ନୂଆଦିଲ୍ଲୀ ୧୭/୦୪: ୧୦୦ ବର୍ଷ ପରେ ପ୍ରଥମ ଥର ଏକ ବିଶାଳ ସ୍କ୍ୱିଡ୍ ଆବିଷ୍କୃତ ହୋଇଛି । ଦକ୍ଷିଣ ଆଟ୍ଲାଣ୍ଟିକ୍ ମହାସାଗରରେ ସାଉଥ୍ ସାଣ୍ଡୱିଚ୍ ଦ୍ୱୀପ ନିକଟରେ ୬୦୦ ମିଟର (୧,୯୬୮ ଫୁଟ) ଗଭୀରରେ ଏହି ଛୁଆ ସ୍କ୍ୱିଡ୍ କ୍ୟାମେରାରେ ଧରାପଡ଼ିଛି । ଏହାର ଲମ୍ବ ୩୦ ସେମି । ୟୁନିଭର୍ସିଟି ଅଫ୍ ଏସେକ୍ସ ଏକାଡେମିକ୍ ନେତୃତ୍ୱାଧୀନ ବୈଜ୍ଞାନିକଙ୍କର ଏକ ଟିମ୍ ଗତ ମାର୍ଚ୍ଚରେ ନୂଆ ସାମୁଦ୍ରିକ ଜୀବ ଅନ୍ୱେଷଣର ୩୫ ଦିନିଆ ଅଭିଯାନରେ ସ୍କ୍ୱିଡ୍ର ଭିଡିଓ ରେକର୍ଡ କରିଥିଲେ । ବିଶେଷଜ୍ଞଙ୍କ ବିଶ୍ୱାସ, ଏହି ବିଶାଳ ସ୍କ୍ୱିଡ୍ ୭ ମିଟର ଲମ୍ବ ଯାଏ ବଢ଼ିପାରେ ଏବଂ ତା’ର ଓଜନ ୫୦୦ କିଲୋ ହୋଇପାରେ । ସେଥିପାଇଁ ଏହାକୁ ପୃଥିବୀର ସବୁଠୁ ବିଶାଳ ଅମେରୁଦଣ୍ଡୀ ଜୀବ କୁହାଯାଏ ।
ସ୍କମିଡ୍ଟ ଓସନ୍ ଇନ୍ଷ୍ଟିଚ୍ୟୁଟ୍ର ଫାଲ୍କର ଜାହାଜରେ ସାମୁଦ୍ରିକ ଜୀବ ଅନ୍ୱେଷଣରେ ଥିବା ବୈଜ୍ଞାନିକ ଟିମ୍ ସ୍କ୍ୱିଡ୍ ଚିହ୍ନଟ ଲାଗି ଏକ ରିମୋଟ୍-କଣ୍ଟ୍ରୋଲ ଯାନ ପ୍ରୟୋଗ କରିଥିଲେ । ଅନ୍ୱେଷଣର ମୁଖ୍ୟ ବୈଜ୍ଞାନିକ ମିଶେଲ ଟେଲର କହିଛନ୍ତି, ସ୍କ୍ୱିଡ୍ କ’ଣ ବୈଜ୍ଞାନିମାନେ ପ୍ରଥମେ ଜାଣିନଥିଲେ। କିନ୍ତୁ ଖୁବ୍ ସୁନ୍ଦର ଓ ଅସାଧାରଣ ଦିଶୁଥିବାରୁ ତା’ର ଭିଡିଓ ରେକର୍ଡ କଲେ । ତା’ପରେ ଭିଡିଓକୁ ବୈଜ୍ଞାନିକ କ୍ୟାଟ୍ ବୋଲଷ୍ଟାଡ୍ ଯାଞ୍ଚ୍ କଲେ ଏବଂ କହିଲେ ଯେ ପୂର୍ବରୁ ମୁଖ୍ୟତଃ ତିମି ଓ ସମୁଦ୍ରପକ୍ଷୀଙ୍କ ପେଟରେ ଅବଶେଷ ଭାବେ ସ୍କ୍ୱିଡ୍ଙ୍କୁ ଚିହ୍ନଟ କରାଯାଇଥିଲା । ବିଶାଳ ସ୍କ୍ୱିଡ୍ଙ୍କ ଜୀବନ ଚକ୍ର ବିଷୟରେ ଖୁବ୍ କମ୍ ତଥ୍ୟ ରହିଛି ।
ଏହି ପ୍ରଜାତିର ଏକ ଲୁକ୍କାୟିତ ବୈଶିଷ୍ଟ୍ୟ ହେଉଛି ସେମାନଙ୍କ ୮ଟି ବାହୁର ମଝିରେ ହୁକ ରହିଛି । ମାଛ ଧରାଳିମାନେ ପୂର୍ବରୁ ମୃତ ବୟସ୍କ ସ୍କ୍ୱିଡ୍ଙ୍କ ଭିଡିଓ ରେକର୍ଡ କରିଛନ୍ତି । କିନ୍ତୁ ଏତେ ଗଭୀରରେ ସେମାନଙ୍କୁ କେବେ ଦେଖାଯାଇନାହିଁ । ନାଚୁରାଲ ହିଷ୍ଟ୍ରୀ ମ୍ୟୁଜିୟମ୍ ଅନୁସାରେ, ବିଶ୍ୱରେ ବିଶାଳ ସ୍କ୍ୱିଡ୍ଙ୍କ ସଂଖ୍ୟା ଆକଳନ କରିବା କଷ୍ଟକର । ବୈଜ୍ଞାନିକମାନେ ଗତ ଜାନୁଆରୀରେ ପ୍ରଥମ ଥର ପାଇଁ ଏକ ଗ୍ଲାସିଆଲ୍ ଗ୍ଲାସ୍ ସ୍କ୍ୱିଡ୍କୁ କ୍ୟାମେରାରେ ରେକର୍ଡ କରିଥିବା ସ୍ପଷ୍ଟ କରିଥିଲେ।
