ନୂଆଦିଲ୍ଲୀ: ତିରୁପତି-ତିରୁମାଳା ଦେବସ୍ଥାନମ୍ ଅର୍ଥାତ ତିରୁପତି ମନ୍ଦିରରେ କାମ କରୁଥିବା ଲୋକଙ୍କ ସମ୍ପର୍କରେ ଆନ୍ଧ୍ର ପ୍ରଦେଶ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ଏକ ବଡ଼ ବୟାନ ଦେଇଛନ୍ତି । ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ କହିଛନ୍ତି ଯେ, ମନ୍ଦିରରେ କେବଳ ହିନ୍ଦୁମାନଙ୍କୁ ନିଯୁକ୍ତି ଦିଆଯିବା ଉଚିତ । ଅନ୍ୟ ସମ୍ପ୍ରଦାୟର ଲୋକମାନେ ମନ୍ଦିରରେ କାମ କରୁଛନ୍ତି, ତେବେ ସେମାନଙ୍କୁ ଅପମାନିତ ନକରି ଅନ୍ୟ ସ୍ଥାନକୁ ସ୍ଥାନାନ୍ତର କରାଯିବା ଆବଶ୍ୟକ ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ଶୁକ୍ରବାର ତିରୁପତି ମନ୍ଦିରରେ ପ୍ରାର୍ଥନା କରିବାକୁ ପହଞ୍ଚିଥିଲେ । ଏହା ପରେ ସେ, ମନ୍ଦିରରେ କାମ କରୁଥିବା ଲୋକଙ୍କ ସମ୍ପର୍କରେ ବଡ଼ ମନ୍ତବ୍ୟ ଦେଇଛନ୍ତି । ଏହି ସମୟରେ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ଦେଶର ସମସ୍ତ ରାଜ୍ୟର ରାଜଧାନୀରେ ଭେଙ୍କଟେଶ୍ୱର ସ୍ୱାମୀଙ୍କ ମନ୍ଦିର ନିର୍ମାଣ ଯୋଜନା ନେଇ ସୂଚନା ଦେଇଛନ୍ତି । ବିଦେଶରେ ରହୁଥିବା ଅନେକ ଲୋକ ମନ୍ଦିର ପ୍ରତିଷ୍ଠା କରିବାକୁ ନିଜର ଇଚ୍ଛା ପ୍ରକାଶ କରୁଛନ୍ତି। ମୁଖ୍ୟମନ୍ତ୍ରୀ କହିଛନ୍ତି ଯେ, ସାରା ବିଶ୍ୱରେ ଭଗବାନ ଭେଙ୍କଟେଶ୍ୱରଙ୍କ ସମ୍ପତ୍ତିକୁ ସୁରକ୍ଷା ଦେବା ପାଇଁ ପବିତ୍ର ସୂତ୍ର ବନ୍ଧା ହୋଇଛି ।
ପୂର୍ବ ସରକାରଙ୍କ ମମତାଜ ହୋଟେଲ ଯୋଜନାକୁ ବାତିଲ କରାଯାଇଛି ବୋଲି ସେ କହିଛନ୍ତି । ମନ୍ଦିର ପାଖରେ କୌଣସି ପ୍ରକାରର ବାଣିଜ୍ୟିକ କାର୍ଯ୍ୟକଳାପକୁ ଅନୁମତି ଦିଆଯିବ ନାହିଁ । ପୂର୍ବ ସରକାର ମନ୍ଦିର ଚାରିପାଖରେ ୩୫.୩୨ ଏକର ଜମିରେ ମମତାଜ ହୋଟେଲ ନିର୍ମାଣ ଯୋଜନାକୁ ଅନୁମୋଦନ କରିଥିଲେ, ଯାହାକୁ ନାଇଡୁ ସରକାର ବାତିଲ କରିଦେଇଛନ୍ତି ।
ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ କହିଛନ୍ତି ଯେ, ମନ୍ଦିର ଚାରିପାଖରେ କୌଣସି ଘରୋଇ ଦଳକୁ ବାଣିଜ୍ୟିକ କାର୍ଯ୍ୟକଳାପ କରିବାକୁ ଅନୁମତି ଦିଆଯିବ ନାହିଁ । ଯେଉଁମାନଙ୍କୁ ଅନୁମୋଦନ ଦିଆଯାଇଛି ସେମାନେ ମନ୍ଦିର ପାଖରେ କେବଳ ନିରାମିଷ ଖାଦ୍ୟ ପରଷିବେ । ଯଦି କେହି ଗଡ଼ବଡ଼ କରନ୍ତି କିମ୍ବା ଏଭଳି କରି ଧରାପଡ଼ନ୍ତି ତେବେ ସରକାର ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବେ। ସେପଟେ ଅନ୍ୟ ସମ୍ପ୍ରଦାୟର ଲୋକମାନେ ମନ୍ଦିରରେ କାମ କରିବା ଉଚିତ୍ ନୁହେଁ । କୌଣସି ବ୍ୟକ୍ତି ଅନ୍ୟ ସମ୍ପ୍ରଦାୟର ଥାଆନ୍ତି ତେବେ ତାଙ୍କ ଭାବନାକୁ ଆଘାତ ନ ଦେଇ ତାଙ୍କୁ ଅନ୍ୟ ସ୍ଥାନରେ ନିଯୁକ୍ତି ଦିଆଯିବ ବୋଲି ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ।
