ନୂଆଦିଲ୍ଲୀ: ୧୭ ମାର୍ଚ୍ଚ ୨୦୨୫ରେ ମହାରାଷ୍ଟ୍ରର ନାଗପୁରରେ ମୋଗଲ ଶାସକ ଔରଙ୍ଗଜେବଙ୍କ କବରସ୍ଥଳକୁ ହଟାଇବା ଦାବିକୁ ନେଇ ସାମ୍ପ୍ରଦାୟିକ ହିଂସା ଘଟିଥିଲା। ଏହି ସମୟରେ ହିଂସାତ୍ମକ ସଂଘର୍ଷ ଘଟିଥିଲା ଏବଂ ଦଙ୍ଗାକାରୀ ମାନେ ଅନେକ ଯାନବାହାନ ଜାଳି ଦେଇଥିଲେ। ଏହି ହିଂସାରେ ୩୩ ଜଣ ପୋଲିସ କର୍ମଚାରୀ ଆହତ ହୋଇଥିଲେ। ତେବେ ଏହି ମାମଲାରେ ପୋଲିସ ୫୦ ରୁ ଅଧିକ ଦୁର୍ବୃତ୍ତଙ୍କ ବିରୋଧରେ ଏଫଆଇଆର ରୁଜୁ କରିଛି ଏବଂ ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ସହରର କିଛି ସ୍ଥାନରେ କର୍ଫ୍ୟୁ ଜାରି କରାଯାଇଛି। ବର୍ତ୍ତମାନ, ନାଗପୁରର ୧୧ ଟି ପୋଲିସ ଷ୍ଟେସନ ଅଞ୍ଚଳରେ କର୍ଫ୍ୟୁ ଜାରି ଅଛି। ଏବେ, ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ହିଂସାକୁ ନେଇ ସ୍ପଷ୍ଟ ଟିପ୍ପଣୀ ରଖିଛନ୍ତି।
ମୁଖ୍ୟମନ୍ତ୍ରୀ ବିଧାନସଭାରେ କହିଛନ୍ତି ଯେ, ହିଂସା ମାମଲାରେ ତଦନ୍ତ ଚାଲିଛି ଏବଂ ବର୍ତ୍ତମାନ ସହରରେ ଶାନ୍ତି ରହିଛି। ସେ ଆହୁରି କହିଛନ୍ତି ଯେ ୧୯୯୨ ପରଠାରୁ ନାଗପୁରରେ କେବେ ଦଙ୍ଗା ହୋଇନାହିଁ। ଏହି ସାମ୍ପ୍ରତିକ ଘଟଣାଗୁଡ଼ିକୁ ଜାଣିଶୁଣି ଉସୁକାଇ ଦିଆଯାଇଥିଲା। 'ଏହି ହିଂସାରେ ଜଡିତ ଲୋକଙ୍କୁ ଆମେ କବରରୁ ମଧ୍ୟ ବାହାର କରିବୁ।'
ମୁଖ୍ୟମନ୍ତ୍ରୀ ଫଡନବୀସ କହିଛନ୍ତି, 'କିଛି ଲୋକ ଜାଣିଶୁଣି ଆୟାତ ପୋଡ଼ି ଯାଇଥିବା ଗୁଜବ ପ୍ରସାର କରିବାକୁ ଚେଷ୍ଟା କରିଥିଲେ, ଯେତେବେଳେ କି ଏପରି କିଛି ହୋଇନଥିଲା । ଏହି ଗୁଜବ ଜାଣିଶୁଣି ପ୍ରସାରିତ କରାଯାଇଥିଲା ଯେ ଶ୍ଳୋକଟି ଲେଖାଯାଇଥିବା ପତ୍ରଟି ପୋଡ଼ି ଯାଇଛି । ଏହା ସମ୍ପୂର୍ଣ୍ଣ ଭାବରେ ଏକ ଗୁଜବ ଥିଲା।
ମୁଖ୍ୟମନ୍ତ୍ରୀ ଫଡନବୀସ ମଧ୍ୟ ସ୍ପଷ୍ଟ କରିଛନ୍ତି ଯେ ଏହି ମାମଲାରେ ତାଙ୍କ ଏବଂ ପୋଲିସ କମିଶନରଙ୍କ ବୟାନ ମଧ୍ୟରେ କୌଣସି ପାର୍ଥକ୍ୟ ନାହିଁ। ସେ କହିଛନ୍ତି, 'ପୁଲିସ କମିଶନର କହିଛନ୍ତି ଯେ ଆମେ ଏବେ ବି ତଦନ୍ତ କରୁଛୁ ଏବଂ ଏପର୍ଯ୍ୟନ୍ତ କୌଣସି ନିଷ୍କର୍ଷରେ ପହଞ୍ଚି ନାହୁଁ।
