ନୂଆଦିଲ୍ଲୀ: କଲମ୍ବିଆର ରାଷ୍ଟ୍ରପତି ପ୍ରାର୍ଥୀ ମିଗୁଏଲ ଉରିବେଙ୍କ ମୃତ୍ୟୁ । ଜୁନ୍ ୭ରେ ନିର୍ବାଚନୀ ପ୍ରଚାର ସମୟରେ ଉରିବେଙ୍କ ଉପରେ ଗୁଳି ମାଡ଼ ହୋଇଥିଲା । ଦୁଇଟି ଗୁଳି ତାଙ୍କ ମୁଣ୍ଡରେ ବାଜିଥିଲା। ୩୯ ବର୍ଷୀୟ ଉରିବେ ଗତ ବର୍ଷ ଅକ୍ଟୋବରରେ ଘୋଷଣା କରିଥିଲେ ଯେ, ସେ ୨୦୨୬ ରାଷ୍ଟ୍ରପତି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ । ଉରିବେଙ୍କ ପତ୍ନୀ ମାରିଆ କ୍ଲାଉଡିଆ ଟାରାଜୋନା ସୋସିଆଲ ମିଡିଆରେ ଲେଖିଛନ୍ତି, ‘ମୁଁ ଈଶ୍ୱରଙ୍କୁ ପ୍ରାର୍ଥନା କରୁଛି ମୋତେ ତୁମ ବିନା ବଞ୍ଚିବାର ରାସ୍ତା ଦେଖାନ୍ତୁ।’
ରଏଟର୍ସ ଅନୁଯାୟୀ, କଲମ୍ବିଆ ପୁଲିସ ଜୁଲାଇରେ ଏହି ମାମଲାରେ ପାଞ୍ଚ ଜଣ ସନ୍ଦିଗ୍ଧଙ୍କୁ ଗିରଫ କରିଥିଲା । ସେମାନଙ୍କ ମଧ୍ୟରେ ଜଣେ ୧୫ ବର୍ଷୀୟ ନାବାଳକ ଥିଲା । ଦି ଗାର୍ଡିଆନରେ ପ୍ରକାଶିତ ଖବର ଅନୁସାରେ, ଉରିବେଙ୍କ ପ୍ରଥମ ପର୍ଯ୍ୟାୟ ଅସ୍ତ୍ରୋପଚାର ସମାପ୍ତ ହୋଇଥିଲେ ବି ତାଙ୍କର ଅବସ୍ଥା ସଙ୍କଟାପନ୍ନ ଥିଲା ।
୨୦୨୬ରେ କଲମ୍ବିଆରେ ରାଷ୍ଟ୍ରପତି ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ମିଗୁଏଲ ଉରିବେଙ୍କୁ ରାଷ୍ଟ୍ରପତି ପଦ ପାଇଁ ଜଣେ ପ୍ରମୁଖ ଦାବିଦାର ଭାବରେ ବିବେଚନା କରାଯାଉଥିଲା । ୩୯ ବର୍ଷୀୟ ଉରିବେ ବିରୋଧୀ ସେଣ୍ଟ୍ରୋ ଡେମୋକ୍ରାଟିକୋ କଞ୍ଜରଭେଟିଭ ପାର୍ଟିର ସଦସ୍ୟ ଥିଲେ। ଉରିବେ ହେଉଛନ୍ତି କଲମ୍ବିଆର ପ୍ରସିଦ୍ଧ ସାମ୍ବାଦିକା ଡାଏନା ଟର୍ବେଙ୍କ ପୁଅ । ଡାଏନାଙ୍କୁ ୧୯୯୧ ମସିହାରେ ବୋଗୋଟାରେ ଡ୍ରଗ୍ ମାଫିଆ ପାବ୍ଲୋ ଏସ୍କୋବାରଙ୍କ ମେଡେଲିନ୍ କାର୍ଟେଲ୍ ଅପହରଣ କରିଥିଲା । ସେମାନଙ୍କ କବଳରୁ ଉଦ୍ଧାର କରିବା ବେଳେ ତାଙ୍କର ମୃତ୍ୟୁ ହୋଇଥିଲା । ଡାଏନା ସେ ସମୟର ଜଣେ ବଡ଼ ସାମ୍ବାଦିକ ଥିଲେ । ଯିଏ ନିରନ୍ତର ଡ୍ରଗ୍ସ ଚାଲାଣ ଏବଂ ସଂଗଠିତ ଅପରାଧ ବିରୋଧରେ ଲେଖୁଥିଲେ ।
ମିଗୁଏଲ ଉରିବେ ପିଲାଦିନରୁ ରାଜନୀତି ସହ ଜଡିତ। ସେ ପୂର୍ବତନ ରାଷ୍ଟ୍ରପତି ଜୁଲିଓ ସେସାର ଟର୍ବେଙ୍କ ନାତି । ଜୁଲିଓ ସେସାର ଟର୍ବେ ୧୯୭୮ ରୁ ୧୯୮୨ ପର୍ଯ୍ୟନ୍ତ କଲମ୍ବିଆର ୨୫ତମ ରାଷ୍ଟ୍ରପତି ଥିଲେ । ସେ କଲମ୍ବିଆନ ଲିବରାଲ ପାର୍ଟିର ଜଣେ ପ୍ରମୁଖ ନେତା ଥିଲେ। ତାଙ୍କର ରାଜନୈତିକ ବିଚାରଧାରା ଉଦାରବାଦୀ ଥିଲା ଏବଂ ସେ ସାମାଜିକ ସଂସ୍କାର ସପକ୍ଷରେ ଥିଲେ । କିନ୍ତୁ ତାଙ୍କର ରକ୍ଷଣଶୀଳ ନୀତି ତାଙ୍କୁ ବିବାଦୀୟ କରିଥିଲା ।
