ବଲାଙ୍ଗୀର, ୦୩/୧୧ : ୨ ଦିନିଆ ବଲାଙ୍ଗୀର ଗସ୍ତରେ ମୁଖ୍ୟମନ୍ତ୍ରୀ ମୋହନ ମାଝୀ। ଏହି ଅବସରରେ ସେ ଜିଲ୍ଲାରେ ବିଭିନ୍ନ କାର୍ଯ୍ୟକ୍ରମରେ ଯୋଗ ଦେବା ସହ ବିଭିନ୍ନ ପ୍ରକଳ୍ପର ଶୁଭାରମ୍ଭ କରିଛନ୍ତି। ଆଜି ସର୍କିଟ୍ ହାଉସ୍ ଠାରେ ମୁଖ୍ୟମନ୍ତ୍ରୀ ପ୍ରେସମିଟ୍ କରିଛନ୍ତି। ସେ କହିଛନ୍ତି ଯେ, ପୂର୍ବ ସରକାରରେ ବଲାଙ୍ଗୀରକୁ ଅବହେଳା କରାଯାଇଛି। ଯେଉଁ ସରକାର ଥିଲେ, ପ୍ରତି ଅଞ୍ଚଳକୁ ଯେଭଳି ଗୁରୁତ୍ଵ ଦେବା କଥା ଦେଲେନି। ଅସମାନତା ଦେଖାଗଲା, ଏ ଜିଲ୍ଲାକୁ ବି ଅବହେଳା କରାଯାଇଛି। ନେତୃତ୍ଵ ଅଭାବ ନଥିବା ସତ୍ତ୍ଵେ ଏଠାରେ ବିକାଶ କରାଗଲାନି।
ମୁଖ୍ୟମନ୍ତ୍ରୀ କହିଛନ୍ତି ଯେ, ୮୯୦ କୋଟିର ବିଭିନ୍ନ ଉନ୍ନୟନମୂଳକ ପ୍ରକଳ୍ପର ଉଦ୍ଘାଟନ ହୋଇଛି। ତୁଷୁରା ଏୟାରଷ୍ଟ୍ରିପ୍ର ଉନ୍ନତିକରଣ କରାଯିବ। ଖୋର୍ଦ୍ଧା-ବଲାଙ୍ଗୀର ରେଳପଥ କାମ ଶୀଘ୍ର ସରିବ। ୩୮୦୦ କୋଟିର ବଜେଟ ଏବେ ସୁଦ୍ଧା ଦିଆଗଲାଣି। ଆଉ ୮୦ କିମି ବ୍ୟବଧାନ ଅଛି, ତ୍ଵରିତ କାମ ପାଇଁ ନିର୍ଦ୍ଦେଶ ଦିଆଯାଇଛି। ବଲାଙ୍ଗୀରରେ ଡବଲ ନୁହେଁ, ଟ୍ରିପଲ ଇଞ୍ଜିନ ସରକାର ଅଛି। ଏଠାରେ ବିକାଶ ନିଶ୍ଚୟ ହେବ।
ସେହିପରି ମହାନଦୀ ପ୍ରସଙ୍ଗରେ ମୁଖ୍ୟମନ୍ତ୍ରୀ କହିଛନ୍ତି ଯେ, ମହାନଦୀ ବିବାଦ ନେଇ ଆଲୋଚନା ଜାରି ରହିଛି। ଛତିଶଗଡ଼ ମୁଖ୍ୟମନ୍ତ୍ରୀଙ୍କ ସହ ଏନେଇ ୨ ଥର ଆଲୋଚନା ହୋଇଛି। ଜଳ ବିବାଦ ପ୍ରସଙ୍ଗକୁ ରାଜ୍ୟ ସରକାର ଗୁରୁତ୍ଵର ସହ ନେଇଛନ୍ତି। ଆଗାମୀ ଦିନରେ ମହାନଦୀ ଉପରେ ପ୍ରସ୍ତାବିତ ପ୍ରକଳ୍ପ ତ୍ଵରାନ୍ଵିତ ପାଇଁ ବିଚାର ଚାଲିଛି।
