ଭୁବନେଶ୍ୱର,୧୬/୦୭ : ମହିଳାଙ୍କ ବିରୋଧରେ ଅପରାଧ ବଢ଼ିବାରେ ଲାଗିଛି । ରାଜ୍ୟରେ ପ୍ରତିଦିନ ୮୬ ଜଣ ଶିକାର ହୋଇଥିବା ଏନ୍ସିଆରବି ରିପୋର୍ଟରେ ଉଲ୍ଲେଖ ରହିଛି । ଏନ୍ସିଆରବି ରିପୋର୍ଟ କହୁଛି, ଓଡ଼ିଶାରେ ପ୍ରତି ୧ ଲକ୍ଷ ମହିଳାରେ ୨୨୭ ଜଣ ଅପରାଧର ଶିକାର ହେଉଛନ୍ତି । କେବଳ ଅସଦାଚରଣ ମାମଲାରେ ଦେଶରେ ପ୍ରଥମ ସ୍ଥାନରେ ରହିଛି ଓଡ଼ିଶା । ରାଜ୍ୟରେ ବର୍ଷକରେ ୧୪,୮୯୧ ଜଣ ଅସଦାଚରଣର ଶିକାର ହୋଇଥିଲେ । ସେହିପରି ଦ୍ୱିତୀୟ ସ୍ଥାନରେ ରହିଛି ମହାରାଷ୍ଟ୍ର । ଏଠାରେ ଗତ ବର୍ଷ ୧୦,୫୭୮ ଜଣ ଅସଦାଚରଣର ଶିକାର ହୋଇଛନ୍ତି । ତୃତୀୟ ସ୍ଥାନ ନେଇଛି ଉତ୍ତର ପ୍ରଦେଶ । ଏଠାରେ ୯,୭୦୩ ଜଣ ଶିକାର ହୋଇଛନ୍ତି । ପ୍ରତେକ ଦିନ ଦେଶରେ ୧୧୨୧ ଜଣ ମହିଳା ଅପରାଧର ଶିକାର ହେଉଛନ୍ତି ।
ଗତ ରିପୋର୍ଟ କହୁଛି, ୩୫୬ ଦିନରେ ଆମ ରାଜ୍ୟରେ ୩୧,୩୫୨ ଜଣ ଅପରାଧର ଶିକାର ହୋଇଛନ୍ତି। ଯଦି ଆମ ପଡ଼ୋଶୀ ପଶ୍ଚିମବଙ୍ଗ କଥା ଦେଖିବା ତ’ହେଲେ ୪୮୧.୨ ଲକ୍ଷ ମହିଳା ଅଛନ୍ତି । ପ୍ରତି ଏକ ଲକ୍ଷ ମହିଳାରେ ମାତ୍ର ୭୪ ଜଣ ମହିଳା ଅପରାଧର ଶିକାର ହେଉଛନ୍ତି । ଆନ୍ଧ୍ରରେ ପ୍ରତି ଲକ୍ଷରେ ମାତ୍ର ୬୭ ଜଣ, ବିହାର ଏକ ଲକ୍ଷରେ ମାତ୍ର ୩୦ ଜଣ । ବିହାରରେ ୫୯୩ ଲକ୍ଷ ମହିଳା ବସବାସ କରୁଛନ୍ତି । ମଧ୍ୟପ୍ରଦେଶରେ ପ୍ରତି ୧ ଲକ୍ଷରେ ମାତ୍ର ୭୪ ଜଣ ଅପରାଧର ଶିକାର ହେଉଛନ୍ତି । ଓଡିଶାରେ ମହିଳା ବିରୋଧୀ ଅପରାଧ ମାମଲାରେ ଚାର୍ଜସିଟ୍ ହାର ୮୦.୧% ରହିଥିଲା । ଆସାମରେ ଚାର୍ଜସିଟ୍ ହାର ୫୨.୯% ଥିଲା । ଅପରପକ୍ଷେ, ପଶ୍ଚିମବଙ୍ଗ, ଆନ୍ଧ୍ରପ୍ରଦେଶ, ଗୁଜୁରାଟ ଏବଂ ଛତିଶଗଡ ଭଳି ରାଜ୍ୟ ଯଥାକ୍ରମେ ୯୩.୭%, ୯୩.୫%, ୯୩.୫% ଏବଂ ୮୮.୫ % ଚାର୍ଜସିଟ୍ ଦାଖଲ କରିଛନ୍ତି ।
ଅନ୍ୟପକ୍ଷରେ ଦୁଷ୍କର୍ମ ଓ ଗଣଦୁଷ୍କର୍ମ ପରେ ମହିଳାଙ୍କୁ ହତ୍ୟା କରିବାରେ ଓଡ଼ିଶା ୮ ନମ୍ବର । ଓଡ଼ିଶାରେ ୧୨ଟି ଘଟଣାରେ ୧୨ ଜଣ ମହିଳାଙ୍କ ଜୀବନ ଯାଇଛି । ପ୍ରଥମ ସ୍ଥାନରେ ରହିଛି ଉତ୍ତର ପ୍ରଦେଶ । ଏହି ରାଜ୍ୟରେ ୪୮ଟି ଘଟଣା ଘଟିଛି । ଦ୍ୱିତୀୟ ସ୍ଥାନରେ ଆସାମରେ ୪୬ ଟି, ତୃତୀୟରେ ରହିଛି ମଧ୍ୟପ୍ରଦେଶ ୩୫ ଟି, ଚତୁର୍ଥ ସ୍ଥାନରେ ମହାରାଷ୍ଟ୍ର ୨୩ । ଯୌତୁକ ନିର୍ଯାତନା ବି ହୁ ହୁ ହୋଇ ବଢ଼ିବାରେ ଲାଗିଛି । ୨୦୨୧ରେ ୫୪୮୮ ଜଣ ଯୌତୁକ ନିର୍ଯାତନାର ଶିକାର ହୋଇଥିଲା । ଏହି ଯୌତୁକ ନିର୍ଯାତନା ପାଇଁ ପ୍ରାୟ ୨୯୩ ଜଣ ମହିଳାଙ୍କୁ ହତ୍ୟା କରାଯାଇଛି । ଯୌତୁକ ଜନିତ ହତ୍ୟାରେ ଦେଶରେ ଓଡ଼ିଶା ସପ୍ତମ ସ୍ଥାନରେ ରହିଛି । ଏସିଡ୍ ଆକ୍ରମଣରେ ଓଡ଼ିଶା ତୃତୀୟ ସ୍ଥାନରେ ରହିଛି । ଗତ ରିପୋର୍ଟରେ ଉଲ୍ଲେଖ ଥିଲା ରାଜ୍ୟରେ ୩ ଜଣ ମହିଳା ଏସିଡ୍ ଆକ୍ରମଣରେ ଶିକାର ହୋଇଥିଲେ । ତେବେ ପଶ୍ଚିମବଙ୍ଗ ପ୍ରଥମ ସ୍ଥାନରେ ରହିଛି । ସେଠାରେ ୩୦ ଜଣ ଏସିଡ୍ ଆକ୍ରମଣର ଶିକାର ହୋଇଥିବା ବେଳେ ଦ୍ୱିତୀୟ ସ୍ଥାନରେ ଉତ୍ତରପ୍ରଦେଶ ରହିଛି । ବର୍ଷକରେ ୫୧୭୮ ମହିଳାଙ୍କୁ ଅପହରଣ କରାଯାଇଥିବା ରାଜ୍ୟର ବିଭିନ୍ନ ଥାନାରେ ଅଭିଯୋଗ ହୋଇଥିଲା । ତା’ଛଡା ୨୧୫ ଜଣଙ୍କୁ ଅପହରଣ କରି ବଳପୂର୍ବକ ବିବାହ କରିଥିବା ନେଇ ମାମଲା ରୁଜୁ ହୋଇଥିଲା । ୫୦ ଜଣ ନାବାଳିକା ମଧ୍ୟ ବଳପୂର୍ବକ ବିବାହର ଶିକାର ହୋଇଥିଲେ । ୯୬ ଜଣ ମହିଳାଙ୍କୁ ଚାଲାଣ କରାଯାଇଥିଲା ।
