପରେସନ୍ ସିନ୍ଦୂରରେ ଏସ୍-୪୦୦ ୟୁନିଟ୍ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିଲା । ତାଙ୍କ ଟିମ୍ ପାକିସ୍ତାନର ଏଫ୍-୧୬ ସମେତ ୫ ଫାଇଟର୍ ଜେଟ୍କୁ ଖସାଇଥିଲେ । ମେ’ ୭ରୁ ୧୦ ତାରିଖ ପର୍ଯ୍ୟନ୍ତ ଚାଲିଥିବା ଅପରେସନ୍ ସିନ୍ଦୂର ସମୟରେ ଟିମ୍ ସହ ମିଶି ସେ ୨୪ ଘଣ୍ଟା କାମ କରିଥିଲେ । ଯବାନଙ୍କୁ ନିଦ ନ ଆସିବା ପାଇଁ ସ୍ୱତନ୍ତ୍ର ବଟିକା ଦିଆଯାଉଥିଲା । ତାହା ଅତିକମ୍ରେ ୮-୧୦ ଘଣ୍ଟା କାମ କରୁଥିଲା । ଏହି ସମୟରେ ସେମାନେ ଖୁବ୍ କମ୍ ସମୟ ଭିତରେ ଭୋଜନ ଶେଷ କରୁଥିଲେ ।
ଭଲେ ସିଂହ ଦ୍ୱାଦଶ ପାସ୍ ପରେ ୨୦୦୫ରେ ବାୟୁସେନାରେ ଯୋଗ ଦେଇଥିଲେ । ଗତ ଜୁନ୍ ୩୦ରେ ପଞ୍ଜାବର ଆଦମପୁର ଏୟାରବେସ୍ରୁ ସେ ଅବସର ନେଇ ଫେରିଛନ୍ତି । ସେବାରେ ଥିବାବେଳେ ସେ ଡିଆର୍ଡିଓ ସିକ୍ରେଟ୍ ମିସାଇଲ ମିଶନରେ କାମ କରିଥିଲେ। ରୁଷ୍ର ପିଚୋରା ମିସାଇଲ ସିଷ୍ଟମ୍ ଉପରେ ମଧ୍ୟ ସେ କାମ କରିଛନ୍ତି । ସେ ଜାମନଗର, ଶ୍ରୀନଗର, ଦିଲ୍ଲୀ ଓ ଆଦମପୁରରେ ସେବା ଦେଇଛନ୍ତି।
