ନୂଆଦିଲ୍ଲୀ ୦୬/୦୧: ଜମ୍ମୁ-କାଶ୍ମୀର ଏବଂ ହିମାଚଳ ପ୍ରଦେଶରେ ବରଫପାତ ଯୋଗୁ ପୂର୍ବ ଭାରତରେ ପ୍ରବଳ ଥଣ୍ଡା ଅନୁଭୂତ ହେଉଛି । ପ୍ରବଳ ଶୀତ ଯୋଗୁ ଗତ ୨୪ ଘଣ୍ଟାରେ ଉତ୍ତରପ୍ରଦେଶରେ ୮ ଏବଂ ବିହାରରେ ୨ ଜଣଙ୍କ ମୃତ୍ୟୁ ଘଟିଛି । ଅରୁଣାଚଳ ପ୍ରଦେଶର ସେଲା ହ୍ରଦର ଏକ ଭିଡିଓ ସାମ୍ନାକୁ ଆସିଛି । ବରଫ ପାଲଟିଥିବା ହ୍ରଦରେ ଚାଲୁଥିବାବେଳେ ଏହା ଧସିଯିବା ଯୋଗୁ ୪ ପର୍ଯ୍ୟଟକ ସେଠାରେ ଫସି ଯାଇଥିଲେ । ପରେ ସେମାନଙ୍କୁ ଉଦ୍ଧାର କରାଯାଇଥିଲା । ଦେଶର ୧୪ ରାଜ୍ୟରେ ଘନ କୁହୁଡ଼ି ଜାରିରହିଛି । ଦୃଶ୍ୟତା କମିବା ଯୋଗୁ ଦିଲ୍ଲୀରେ ରବିବାର ୧୬୦ ବିମାନ ଉଡ଼ାଣ ବିଳମ୍ବ ହୋଇଛି । ୭ ବିମାନର ଉଡ଼ାଣ ବାତିଲ କରାଯାଇଥିଲା ।
ସେହିପରି ୬୦ରୁ ଊଦ୍ଧ୍ୱର୍ ଟ୍ରେନ୍ ମଧ୍ୟ ବିଳମ୍ବ ହୋଇଛି । କୁହୁଡ଼ି ଯୋଗୁ ଦିଲ୍ଲୀରେ ୩ ଦିନରେ ୯୦୦ ବିମାନ ଉଡ଼ାଣ ପ୍ରଭାବିତ ହୋଇଛି । ଅନ୍ୟପକ୍ଷରେ କାଶ୍ମୀର ଏବଂ ଚିନାବ ଉପତ୍ୟାକାରେ ପ୍ରବଳ ବରଫପାତର ଅନୁମାନ କରିଛି ପାଣିପାଗ ବିଭାଗ । ହିମାଚଳ ପ୍ରଦେଶର ୭ ଜିଲ୍ଲାରେ ମଧ୍ୟ ବରଫପାତର ପୂର୍ବାନୁମାନ କରାଯାଇଛି । କାଶ୍ମୀରରେ ଶୋପିଆନ୍ ଜିଲ୍ଲାର ହିରପୋରା ଗ୍ରାମ ସବୁଠୁ ଥଣ୍ଡା ଅଞ୍ଚଳ ହୋଇଛି । ଏଠାରେ ପ୍ରାୟ ୨ ଫୁଟର ବରଫ ଜମିଛି । ଦିନବେଳା ଏଠାରେ ତାପମାତ୍ରା ବିଯୁକ୍ତ ୧୩ ଡିଗ୍ରୀକୁ ଖସୁଥିବାବେଳେ ରାତି ତାପମାତ୍ରା ବିଯୁକ୍ତ ୨୦ ଡିଗ୍ରୀ ପର୍ଯ୍ୟନ୍ତ ହ୍ରାସ ପାଉଛି । ରାସ୍ତାଘାଟ ବରଫରେ ଆଚ୍ଛାଦିତ ହୋଇଛି ।
