ସୋରଡା, ୧୨।୭ : ଠକେଇ ପାଇଁ ସାଇବର ଠକଙ୍କ ନୂଆ ଉପାୟ। ଲଟେରୀରେ ଭାଗ ନେବା ପାଇଁ ପ୍ରଥମେ ଲୋକମାନଙ୍କ ହ୍ବାଟସଆପକୁ ଦେଉଛନ୍ତି ମେସେଜ। ପରେ ଲଟେରୀ ଜିତିଥିବା ନେଇ ମେସେଜ ଆସିବା ସହ ବ୍ୟାଙ୍କ ଖାତା ନଂ ଓ ପେପର ଓ୍ବାକ ପାଇଁ ୟୁପିଆଇ ମାଧ୍ୟମରେ କିଛି ଟଙ୍କା ଦେବାକୁ ମେସେଜ ଆସୁଛି। ଏହା ସାଇବର ଠକଙ୍କ କାମ ବୋଲି ସନ୍ଦେହ କରାଯାଉଛି। ସୋରଡା ଅଞ୍ଚଳରେ ଏହା ଦେଖିବାକୁ ମିଳିଛି। 

ସାଇବର ଠକମାନେ ଏଣିକି ନୂତନ ଧରଣର ଠକେଇ ଉପାୟ ଅବଲମ୍ବନ କରିବା ସୋରଡାରେ  ଆରମ୍ଭ କରିଛନ୍ତି I ଏଠାକାର  ଲୋକଙ୍କ ମୋବାଇଲଙ୍କୁ ହ୍ବାଟ୍ସଆପରେ ଦୈନିକ ଲଟେରୀ ଉଠାଣ ପାଇଁ ସକାଳୁ ସକାଳୁ ମେସେଜ ଆସୁଛି ।  କେରଳ ଲଟେରୀ ଟିକେଟ କିଣନ୍ତୁ ମାତ୍ର ୫୦ ଟଙ୍କାରେ I ୧୦୦ ଟି ଅଲଗା ଅଲଗା ନମ୍ବର ଲେଖା ଥିବା ଗୋଟେ ପେପର ସିଟ ଆସୁଛି I ସେଥିରୁ ଗୋଟିଏ ନମ୍ବର ବାଛି ପଠେଇବାକୁ କୁହାଯାଉଛି I ୟୁପିଆଇରେ ୫୦ ଟଙ୍କା ପଠାନ୍ତୁ I ଲଟେରୀ ଅପରାହ୍ନ ୩ ଟାରେ ଉଠାଣ ହେବ ବୋଲି ସୂଚନା ଆସୁଛି I 

ପୁଣି ଅପରାହ୍ନ ୩ ଟାରେ ବିଜେତା ଲିଷ୍ଟ ଆସୁଛି ଓ ସେଥିରେ ୫ ଲକ୍ଷ ଜିତିଥିବା ସୂଚନା ଆସୁଛି I ତା’ପରେ ଅସଲି ଖେଳ ଆରମ୍ଭ ହେଉଛି I ଆପଣ ବ୍ୟାଙ୍କ ନମ୍ବର ପଠାନ୍ତୁ, ପେପର ୱାର୍କ ପାଇଁ ୟୁପିଆଇରେ ୨୯୦୦ ଟଙ୍କା ପଠାନ୍ତୁ। ୨ ମିନଟରେ ଟଙ୍କା ପହଞ୍ଚିଯିବ ବୋଲି କୁହାଯାଉଛି I ତେବେ ଏହା ସମ୍ପୂର୍ଣ୍ଣ ସାଇବର ଠକଙ୍କ କାମ  ବୋଲି ସନ୍ଦେହ କରାଯାଉଛି l ଜନସାଧାରଣ ସାଇବର ଠକେଇକୁ ନେଇ ଏଣିକି ସାବଧାନ ଅବଲମ୍ବନ କରୁଥିବାରୁ  ଠକ ମାନେ ଏପରି ଏକ ନୂତନ ଉପାୟ ଆରମ୍ଭ କରିଥିବା ସନ୍ଦେହ କରାଯାଉଛି।