ନୂଆଦିଲ୍ଲୀ,୪।୩: ରୋହିତ ଶର୍ମାଙ୍କ ବଡି ସେମିଂ ମାମଲାକୁ ନେଇ ଜାରି ରହିଛି ବିବାଦ। ଆପତ୍ତିଜନକ ପୋଷ୍ଟ କରି ବିବାଦର ପରିସରକୁ ଆସିଥିଲେ କଂଗ୍ରେସ ମୁଖପାତ୍ର ଶାମା ମହମ୍ମଦ। ଯଦିଓ ସେ ନିଜର ବିବାଦୀୟ ପୋଷ୍ଟକୁ ସୋସିଆଲ ମିଡିଆରୁ ଡିଲିଟ୍ କରିଛନ୍ତି କିନ୍ତୁ ଏବେବି ପଛକୁ ହଟି ନାହାନ୍ତି। ମଣ୍ଡି ସାଂସଦ କଙ୍ଗନା ରାନାଓ୍ବତଙ୍କ ଏକ ପୁରୁଣା ପୋଷ୍ଟର ସ୍କ୍ରିନ୍ ସଟ୍ ସେୟାର କରି ବିଜେପିକୁ ଘେରିଛନ୍ତି। ଯେଉଁଥିରେ କଙ୍ଗନା ରୋହିତଙ୍କୁ ଲେଖିଛନ୍ତି, ଧୋବି କା କୁତ୍ତା, ନା ଘର କା ନା ଘାଟ କା।
କଂଗ୍ରେସ ମୁଖପାତ୍ର ଶାମା ମହମ୍ମଦ ଏବେ ଆକ୍ରାମକ ମୁଡରେ । ନିଜର ପୋଷ୍ଟକୁ ନେଇ ବିବାଦ ପରେ ଏବେ ବିଜେପିକୁ ଘେରିଛନ୍ତି। ରୋହିତଙ୍କ ବିରୋଧରେ ମଣ୍ଡି ସାଂସଦ କଙ୍ଗନା ରାନାଓ୍ବତ ଲେଖିଥିବା ଏକ ପୁରୁଣା ପୋଷ୍ଟର ସେୟାର କରିଛନ୍ତି ସ୍କ୍ରିନ୍ ସଟ୍। ୨୦୨୧ ରେ କଙ୍ଗନା ଏହି ଟ୍ବିଟ୍ କରିଥିଲେ। ଯେଉଁ ସମୟରେ କଙ୍ଗନା ରାଜନୀତି କିମ୍ବା ବିଜେପିକୁ ଆସିନଥିଲେ। ସେତେବେଳେ କୃଷକ ଆନ୍ଦେଳନକୁ ସମର୍ଥନ କରି ରୋହିତ ଏକ ପୋଷ୍ଟ କରିଥିଲେ। ଯାହାକୁ ବିରୋଧ କରି କଙ୍ଗନା ଲେଖିଥିଲେ ଧୋବି କା କୁତ୍ତା, ନା ଘରକା ନା ଘାଟ୍ କା। ଏବେ କଙ୍ଗନାଙ୍କ ସେହି ପୁରୁଣା ପୋଷ୍ଟକୁ ସେୟାର କରି ବିଜେପିକୁ ଘେରିଛନ୍ତି ଶାମା। ସେ କେନ୍ଦ୍ର କ୍ରୀଡାମନ୍ତ୍ରୀ ମନସୁଖ ମାଣ୍ଡଭିୟଙ୍କୁ ପ୍ରଶ୍ନ ପଚାରିଛନ୍ତି, ଏବେ କଙ୍ଗନାଙ୍କ ବିଷୟରେ କ’ଣ କହିବେ ? ହ୍ୟାଶଟ୍ୟାଗ୍ ଜଷ୍ଟ ଆସ୍କିଙ୍ଗ ବୋଲିଂ ଲେଖିଛନ୍ତି।’ ଏହା ପୂର୍ବରୁ ଶାମା ସୋମବାର ଏକ ପୋଷ୍ଟ କରି ରୋହିତଙ୍କୁ ମୋଟା ଓ ପ୍ରଭାବହୀନ କ୍ୟାପଟେନ୍ ବୋଲି କହିଥିଲେ। ତାଙ୍କର ଏହି ପୋଷ୍ଟକୁ ନେଇ ଆରମ୍ଭ ହୋଇଥିଲା ବିବାଦ। ବିଜେପି ପକ୍ଷରୁ ତାଙ୍କୁ କଡ଼ା ନିନ୍ଦା କରାଯାଇଥିଲା। ଏପରିକି କଂଗ୍ରେସ ପକ୍ଷରୁ ତାଙ୍କୁ ବିରୋଧ କରାଯାଇଥିଲା। ଆଗକୁ ଏଭଳି ବିବାଦୀୟ ମନ୍ତବ୍ୟ ନଦେବାକୁ ଦଳ ପକ୍ଷରୁ ଚେତାବନୀ ଦିଆଯାଇଥିଲା। ଶେଷରେ ଚାରିଆଡୁ ଚାପ ପରେ ଶାମା ନିଜର ପୋଷ୍ଟକୁ ଡିଲିଟ୍ କରିଥିଲେ।
