ଭଦ୍ରକ, ୦୬/୦୬: ବନ୍ଧୁକ ଦେଖାଇ ଯୁବକଙ୍କୁ ଅପହରଣ କରିନେଲେ କୋଇଲା ମାଫିଆ । ଭଦ୍ରକରୁ ବାଲେଶ୍ୱର ଜିଲ୍ଲା ନୀଳଗିରି ପାହାଡ଼କୁ ନେଇ ବାନ୍ଧି ରଖିଲେ । ଉଲଗ୍ନ କରି ପିଟିଲେ । ଲହୁଲୁହାଣ କରି ଛାଡ଼ିଲେ । ଗୁରୁବାର କୋଇଲା ମାଫିଆଙ୍କ ଏଭଳି ଦୌରାତ୍ମ୍ୟକୁ ନେଇ ଭଦ୍ରକଠୁ ବାଲେଶ୍ୱର ସବୁଠି ଚର୍ଚ୍ଚା । ପୁଲିସ୍ ଯୁବକଙ୍କୁ ଉଦ୍ଧାର କରି ମେଡିକାଲ୍ରେ ଭର୍ତ୍ତି କରିଥିବା ବେଳେ କାହିଁକି ତାଙ୍କୁ ଅପହରଣ କରି ମାଡ଼ ମରାଯାଇଛି, ତାହା ସ୍ପଷ୍ଟ ହୋଇନି । ଯୁବକ ଜଣଙ୍କ ପୁଲିସ୍କୁ କୋଇଲା ଚାଲାଣ ଖବର ଦେଉଥିବାରୁ ମାଫିଆମାନେ ଏଭଳି କାଣ୍ଡ ଭିଆଇଥିବା କୁହାଯାଉଛି । ମାଫିଆ ଗୋଷ୍ଠୀ ବିବାଦରୁ ଏଭଳି ଘଟଣା ଘଟିଥିବା ଚର୍ଚ୍ଚା ମଧ୍ୟ ହେଉଛି ।
ଭଦ୍ରକ ଜିଲ୍ଲା ସାବରଙ୍ଗ ଥାନା ଇଚ୍ଛାପୁର ଛକରୁ ପ୍ରତାପ ବେହେରା ଓରଫ ଚଗିଲିଙ୍କୁ ଗୁରୁବାର ଭୋର୍ ପ୍ରାୟ ସାଢ଼ ୫ଟାରେ ଅପହରଣ କରାଯାଇଥିବା ତାଙ୍କ ପତ୍ନୀ କନକଲତା ଥାନାରେ ଅଭିଯୋଗ କରିଥିଲେ । ଏକ ଧଳା କାର(ଓଡି୦୨ବିଏକ୍ସ ୭୧୦୧)ରେ କୋଇଲା ମାଫିଆମାନେ ବନ୍ଧୁକ ଦେଖାଇ ତାଙ୍କୁ ଉଠାଇ ନେଇଥିଲେ । ରମ୍ଭିଳା ଅଞ୍ଚଳର ପିଣ୍ଟୁ ମହାପାତ୍ର, ପୁରୁଣା ବଜାର ଥାନା ଅଞ୍ଚଳର ଫକିରୁଦ୍ଦିନ ଖାନ, ତିହିଡ଼ି ଥାନା ପଳିଆବିନ୍ଧା ଅଞ୍ଚଳର ଭଗବାନ ଦାସ ଓରଫ ବାୟା, ଚନ୍ଦନ ଦାସ ଓ ପପୁ ତାଙ୍କୁ ନେଇ ଯାଇଥିବା ସେ ଅଭିଯୋଗ କରିଥିଲେ । ପୁଲିସ୍ ଏନେଇ ମାମଲା ରୁଜୁ କରି ତଦନ୍ତ କରିଥିଲା । ଦିନତମାମ ପ୍ରତାପଙ୍କୁ ପୁଲିସ୍ ଖୋଜିବାରେ ଲାଗିଥିଲା । ଏ ପ୍ରସଙ୍ଗ ଡିଆଇଜିଙ୍କ ଦପ୍ତରକୁ ବି ଯାଇଥିଲା । ଅପରାହ୍ଣରେ ପୁଲିସ୍ ପ୍ରତାପଙ୍କୁ ଭଦ୍ରକ ରାଣୀତାଲ ନିକଟରୁ ଉଦ୍ଧାର କରିଥିଲା । ସେ ପୋଲ ତଳେ ବସିଥିବାବେଳେ ପୁଲିସ ତାଙ୍କୁ ରକ୍ତ ଜୁଡୁବୁଡ଼ୁ ଅବସ୍ଥାରେ ଉଦ୍ଧାର କରିଥିଲା । ତାଙ୍କୁ ଏସକର୍ଟରେ ଜିଲ୍ଲା ହସ୍ପିଟାଲକୁ ଅଣାଯାଇଥିଲା । ଡିଆଇଜି ଡ. ସତ୍ୟଜିତ ନାୟକଙ୍କ ନିର୍ଦ୍ଦେଶରେ ସ୍ୱତନ୍ତ୍ର ଟିମ୍ ତାଙ୍କ ବୟାନ ରେକର୍ଡ କରିଛି ।
ପ୍ରାୟ ୧୦ ଘଣ୍ଟା କାଳ ପ୍ରତାପଙ୍କୁ ମାଫିଆମାନେ କେଉଁଆଡ଼େ ନେଇଥିଲେ ପୁଲିସ୍ ତାହାର ଖୋଳତାଡ଼ ଆରମ୍ଭ କରିଛି । ବିଶେଷସୂତ୍ରରୁ ଜଣାପଡ଼ିଛି ଯେ, ପ୍ରତାପଙ୍କୁ ନୀଳଗିରି ପାହାଡ଼ ଉପରେ ଘଞ୍ଚ ଜଙ୍ଗଲକୁ ନିଆଯାଇଥିଲା । ତାଙ୍କ ହାତଗୋଡ଼ ବାନ୍ଧି ମାଡ଼ ମରାଯାଇଛି । ପ୍ରତାପଙ୍କ ଦେହସାରା ରକ୍ତାକ୍ତ ଚିହ୍ନ ରହିଛି । କାନରୁ ରକ୍ତସ୍ରାବ ହେଉଛି । ପିଠିରେ ନୋଳା ବସିଛି । ଏଥିରୁ କୋଇଲା ମାଫିଆମାନେ କେତେ ନୃଶଂସ ଭାବେ ନିର୍ଯାତନା ଦେଇଛନ୍ତି ତାହା ଜଣାପଡ଼ୁଛି । ସଂଘବଦ୍ଧ ଭାବେ ଅକଥନୀୟ ଆକ୍ରମଣରେ ସେ କଷ୍ଟ ସହି ନ ପାରି ଜୀବନ ହାରିବାକୁ ବି ଉଦ୍ୟମ କରିଥିବା ଜଣାପଡ଼ିଛି । ଘଟଣା ଅତି ସ୍ପର୍ଶକତାର ହୋଇଥିବାବେଳେ ପୁଲିସ ଏହାକୁ ଚପାଇବାକୁ ଉଦ୍ୟମ କରିଥିଲା ।ଶେଷରେ ଡିଆଇଜିଙ୍କ ହସ୍ତକ୍ଷେପ ପରେ ସବୁକିଛି ପଦାକୁ ଆସିଛି । ଏସ୍ପି ମାଡ଼କର ସନ୍ଦୀପ ସମ୍ପତ କହିଛନ୍ତି, ତଦନ୍ତ ଚାଲିଛି । ଅପରାଧୀଙ୍କୁ ତୁରନ୍ତ ଧରାଯିବ । ସାବରଙ୍ଗ ଥାନା ଆଇଆଇସି ଉମାଶଙ୍କର ନାୟକ କହିଛନ୍ତି, ଏବେ ଅପହୃତ ପୁଲିସ୍ ଏସକର୍ଟରେ ଚିକିତ୍ସିତ ହେଉଛନ୍ତି । ଅଭିଯୁକ୍ତଙ୍କୁ ଧରିବାକୁ ପୁଲିସ୍ ଅପରେସନ୍ ଆରମ୍ଭ କରିଛି ।
ଭଦ୍ରକ ଜିଲ୍ଲାରେ ଦିନକୁ ଦିନ କୋଇଲା ମାଫିଆଙ୍କ ଆତଙ୍କ ବଢ଼ି ଚାଲିଛି । ଅନେକ ସମୟରେ ମାଫିଆଙ୍କ ଶିକାର ହେଉଛନ୍ତି ସାଧାରଣ ଲୋକେ । କେତେବେଳେ କାହାକୁ ହାଣୁଛନ୍ତି, ତ ଆଉ କେତେବେଳେ ଗାଡ଼ି ଚଢ଼ାଇ ମାରୁଥିବା ଅଭିଯୋଗ ହେଉଛି । ଏହି କଳା କାରବାରରେ କୋଟି କୋଟି ରୋଜଗାର ହେଉଥିବା ବେଳେ ନେତା, ପୁଲିସ୍ ମଧ୍ୟ ଏଥିରେ ଭାଗ ପାଉଥିବା ଚର୍ଚ୍ଚା ହେଉଛି । ଫଳରେ ଏମାନଙ୍କ ଦୌରାତ୍ମ୍ୟ ବିରୋଧରେ ଆଖିଦୃଶିଆ କାର୍ଯ୍ୟାନୁଷ୍ଠାନ ନିଆଯାଉ ନ ଥିବା ମଧ୍ୟ ଅଭିଯୋଗ ହେଉଛି
