ପୁରୀ, ୩୦/୧୦ : ସରକାରୀ ଛୁଟି ବଢ଼ାଇଲା ଦୀପାବଳି ଦ୍ୱନ୍ଦ୍ୱ । ସରକାରୀ କ୍ୟାଲେଣ୍ଡରରେ ଦୀପାବଳି ଚଳିତ ମାସ ୩୧ ତାରିଖ ବୋଲି ଉଲ୍ଲେଖ କରାଯାଇଛି । ଏହି ଦିନକୁ ଛୁଟି ଘୋଷଣା କରାଯାଇଛି । ମାତ୍ର ଶ୍ରୀମନ୍ଦିରରେ ଦୀପାବଳି ୧ ତାରିଖରେ ପାଳନ ହେବାକୁ ସ୍ଥିର ହୋଇଛି । ଶ୍ରୀମନ୍ଦିର କ୍ୟାଲେଣ୍ଡରରେ ୧ ତାରିଖକୁ ଦୀପାବଳି ଅମାବାସ୍ୟା ବୋଲି ଉଲ୍ଲେଖ କରାଯାଇଛି । ସେହିପରି ପ୍ରାୟ ୨ଟି ପାଞ୍ଜିରେ ଦୀପାବଳି ୩୧ ତାରିଖରେ ପଡ଼ୁଥିବା ଉଲ୍ଲେଖ କରାଯାଇଥିବା ବେଳେ ଅନ୍ୟ ପାଞ୍ଜିମାନଙ୍କରେ ୧ ତାରିଖ ଦିପାବଳୀ ଅମାବାସ୍ୟା ବୋଲି ଉଲ୍ଲେଖ କରାଯାଇଛି ।
ଏନେଇ ପଣ୍ଡିତ ହରିଶଙ୍କର ମିଶ୍ର କହିଛନ୍ତି, ସରକାର ଜାରି କରିଥିବା କ୍ୟାଲେଣ୍ଡରରେ ୩୧ ତାରିଖ ଦୀପାବଳି ଛୁଟି ଘୋଷଣା ସମସ୍ତଙ୍କୁ ଦ୍ୱନ୍ଦ୍ୱରେ ପକାଇଛି । ଏହି କ୍ୟାଲେଣ୍ଡର ପ୍ରକାଶ ଓ ଛୁଟି ଘୋଷଣା ପୂର୍ବରୁ ଶ୍ରୀମନ୍ଦିର ସମ୍ପୃକ୍ତ ଜ୍ୟୋତିର୍ବିଦଙ୍କ ପରାମର୍ଶ ନିଆଯାଇନି । ତିଥି ଅନୁଯାୟୀ ଯେଉଁଦିନ ପ୍ରତ୍ୟୁଷ (ସୂର୍ଯ୍ୟଦୟ) ଠାରୁ ପ୍ରଦୋଷ (ସୂର୍ଯ୍ୟାସ୍ତ) ପର୍ଯ୍ୟନ୍ତ ଆମାବାସ୍ୟା ଥାଏ ସେଦିନ ପୟାଶ୍ରାଦ୍ଧ/ଦୀପଦାନ/ ଦୀପାବଳି ପାଳନ ହୁଏ।
ଚଳିତ ମାସ ୩୧ ତାରିଖ ଦିନ ୩ଟା ୩୦ ଠାରୁ ପରଦିନ ବା ୧ ନଭେମ୍ବର ସନ୍ଧ୍ୟା ୬ଟା ୨୨ ଯାଏ ଅମାବାସ୍ୟା ତିଥି ରହୁଛି । ତେଣୁ ୧ ତାରିଖରେ ଦୀପାବଳି ପାଳନ, ଦୀପଦାନ ଓ ପୟାଶ୍ରାଦ୍ଧ କରାଯିବା ପ୍ରଶସ୍ତ । ଏହିଦିନ ଶ୍ରୀମନ୍ଦିରରେ ଅମାବାସ୍ୟା ନୀତି ଅନୁଯାୟୀ ନାରାୟଣଙ୍କ ସାଗର ବିଜେ ନୀତି ଅନୁଷ୍ଠିତ ହେବ । ମହାକାଳୀ ଅର୍ଦ୍ଧରାତ୍ରିରେ ଆର୍ବିଭୂତା ହୋଇଥିବାରୁ ଏବଂ ଚଳିତ ମାସ ୩୧ ରାତ୍ରି ସାରା ଅମାବାସ୍ୟା ତିଥି ରହିଥିବାରୁ ଏହି ଦିନ କାଳୀପୂଜା ନିମନ୍ତେ ପ୍ରଶସ୍ତ । ଆଲୋଚନରେ ପୂର୍ଣ୍ଣଚ୍ଛେଦ ପକାଇବା ନିମନ୍ତେ ସରକାର ଚଳିତ ମାସ ୩୧ ତାରିଖ ପରିବର୍ତ୍ତେ ଆସନ୍ତା ନଭେମ୍ବର ୧ ତାରିଖକୁ ଦୀପାବଳି ଛୁଟି ଘୋଷଣା କରନ୍ତୁ। ଏହା ଦ୍ୱନ୍ଦ୍ୱର ପରିସମାପ୍ତି ଘଟାଇବ ।
