ଭୁବନେଶ୍ୱର,୨୩/୦୨: କିଛି ବର୍ଷ ହୋଇଯିବ ବଜାରରେ ଦେଖିବାକୁ ମିଳୁଛି ରଙ୍ଗୀନ୍ କେବି । ଏଥିରେ କୌଣସି ରାସାୟନିକ ରଙ୍ଗ ପ୍ରଲେପ ହୋଇନି । ବରଂ ଏହା ପ୍ରାକୃତିକ ଭାବେ ରଙ୍ଗୀନ୍ । ଚାଷ ପଦ୍ଧତିରେ ଉନ୍ନତି କାରଣରୁ ଏହିଭଳି କୋବିର ପସରା ରାଜଧାନୀରେ ଦେଖିବାକୁ ମିଳୁଛି । ଯାହାକୁ କିଣିବା ପାଇଁ ଲୋକମାନଙ୍କ ଭିତରେ ବେଶ୍ ଉତ୍ସୁକତା ଦେଖାଯାଉଛି ।
ପୂର୍ବରୁ ଏହି ରଙ୍ଗୀନ୍ କୋବି ବାହାର ରାଜ୍ୟରୁ ଆସୁଥିଲା । ହେଲେ ବର୍ତ୍ତମାନ ଭୁବନେଶ୍ୱର ଉପକଣ୍ଠ ବାରଙ୍ଗରେ କିଛି ଚାଷୀ ଏହାକୁ ନିଜ କ୍ଷେତରେ ଚାଷ କରୁଛନ୍ତି । ସାଧାରଣ ଧଳା କୋବିଠାରୁ ଏହାର ମୂଲ୍ୟ ଅଧିକ ରହୁଛି । ମୁଖ୍ୟତଃ ହଳଦିଆ କୋବି ଗୋଟାକୁ ୮୦ ଟଙ୍କା, ପିଆଜ ରଙ୍ଗର କୋବି ମୂଲ୍ୟ ୯୦ଟଙ୍କା, ବ୍ରୋକଲି ୫୦, ବାଇଗଣି ରଙ୍ଗର ବନ୍ଧାକୋବି ୭୦ ଟଙ୍କା, ଲୋଟସ୍ ୮୦ ଟଙ୍କା ରହୁଛି । ବିଶେଷକରି ରେସ୍ତୋରାଁଗୁଡ଼ିକରେ ଏହାର ଚାହିଦା ବେଶ୍ ଅଧିକ । ପ୍ରଦର୍ଶନୀ ପଡ଼ିଆ ଯିବା ରାସ୍ତାରେ ରଙ୍ଗିନ୍ କୋବି ବିକ୍ରି କରୁଥିବା ଦିଲୀପ ବେହେରା କୁହନ୍ତି, ଏହି କୋବିର ବେଶ୍ ଚାହିଦା ରହିଛି । ହେଲେ କିଛି ଲୋକ ଭାବୁଛନ୍ତି ଏଥିରେ ଆମେ ରଙ୍ଗ ଲଗାଇଦେଉଛୁ । ସେଥିପାଇଁ ହାତ ମାରି ପରୀକ୍ଷା କରୁଛନ୍ତି । ହେଲେ ଏହାର ମହତ୍ତ୍ୱ ଜାଣିଥିବା ଲୋକ ବିନା ମୂଲଚାଲରେ କିଣିକରି ନେଇଯାଆନ୍ତି । ମୁଁ ଏହି କୋବି ବାରଙ୍ଗର ଚାଷୀମାନଙ୍କଠାରୁ ଆଣୁଛି ।
ଏହି କୋବି ଚାଷ କରୁଥିବା ଚାଷୀଙ୍କ କହିବା କଥା, ଧଳା କୋବି ତୁଳନାରେ ରଙ୍ଗୀନ୍ କୋବିର ଯତ୍ନ ଟିକେ ଅଧିକ । ଏହି କୋବି ଅଧିକ ମିଠା ହୋଇଥିବାରୁ ଏଥିରେ ବହୁତ ଶୀଘ୍ର ପୋକ ଲାଗେ । ସେଥିପାଇଁ ପ୍ରତି ୨ଦିନରେ ଥରେ ଔଷଧ ଦେବାକୁ ପଡ଼ିଥାଏ । ୧୦ ଗ୍ରାମ ଧଳା କୋବି ମଞ୍ଜିର ମୂଲ୍ୟ ୪୦୦ ଟଙ୍କାରୁ ଆରମ୍ଭ ହେଉଥିବା ବେଳେ ରଙ୍ଗୀନ୍ କୋବି ମଞ୍ଜିର ମୂଲ୍ୟ ମଧ୍ୟ ସମାନ । ହେଲେ ଏହାର ଯତ୍ନ ଓ ଔଷଧରେ ଅଧିକ ଖର୍ଚ୍ଚ ହୋଇଯାଏ । ପ୍ରୟ ୨ ରୁ ୩ ଫୁଟ ଦୂରତା ରଖି ଏହି କୋବିକୁ ଲଗାଯାଇଥାଏ । ଧଳା କୋବି ଫଳିବା ପାଇଁ ୩ ମାସ ସମୟ ଲାଗୁଥିବା ବେଳେ ରଙ୍ଗୀନ୍ ପାଇଁ ଅହୁରି ୨୦ ଦିନ ଅଧିକ ଲାଗିଥାଏ । ଏହି କୋବି ମୁଖ୍ୟତଃ ବାୟୋ ଫର୍ଟିଫାଏଡ୍ । ଅର୍ଥାତ୍ ଭିଟାମିନ୍ ଏ ମାତ୍ରା ଏଥିରେ ଅଧିକ ରହିଛି । ଆମକୁ ଆଉ ଭିଟାମିନ୍ ଏ ପାଇଁ ଅଲଗା କିଛି ଖାଇବାର ଆବଶ୍ୟକତା ନାହିଁ ବୋଲି କହିଛନ୍ତି ଡ. ଲିଲିମୋନି ତ୍ରିପାଠୀ ।
