ନୂଆଦିଲ୍ଲୀ: ଭାରତରେ କୋଭିଡ୍ ମାମଲା ପୁଣି ବୃଦ୍ଧି ପାଇଛି। ଗତ ସପ୍ତାହରେ ସଂକ୍ରମଣ ୫ ଗୁଣ ବୃଦ୍ଧି ପାଇ ୨,୭୧୦ରୁ ଅଧିକ ସକ୍ରିୟ ମାମଲା ରେକର୍ଡ ହୋଇଛି। କେରଳରେ ସର୍ବାଧିକ ୧,୪୦୦ ମାମଲା ଚିହ୍ନଟ ହୋଇଥିବା ବେଳେ ମହାରାଷ୍ଟ୍ରରେ ୪୮୫ ଓ ଦିଲ୍ଲୀରେ ୪୩୬ ମାମଲା ରିପୋର୍ଟ ହୋଇଛି। ଗତ ୨୪ ଘଣ୍ଟାରେ ୩୬୩ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି ଏବଂ ୪ ଜଣଙ୍କର ମୃତ୍ୟୁ ହୋଇଛି।
ଏହି ବୃଦ୍ଧି ପଛରେ ଓମିକ୍ରନ ଭାରିଏଣ୍ଟର ନୂଆ ଉପପ୍ରଜାତି LF.7, NB.1.8.1 ଓ JN.1 ମୁଖ୍ୟ କାରଣ ବୋଲି ବିଶେଷଜ୍ଞମାନେ କହୁଛନ୍ତି। ତେବେ, ଏହି ଉପପ୍ରଜାତିଗୁଡ଼ିକୁ ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ଦ୍ୱାରା ଏପର୍ଯ୍ୟନ୍ତ "ବିପଦଜନକ" ଶ୍ରେଣୀରେ ରଖାଯାଇ ନାହିଁ, ବରଂ "ନିରୀକ୍ଷଣ ଅଧୀନ" ଭାବେ ବିବେଚନା କରାଯାଉଛି। ଅଧିକାଂଶ ମାମଲା ହାଲୁକା ଏବଂ ରୋଗୀମାନେ ଘରୋଇ ଚିକିତ୍ସାରେ ଆରୋଗ୍ୟ ହେଉଛନ୍ତି। ସାଧାରଣ ଲକ୍ଷଣ ମଧ୍ୟରେ ଜ୍ୱର, କାଶ, ଗଳା ଖରାପ ଓ ଥକ୍କା ଲାଗିବା ଆଦି ରହିଛି। ଚାଇନା ଓ ଏସିଆର ଅନେକ ଅଞ୍ଚଳରେ ସଂକ୍ରମଣ କାୟା ବିସ୍ତାର କରିବା ଆରମ୍ଭ କରିଛି।
କେନ୍ଦ୍ରୀୟ ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି ଯେ ସ୍ଥିତି ଉପରେ ନିକଟରୁ ନଜର ରଖାଯାଉଛି ଏବଂ ଏଥିରେ ଆତଙ୍କିତ ହେବାର ଆବଶ୍ୟକତା ନାହିଁ। କେରଳରେ ଅଧିକ ମାମଲା ରିପୋର୍ଟ ହେବାର କାରଣ ସେଠାରେ ଅଧିକ ପରୀକ୍ଷା କରାଯାଉଥିବା ହେତୁ ହୋଇପାରେ ବୋଲି ଜଣାପଡ଼ିଛି। ଅନ୍ୟ ରାଜ୍ୟ ଯେପରି କର୍ଣ୍ଣାଟକରେ ୨୩୮ ଜଣ, ତାମିଲନାଡୁରେ ୧୯୯, ଗୁଜରାଟରେ ୩୨୦ ଓ ପଶ୍ଚିମବଙ୍ଗରେ ୨୮୭ ଗୋଟି ସଂକ୍ରମଣ ରେକର୍ଡ କରାଯାଇଛି।
ଦିଲ୍ଲୀ, ମହାରାଷ୍ଟ୍ର ଓ କର୍ଣ୍ଣାଟକ ଭଳି ରାଜ୍ୟଗୁଡ଼ିକରେ ହସ୍ପିଟାଲଗୁଡ଼ିକୁ ସଜାଗ ରହିବାକୁ ନିର୍ଦ୍ଦେଶ ଦିଆଯାଇଛି। ଅକ୍ସିଜେନ ସିଲିଣ୍ଡର, ଔଷଧ ଓ ଟିକାର ଯଥେଷ୍ଟ ମହଜୁଦ ରଖାଯାଇଛି। ବିଶେଷଜ୍ଞମାନେ ମାସ୍କ ପରିଧାନ, ସାମାଜିକ ଦୂରତା ଓ ସାନିଟାଇଜେସନ୍ ଭଳି ସୁରକ୍ଷା ପଦକ୍ଷେପ ଅବଲମ୍ବନ କରିବାକୁ ପରାମର୍ଶ ଦେଇଛନ୍ତି। ବିଶେଷ କରି ବୟସ୍କ ଓ ବିଭିନ୍ନ ଜଟିଳ ରୋଗରେ ପୀଡ଼ିତ ବ୍ୟକ୍ତିଙ୍କ ପାଇଁ ଏହି ନିୟମ କଡାକଡି ଭାବେ ଅନୁପାଳନ କରିବାକୁ କୁହାଯାଇଛି।
ପଶ୍ଚିମବଙ୍ଗରେ ୧୧୬ ଓ ଉତ୍ତରପ୍ରଦେଶରେ ୧୧୭ଟି ନୂଆ ମାମଲା ରିପୋର୍ଟ ହୋଇଛି। ମିଜୋରାମରେ ମଧ୍ୟ ଗତ ୭ ମାସ ପରେ ଗତକାଲି ଦୁଇଟି ନୂଆ ମାମଲା ଚିହ୍ନଟ ହୋଇଛି। ଓଡ଼ିଶାରେ ମଧ୍ୟ ଜଣେ ବ୍ୟକ୍ତିଙ୍କର କୋଭିଡ୍ ଯୋଗୁ ମୃତ୍ୟୁ ହୋଇଥିବା ଖବର ରହିଛି।
ସ୍ୱାସ୍ଥ୍ୟ ବିଶେଷଜ୍ଞମାନେ ଜନସାଧାରଣଙ୍କୁ ସତର୍କ ରହିବାକୁ ଓ ଟିକାକରଣ ସମ୍ପୂର୍ଣ୍ଣ କରିବାକୁ ଅନୁରୋଧ କରିଛନ୍ତି।
