ନୂଆଦିଲ୍ଲୀ: ଫୁଟବଲ୍ ଜଗତର ଅନ୍ୟତମ ମହାନ ଖେଳାଳି କ୍ରିଷ୍ଟିଆନୋ ରୋନାଲ୍ଡୋ ଆଉ ଏକ ଅନନ୍ୟ ରେକର୍ଡ ନିଜ ନାମରେ କରିଛନ୍ତି। ଏହି ପର୍ତ୍ତୁଗୀଜ୍ ସୁପରଷ୍ଟାର ଏପରି ଏକ ରେକର୍ଡ କରିଛନ୍ତି ଯାହା ଏପର୍ଯ୍ୟନ୍ତ ଅନ୍ୟ କୌଣସି ଖେଳାଳିଙ୍କ ନାମରେ ନଥିଲା। ରୋନାଲ୍ଡୋ ଫୁଟବଲ୍ ଇତିହାସରେ ପ୍ରଥମ ଖେଳାଳି ହୋଇଛନ୍ତି ଯିଏ ଚାରୋଟି ଭିନ୍ନ ଭିନ୍ନ କ୍ଲବ୍ ଏବଂ ତାଙ୍କ ଦେଶ ପାଇଁ ୧୦୦ କିମ୍ବା ତା'ଠାରୁ ଅଧିକ ଗୋଲ ସ୍କୋର କରିଛନ୍ତି। ରୋନାଲ୍ଡୋ ସାଉଦି ସୁପର କପର ଫାଇନାଲରେ ଅଲ୍ ନାସର ପାଇଁ ୧୦୦ ଗୋଲ ସ୍କୋର କରିବାର ମହାନ କୃତିତ୍ୱ ହାସଲ କରିଛନ୍ତି । ତଥାପି ଏହି ଟାଇଟଲ୍ ମ୍ୟାଚରେ ରୋନାଲ୍ଡୋଙ୍କ ଦଳକୁ ଅଲ୍ ଆହଲି ବିପକ୍ଷରେ ଏକ ରୋମାଞ୍ଚକର ମ୍ୟାଚରେ ପେନାଲ୍ଟି ସୁଟଆଉଟରେ ୩-୫ରେ ପରାଜୟର ସମ୍ମୁଖୀନ ହେବାକୁ ପଡିଛି ।
ନିର୍ଦ୍ଧାରିତ ସମୟ ପର୍ଯ୍ୟନ୍ତ ମ୍ୟାଚ୍ ୨-୨ରେ ବରାବର ରହିଥିଲା। ଏହା ପରେ, ମ୍ୟାଚ୍ ପେନାଲ୍ଟି ସୁଟଆଉଟରେ ଯାଇଥିଲା, ଯେଉଁଠାରେ ଅଲ୍ ଆହଲି ସାଉଦି ସୁପର କପ୍ ଟାଇଟଲ୍ ଜିତିଥିଲା। ରୋନାଲ୍ଡୋ ସ୍ପୋର୍ଟିଂ ଲିସବନ ସହିତ ତାଙ୍କର କ୍ୟାରିଅର ଆରମ୍ଭ କରିଥିଲେ । ଯେଉଁଠାରେ ସେ କମ୍ ବୟସରେ ତାଙ୍କର ପ୍ରତିଭା ପ୍ରମାଣ କରିଥିଲେ। ଏହା ପରେ ତାଙ୍କର ଯାତ୍ରା ମାଞ୍ଚେଷ୍ଟର ୟୁନାଇଟେଡ୍, ରିଅଲ୍ ମାଡ୍ରିଡ୍ ଏବଂ ଜୁଭେଣ୍ଟସ୍ ଭଳି ବଡ଼ କ୍ଲବ୍ ଦେଇ ଗତି କରିଥିଲା। ବର୍ତ୍ତମାନ ସେ ସାଉଦି ଆରବର ଅଲ୍ ନାସର କ୍ଲବ୍ ପାଇଁ ଖେଳୁଛନ୍ତି।
ପ୍ରତ୍ୟେକ କ୍ଲବରେ ତାଙ୍କର ପ୍ରଦର୍ଶନ ଏକ ଗୋଲ ମେସିନ୍ ପରି ଥିଲା ଏବଂ ବର୍ତ୍ତମାନ ସେ ଚାରୋଟି କ୍ଲବରେ ୧୦୦ ଗୋଲ ସ୍କୋର କରିବାର ସଫଳତା ହାସଲ କରିଛନ୍ତି। ଅଲ୍ ନାସର ପୂର୍ବରୁ ରୋନାଲ୍ଡୋ ରିଅଲ୍ ମାଡ୍ରିଡ୍ ପାଇଁ ୪୫୦, ମାଞ୍ଚେଷ୍ଟର ୟୁନାଇଟେଡ୍ ପାଇଁ ୧୪୫ ଏବଂ ଜୁଭେଣ୍ଟସ୍ ପାଇଁ ୧୦୧ ଗୋଲ ସ୍କୋର କରିଥିଲେ। ସେ ତାଙ୍କ ଦେଶ ପର୍ତ୍ତୁଗାଲ ପାଇଁ ମଧ୍ୟ ୧୩୮ ଗୋଲ ସ୍କୋର କରିଛନ୍ତି। ସେ ଜଣେ ଫୁଟବଲ୍ ଯିଏ ଏକ ଦେଶ ପାଇଁ ଅନ୍ତର୍ଜାତୀୟ ଫୁଟବଲରେ ସର୍ବାଧିକ ଗୋଲ ସ୍କୋର କରିଛନ୍ତି।
କ୍ରିଷ୍ଟିଆନୋ ରୋନାଲ୍ଡୋଙ୍କ କ୍ୟାରିଅର୍ ୨୦ ବର୍ଷରୁ ଅଧିକ ସମୟ ଧରି ରହିଛି ଏବଂ ଏହି ସମୟ ମଧ୍ୟରେ ସେ ନିଜର ଫିଟନେସ୍, ନିଷ୍ଠା ଏବଂ କଠିନ ପରିଶ୍ରମ ସହିତ ନିଜକୁ ବିଶ୍ୱର ସବୁଠାରୁ ନିର୍ଭରଯୋଗ୍ୟ ଷ୍ଟ୍ରାଇକର ବୋଲି ପ୍ରମାଣିତ କରିଛନ୍ତି। ଯଦିଓ ସେ ବର୍ତ୍ତମାନ ୩୯ ବର୍ଷ ବୟସର, କିନ୍ତୁ ଗୋଲ ସ୍କୋର କରିବାର ତାଙ୍କର ଆଗ୍ରହ ଅନନ୍ୟ ।
