କଟକ, ୫।୬ : କଟକ ସହରରେ ମହାନଦୀ ୱାଟର ଫ୍ରଣ୍ଟ ଡେଭଲପମେଣ୍ଟ କାର୍ଯ୍ୟ ବିଭିନ୍ନ ପର୍ଯ୍ୟାୟରେ ଆରମ୍ଭ ହେବାକୁ ଯାଉଛି ।ଏହି କାର୍ଯ୍ୟପାଇଁ ସିଡିଏ କର୍ତ୍ତୃପକ୍ଷ ବିଜ୍ଞାପନ ଜରିଆରେ ଟେଣ୍ଡର କରିଛନ୍ତି ।ଅନିୟମିତତା ତଥା ଚଞ୍ଚକତା କରି ସମସ୍ତ ପ୍ରକାର ନୀତିନିୟମ କୁ ଜଳାଞ୍ଜଳି ଦେଇ ଭିଜିଲାନ୍ସରେ ମାମଲା ଥିବା ଏକ କମ୍ପାନୀକୁ ଅନୁକମ୍ପା ଦେଖାଇଛନ୍ତି କାହା ସ୍ୱାର୍ଥରେ ବୋଲି ପ୍ରଶ୍ନ କରିଛି କଂଗ୍ରେସ । ଏହି ପ୍ରସଙ୍ଗରେ କଟକ ଜିଲ୍ଲା କଂଗ୍ରେସର ଉପସଭାପତି ମନୋଜ ବିଶ୍ଵାଳଙ୍କ ନେତୃତ୍ୱରେ ଏକ ସାମ୍ବାଦିକ ସମ୍ମିଳନୀ କଟକ ଲିଙ୍କରୋଡ ଶକ୍ତି ନଗର ସ୍ଥିତ କଂଗ୍ରେସ କାର୍ଯ୍ୟାଳୟରେ ଅନୁଷ୍ଠିତ ହୋଇଯାଇଛି । ଅନ୍ୟମାନଙ୍କ ମଧ୍ୟରେ ଜିଲ୍ଲା କଂଗ୍ରେସର ବରିଷ୍ଠ ଉପସଭାପତି ଶିଶିର ରଥ,କଟକ ନଗର(ଜିଲ୍ଲା)କଂଗ୍ରେସ ର ମୁଖ୍ୟ ମୁଖପାତ୍ର ମାନସ ପରିଡ଼ା,ବରିଷ୍ଠ କଂଗ୍ରେସ ନେତା ରାମ ଚନ୍ଦ୍ର ଗୋଚ୍ଛାୟତ,କଟକ ନଗର ଯୁବ କଂଗ୍ରେସ ସଭାପତି ଡ଼ ବିପ୍ଳବ ଶିଳାଦିତ୍ୟ ଯୋଗଦେଇ ଥିଲେ।
କଂଗ୍ରେସର ଅଭିଯୋଗ ଅନୁସାରେ, ସିଡିଏ ଏହି କାର୍ଯ୍ୟରେ ଗୋଟିଏ କାମକୁ ଦୁଇପ୍ରକାର ବିଜ୍ଞାପନ ବାହାର କରିଛି। ଅଫ ଲାଇନ୍ ରେ ଏକ ପ୍ରକାର ସର୍ତ୍ତାବଳୀ ଥିବାବେଳେ ଅନ ଲାଇନରେ ଆଉ ଏକ ପ୍ରକାର ସର୍ତ୍ତାବଳୀ ରହିଛି ।ଅଫ ଲାଇନ୍ରେ ପ୍ରକଳ୍ପର ମୂଲ୍ୟ ଲେଖାଯାଇଥିବା ବେଳେ ଅନ ଲାଇନରେ ପ୍ରକଳ୍ପ ମୂଲ୍ୟ ଲେଖାଯାଇନାହିଁ । ଅଫ ଲାଇନ୍ ରେ ଟର୍ନ ଓଭର ହଜାରେ କୋଟି ଥିବାବେଳେ ଅନ ଲାଇନ୍ ରେ ୫୦୦କୋଟି ରଖାଯିବାର କାରଣ କଣ ? ଅଫ୍ ଲାଇନ୍ ରେ ପ୍ରେଜେଣ୍ଟେଶନ ମାର୍କ ୩୫ମାର୍କ ଥିବା ବେଳେ ଅନ୍ ଲାଇନ୍ ରେ ଏହା ୪୫ମାର୍କ ରଖାଯାଇଛି କଣ ପାଇଁ ? ସିଡିଏର ଏହି ଟେଣ୍ଡର ପ୍ରକ୍ରିୟାରେ କୌଣସି ତାଳମେଳ ରହିନାହିଁ । ଗୋଟିଏ ଭିଜିଲାନ୍ସରେ ମାମଲା ଥିବା କମ୍ପାନୀକୁ କାମ କଣ ପାଇଁ ଦିଆଗଲା ? ଏହି କମ୍ପାନୀ ନାମରେ ପୂର୍ବରୁ ନିମ୍ନମାନର କାମ ଓ ସରକାରୀ ଅର୍ଥ ତୋଷରପାତ କରିଥିବା ଅଭିଯୋଗରେ ଦୁର୍ନୀତି ନିବାରଣ ବିଭାଗ ପକ୍ଷରୁ କେଶ୍ ରହିଥିବାବେଳେ ସିଡିଏ କର୍ତ୍ତୃପକ୍ଷ କିପରି କାମ ଦେଲେ ବୋଲି କଂଗ୍ରେସ ଅଭିଯୋଗ ଆଣିଛି।
