କଟକ,୨୧/୦୮: ଚଳିତ ବର୍ଷ ସ୍ୱାୟତ୍ତ ଶାସନ ଦିବସକୁ ବେଶ୍ ଧୂମ୍ଧାମ୍ରେ ପାଳନ କରିବ କଟକ ମହାନଗର ନିଗମ (ସିଏମ୍ସି) । ତେବେ ଏଥର ଦୀର୍ଘ ୧୫ ଦିନ ଧରି ପାଳନ କରାଯାଉଛି । ଏଥିପାଇଁ କାଉନ୍ସିଲ୍ ପକ୍ଷରୁ ସମ୍ପୂର୍ଣ୍ଣ ସ୍ୱାୟତ୍ତ ଶାସନ ଦିବସ ଖର୍ଚ୍ଚ ପାଇଁ ୨୩ ଲକ୍ଷ ୫୦ ହଜାର ଟଙ୍କାର ବଜେଟ୍ ପ୍ରସ୍ତୁତ ହୋଇସାରିଛି । ସବୁଠୁ ବଡ କଥା ହେଉଛି ଯେ, ଗତବର୍ଷ ଭଳି ଏଥର ମଧ୍ୟ ସିଏମ୍ସି ସହିଦ୍ ଭବନ ବନ୍ଦ ଆଳରେ ଘରୋଇ ମଣ୍ଡପରେ ଏହି ଦିବସ ପାଳନ କରିବ । ଏଥିପାଇଁ ଘରୋଇ ମଣ୍ଡପକୁ ଏକ ଲକ୍ଷ ଟଙ୍କା ଭଡ଼ା ଗଣିବା ସହିତ ଏହାର ସାଜସଜ୍ଜା ବାବଦକୁ ୩ ଲକ୍ଷ ଟଙ୍କା ଖର୍ଚ୍ଚ କରିବାକୁ ନିଷ୍ପତ୍ତି ହୋଇଛି ।
ପ୍ରତିବର୍ଷ ଅଗଷ୍ଟ ମାସ ୩୧ ତାରିଖକୁ ରାଜ୍ୟର ଅନ୍ୟ ମହାନଗର ନିଗମ ସମେତ ସିଏମ୍ସିରେ ମଧ୍ୟ ସ୍ୱାୟତ୍ତ ଶାସନ ଦିବସ ପାଳନ କରାଯାଇଥାଏ । ଏହି ଉପଲକ୍ଷେ ସହରବାସୀଙ୍କୁ ବଡବଡ ପ୍ରକଳ୍ପ ଭେଟି ସ୍ୱରୂପ ଦିଆଯାଇଥାଏ । ଏବର୍ଷ ମାତ୍ର ହାତରେ ଦିନ କେଇଟା ଥିଲେ ମଧ୍ୟ ଆଜି ପର୍ଯ୍ୟନ୍ତ ପ୍ରକଳ୍ପ ତାଲିକା ଚୂଡାନ୍ତ ହୋଇପାରୁ ନ ଥିବା ଜଣାପଡିଛି ।
ଏସବୁ ମଧ୍ୟରେ ସ୍ୱାୟତ୍ତ ଶାସନ ଦିବସ ପାଳନ ପାଇଁ ୨୩ ଲକ୍ଷ ୫୦ ହଜାରର ବଜେଟ୍ ହୋଇଛି । ସେଥିରେ ମେୟର୍ ଓ ଡେପୁଟି ମେୟର୍ଙ୍କ ସମେତ କର୍ପୋରେଟରଙ୍କୁ ସମ୍ବର୍ଦ୍ଧନା ପାଇଁ ୪ ଲକ୍ଷ ଟଙ୍କା, ଘରୋଇ ମଣ୍ଡପ ବୁକିଂ ପାଇଁ ଲକ୍ଷେ ଓ ସାଜସଜ୍ଜା ପାଇଁ ୩ ଲକ୍ଷ ଟଙ୍କା, ଡ୍ରାମା ପାଇଁ ୩ ଲକ୍ଷ, ବିଭିନ୍ନ ପ୍ରତିଯୋଗିତା ଆୟୋଜନ ପାଇଁ ଖର୍ଚ୍ଚ ଦେଢ ଲକ୍ଷ, ପତାକା ଉତ୍ତୋଳନ ପରେ ମିଠା ଓ ଟିଫିନ୍ ବଣ୍ଟନ ପାଇଁ ୪୦ ହଜାର, ଫଟୋଗ୍ରାଫ୍ ପାଇଁ ୪୦ ହଜାର, ସହିଦ୍ ଭବନଠାରେ ସ୍ୱାଗତ ସଂଗୀତ ପରିବେଷଣ ପାଇଁ ୨୦ ହଜାର ଟଙ୍କା ଖର୍ଚ୍ଚ କରାଯିବ ।
ସବୁଠୁ ବଡ କଥା ହେଉଛି ଯେ, ଗତ ବର୍ଷ ସହିଦ୍ ଭବନ ପୁନରୁଦ୍ଧାର ଆଳରେ ଘରୋଇ ମଣ୍ଡପରେ ଆୟୋଜନକୁ ନେଇ ଅସନ୍ତୋଷ ପ୍ରକାଶ ପାଇଥିଲା । ଏଥର ମଧ୍ୟ କାମ ଶେଷ ପର୍ଯ୍ୟାୟରେ ଥିଲେ ମଧ୍ୟ ଏହାକୁ ଶୁଭାରମ୍ଭ କରିବାକୁ ମଧ୍ୟ କର୍ତ୍ତୃପକ୍ଷଙ୍କ ଆନ୍ତରିକତା ଅଭାବ ପରିଲକ୍ଷିତ ହୋଇଛି । ଯାହାଫଳରେ ଏଥର ମଧ୍ୟ ସରକାରୀ ପାଣ୍ଠିରୁ ଭଡା ଗଣିବେ କର୍ତ୍ତୃପକ୍ଷ ।
