ବଲାଙ୍ଗିର,୦୨/୧୧: ଶନିବାର ବଲାଙ୍ଗିର ଜିଲ୍ଲା ଗସ୍ତରେ ଯିବେ ମୁଖ୍ୟମନ୍ତ୍ରୀ ମୋହନଚରଣ ମାଝୀ। ଏହି ଗସ୍ତବେଳେ ମୁଖ୍ୟମନ୍ତ୍ରୀ ଶ୍ରୀ ମାଝୀ ତୁଷୁରା, ବେଲପଡ଼ା, ପାଟଣାଗଡ଼ ଏବଂ ବଲାଙ୍ଗିରରେ ଆୟୋଜିତ ସମୁଦାୟ ୬ଟି କାର୍ଯ୍ୟକ୍ରମରେ ଯୋଗଦେବେ । ଜିଲ୍ଲାରେ ୫୯୫ କୋଟିରୁ ଊଦ୍ଧ୍ୱର୍ ଟଙ୍କାର ସମୁଦାୟ ୮୩ ପ୍ରକଳ୍ପର ଉଦ୍ଘାଟନ ଏବଂ ଶିଳାନ୍ୟାସ କରିବାର କାର୍ଯ୍ୟକ୍ରମ ରହିଛି । ତନ୍ମଧ୍ୟରେ ପ୍ରାୟ ୩ଶହ କୋଟି ବ୍ୟୟ ଅଟକଳରେ ଅପରଲାନ୍ଥ ମଧ୍ୟମ ଜଳସେଚନ ପ୍ରକଳ୍ପ, ୧୧୮ କୋଟିର ପାଟଣାଗଡ଼ ବାଇପାସ୍ ଏବଂ ପ୍ରାୟ ୬୬ କୋଟିର ତୁଷୁରା ଏୟାରଷ୍ଟ୍ରିପ୍ ଭଳି ବଡ଼ ପ୍ରକଳ୍ପ ରହିଛି ।
ସେହିପରି ଅପରାହ୍ନରେ ଜିଲ୍ଲା ପ୍ରତିଷ୍ଠା ଦିବସ ‘ବଲାଙ୍ଗିର ଦିନ୍’ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ଶ୍ରୀ ମାଝି ମୁଖ୍ୟଅତିଥି ଭାବେ ଯୋଗଦେବେ । ମୁଖ୍ୟମନ୍ତ୍ରୀଙ୍କ ଗସ୍ତକୁ ଦୃଷ୍ଟିରେ ରଖି ପ୍ରଶାସନ ଏବଂ ପୁଲିସ୍ ପକ୍ଷରୁ ବ୍ୟାପକ ପ୍ରସ୍ତୁତି ଜାରି ରହିଛି । ସନ୍ଧ୍ୟାରେ ପୁଲିସ୍ ପକ୍ଷରୁ କାର୍କେଡ୍ ରିହର୍ସଲ ଏବଂ ସୁରକ୍ଷା ବ୍ୟବସ୍ଥା ଯାଞ୍ଚ କରାଯାଇଛି । ସୁରକ୍ଷା ଦାୟିତ୍ୱରେ ୩୫ ପ୍ଲାଟୁନ୍ ଫୋର୍ସ ଏବଂ ୨୦୦ ଅଧିକାରୀ ଦାୟିତ୍ୱରେ ରହିଛନ୍ତି । ନିଜେ ଉତ୍ତରାଞ୍ଚଳ ଆଇଜି ହିମାଂଶୁ ଲାଲ୍ ସ୍ଥିତି ସମୀକ୍ଷା କରିଛନ୍ତି । ମୁଖ୍ୟମନ୍ତ୍ରୀ ଶ୍ରୀ ମାଝି ପୂର୍ବାହ୍ନରେ ସ୍ୱତନ୍ତ୍ର ବିମାନରେ ତୁଷୁରା ଏୟାରଷ୍ଟ୍ରିପ୍ରେ ପହଞ୍ଚିବେ । ସେଠାରେ ୨-ବି କାଟାଗୋରିକୁ ଉନ୍ନୀତ ହୋଇଥିବା ତୁଷୁରା ଏୟାରଷ୍ଟ୍ରିପ୍ ଉନ୍ନତୀକରଣ ପ୍ରକଳ୍ପର ଶିଳାନ୍ୟାସ କରିବେ । ଏହାପରେ ବେଲପଡ଼ା ଅଭିମୁଖେ ଯିବେ । ସେଠାରେ ଅପରଲାନ୍ଥ ମଧ୍ୟମ ଜଳସେଚନ ପ୍ରକଳ୍ପ ସମେତ ଅନ୍ୟାନ୍ୟ ପ୍ରକଳ୍ପର ଶିଳାନ୍ୟାସ ଓ ଉଦ୍ଘାଟନ କରିବେ । ଏହାପରେ ପାଟଣାଗଡ଼ ଯାଇ ବାଇପାସ୍ ସମେତ ବିଭିନ୍ନ ପ୍ରକଳ୍ପର ଶିଳ୍ୟାନ୍ୟାସ କରିବେ ।
ପାଟଣାଗଡ଼ ଉପଖଣ୍ଡ ହସ୍ପିଟାଲ୍ରେ ଡାଏଲିସିସ ୟୁନିଟ୍ର ଲୋକାର୍ପଣ କରିବେ । ସେଠାରୁ ବଲାଙ୍ଗିର ଆସି ପ୍ରଥମେ ସର୍କିଟହାଉସ୍ର ନୂତନ କୋଠା ଲୋକାର୍ପଣ କରିବେ । ଜିଲ୍ଲାର ଅଧିକାରୀଙ୍କ ସହ ଆଲୋଚନା ପରେ କୋସଲ କଳାମଣ୍ଡଳ ପଡ଼ିଆରେ ଆୟୋଜିତ ଜିଲ୍ଲା ପ୍ରତିଷ୍ଠା ଉତ୍ସବ ‘ବଲାଙ୍ଗିର ଦିନ୍’ କାର୍ଯ୍ୟକ୍ରମରେ ଯୋଗଦେବେ । ଶେଷରେ ଉତ୍କଳ ପ୍ରାଦେଶିକ ବନ୍ଧୁମିଳନରେ ଅତିଥି ଭାବେ ଯୋଗଦେଇ ସର୍କିଟ ହାଉସ୍ ଫେରି ରାତ୍ରିରହଣି କରିବେ । ୩ ତାରିଖ (ରବିବାର) ସକାଳୁ ତୁଷୁରା ଏୟାରଷ୍ଟ୍ରିପ୍ରୁ ସ୍ୱତନ୍ତ୍ର ବିମାନରେ ମୁଖ୍ୟମନ୍ତ୍ରୀ ଶ୍ରୀ ମାଝି ଭୁବନେଶ୍ୱର ଫେରିଯିବାର କାର୍ଯ୍ୟକ୍ରମ ରହିଛି ।
