ଭୁବନେଶ୍ୱର,୦୪/୧୧: ମିଶନ ଉତ୍କର୍ଷ ଓଡ଼ିଶା । ଓଡ଼ିଶାକୁ ଅଧିକ ନିବେଶକ ଭିଡ଼ିବାକୁ ପୂରାଦମ୍ରେ କସରତ କରୁଛନ୍ତି ରାଜ୍ୟ ସରକାର। ଦେଶ ପରେ ଏବେ ବିଦେଶରୁ ପୁଞ୍ଜିପତିଙ୍କୁ ଆକୃଷ୍ଟ କରିବାକୁ ହେବ ରୋଡ୍ ସୋ । ଏଥିପାଇଁ ଆସନ୍ତା ୧୮ରୁ ତିନିଦିନିଆ ବିଦେଶ ଗସ୍ତରେ ଯିବେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ସିଙ୍ଗାପୁରରେ ଶିଳ୍ପ ବିଭାଗ ରୋଡ ସୋ’ର ଆୟୋଜନ କରୁଛି । ମୁଖ୍ୟମନ୍ତ୍ରୀ ନିବେଶକଙ୍କ ସହ ଆଲୋଚନା କରିବେ ।
ଓଡ଼ିଶାରେ ଶିଳ୍ପାୟନ ପାଇଁ ଥିବା ସବୁ ସମ୍ଭାବନା ଓ ସରକାରଙ୍କ ସହଯୋଗର ପ୍ରତିଶ୍ରୁତି ଦେବେ। ଆସନ୍ତା ଜାନୁଆରୀ ୨୮ ଓ ୨୯ରେ ‘ଉତ୍କର୍ଷ ଓଡ଼ିଶା: ମେକ ଇନ୍ ଓଡ଼ିଶା କନକ୍ଲେଭ୍ ୨୦୨୫’ ଅନୁଷ୍ଠିତ ହେବ । ଏହି କନକ୍ଲେଭରେ ଜାତୀୟ ଓ ଆନ୍ତର୍ଜାତିକ ସ୍ତରର ପୁଞ୍ଜିପତିଙ୍କୁ ସାମିଲ କରିବା ସହ ଓଡ଼ିଶାରେ ଶିଳ୍ପାୟନର ନୂଆ ଧାରା ସୃଷ୍ଟି କରିବାକୁ ରାଜ୍ୟ ସରକାର ଚେଷ୍ଟା ଚଳାଇଛନ୍ତି । ନୂଆଦିଲ୍ଲୀ ଓ ମୁମ୍ବାଇ ରୋଡ ସୋ’ ସଫଳତା ପରେ ଶିଳ୍ପ ବିଭାଗ ଏବେ ବିଦେଶ ଉପରେ ଆଖି ପକାଇଛି । ମୁଖ୍ୟମନ୍ତ୍ରୀ ସିଙ୍ଗାପୁରରେ ଶିଳ୍ପପତିଙ୍କ ସହ ବ୍ୟକ୍ତିଗତ ଭାବେ ଓଡ଼ିଶାରେ ଶିଳ୍ପ ପ୍ରତିଷ୍ଠା ନେଇ ଆଲୋଚନା କରିବେ । ରୋଡ ସୋ’ରେ ରାଜ୍ୟରେ ଶିଳ୍ପ ପ୍ରତିଷ୍ଠା ପାଇଁ ଥିବା ସମ୍ଭାବନା ନେଇ ବିସ୍ତୃତ ସୂଚନା ଦିଆଯିବ । ଏହାଛଡ଼ା ଉତ୍କର୍ଷ ଓଡ଼ିଶା: ମେକ୍ ଇନ ଓଡ଼ିଶା କନକ୍ଲେଭ ପାଇଁ ନିବେଶକଙ୍କୁ ମୁଖ୍ୟମନ୍ତ୍ରୀ ନିମନ୍ତ୍ରଣ ମଧ୍ୟ କରିବେ ।
ସୂଚନାଯୋଗ୍ୟ, ଗତ ମାସରେ ମୁଖ୍ୟମନ୍ତ୍ରୀ ନୂଆଦିଲ୍ଲୀରେ ବିଭିନ୍ନ ଦେଶର ରାଷ୍ଟ୍ରଦୂତ, ହାଇକମିଶନର, ବାଣିଜ୍ୟିକ କମିଶନର ଏବଂ ପୁଞ୍ଜିପତିମାନଙ୍କ ସହ ବୈଠକ କରିଥିଲେ । ଓଡ଼ିଶା ସରକାରଙ୍କ ତରଫରୁ ନୂଆଦିଲ୍ଲୀରେ ନିବେଶକଙ୍କୁ ଆକୃଷ୍ଟ କରିବାକୁ ଆୟୋଜିତ ହୋଇଥିଲା ଆମ୍ବାସଡର୍ସ ମିଟ୍ । ସେହିଭଳି ମୁମ୍ବାଇରେ ମଧ୍ୟ ଶିଳ୍ପ ବିଭାଗ ପକ୍ଷରୁ ରୋଡ ସୋ ଅନୁଷ୍ଠିତ ହୋଇଥିଲା । ବେଦାନ୍ତ ରାଜ୍ୟରେ ଆଉ ୧ ଲକ୍ଷ କୋଟି ନିବେଶ କରିବାକୁ ଏଠାରେ ଘୋଷଣା କରିଥିଲା । ଏଥିରେ ୨ଲକ୍ଷ ନିଯୁକ୍ତି ସୁଯୋଗ ସୃଷ୍ଟି ହେବ ।
ମୁଖ୍ୟମନ୍ତ୍ରୀଙ୍କ ସହ ଶିଳ୍ପ ମନ୍ତ୍ରୀ ସମ୍ପଦ ଚନ୍ଦ୍ର ସ୍ୱାଇଁ, ମୁଖ୍ୟ ଶାସନ ସଚିବ ମନୋଜ ଆହୁଜା, ପ୍ରମୁଖ ସଚିବ ହେମନ୍ତ ଶର୍ମା ଓ ବରିଷ୍ଠ ଅଧିକାରୀମାନେ ସିଙ୍ଗାପୁର ଗସ୍ତରେ ଯିବେ । ଦିଲ୍ଲୀ, ମୁମ୍ବାଇ ଭଳି ସିଙ୍ଗାପୁର ରୋଡ ସୋ ନିବେଶ ଟାଣିବାରେ ସହାୟକ ହେବ ବୋଲି ଶିଳ୍ପ ବିଭାଗ ଆଶା ରଖିଛି ।
