ଭୁବନେଶ୍ୱର,୧୮/୧୦: ଅକ୍ଟୋବର ମାସ ଆସିଲେ ବାତ୍ୟା ଡର ମାଡ଼ି ଆସେ ଓଡ଼ିଶାକୁ । ୧୯୯୯ ମହାବାତ୍ୟାରୁ ନେଇ ପରବର୍ତ୍ତୀ ସମୟରେ ଫାଇଲିନ୍, ହୁଡ୍ହୁଡ୍ ଓ ତିତ୍ଲି ବାତ୍ୟାର ପ୍ରକୋପ ସହିଛି ଓଡ଼ିଶା । ଏଥର ପୁଣି ଅକ୍ଟୋବରରେ ଓଡ଼ିଶା ମୁହାଁ ଆଉ ଏକ ବାତ୍ୟା ଆସିବାର ଆଶଙ୍କା ଦେଖା ଦେଇଛି ।
୧୯୯୯ ଅକ୍ଟୋବର ୨୯ରେ ପ୍ରଳୟଙ୍କରୀ ମହାବାତ୍ୟା ମାଡ଼ ହେଲା ପାରାଦୀପ ଉପକୂଳରେ । ପବନ ବେଗ ୨୬୦ କିଲୋମିଟରୁ ଅଧିକ ଥିଲା । ସମଗ୍ର ଉପକୂଳ ଓଡ଼ିଶା ଧ୍ୱଂସ ସ୍ତୁପ ପାଲଟି ଯାଇଥିଲା । ୨୪ ଘଣ୍ଟାରୁ ଅଧିକ ସମୟ ଧରି ମହାବାତ୍ୟା ଦେଖାଇଥିଲା ଭୟଙ୍କର ପ୍ରକୋପ । ଜଗତସିଂହପୁର, କେନ୍ଦ୍ରାପଡ଼ା, କଟକରେ କ୍ଷୟକ୍ଷତି ଥିଲା ଅତି ଭୟଙ୍କର । ଜଗତସିଂହପୁର ସମୁଦ୍ର ତଟ ଅଞ୍ଚଳରେ ହଜାର ହଜାର ମୃତଦେହ ଏଠି ସେଠି ପଡ଼ିଥିଲା । ସରକାରୀ ହିସାବରେ ମୃତ୍ୟୁ ସଂଖ୍ୟା ୧୦ ହଜାର ଥିଲା । ସେଇ ବର୍ଷଠାରୁ ଅକ୍ଟୋବର ଆସିଲେ ବାତ୍ୟା ମନେ ପଡ଼ିଯାଏ ।
ପରବର୍ତ୍ତୀ ସମୟରେ ୨୦୧୩ ଅକ୍ଟୋବର ୧୨ରେ ଗୋପାଳପୁର ପାଖରେ ମାଡ଼ ହୋଇଥିଲା ଅତି ଭୀଷଣ ବାତ୍ୟା ‘ଫାଇଲିନ୍’ । ପବନ ବେଗ ୧୮୫ କିମି ଛୁଇଁଥିଲା ଗୋପାଳପୁରରେ । ବ୍ୟାପକ କ୍ଷୟକ୍ଷତି ହୋଇଥିଲା ଦକ୍ଷିଣ ଉପକୂଳ ଓଡ଼ିଶାରେ। ଏହା ପ୍ରଭାବରେ ଲଗାଣ ବର୍ଷା ଆଣିଥିଲା ବାଲେଶ୍ୱରରେ ପ୍ରଳୟଙ୍କରୀ ବନ୍ୟା । ତା’ ପରବର୍ଷ ୨୦୧୪ ଅକ୍ଟୋବର ୧୨ରେ ବାତ୍ୟା ହୁଡ୍ହୁଡ୍ ମାଡ଼ ହେଲା ଦକ୍ଷିଣ ଓଡ଼ିଶା ପାଖ ଆନ୍ଧ୍ରର ବିଶାଖାପାଟଣାରେ । ଏହାର ବେଶ୍ ପ୍ରଭାବ ପଡ଼ିଥିଲା ଓଡ଼ିଶାରେ । ୨୦୧୮ ଅକ୍ଟୋବରରେ ଆସିଥିଲା ତିତ୍ଲି ବାତ୍ୟା । ଓଡ଼ିଶାରେ ସିଧା ମାଡ଼ ହୋଇନଥିଲା । ଆନ୍ଧ୍ରରେ ସ୍ଥଳଭାଗ ଛୁଇଁ ଓଡ଼ିଶାରେ ଆତଙ୍କ ଖେଳାଇଥିଲା । ଗଜପତି ଜିଲ୍ଲାରେ ଏଭଳି ଲଗାଣ ବର୍ଷା ହେଲା ଯେ ଭୂସ୍ଖଳନରେ ଅନେକ ଜୀବନ ଚାଲିଗଲା । ଏବେ ପୁଣି ଅକ୍ଟୋବରରେ ବାତ୍ୟା ସମ୍ଭାବନା ଖବର ଉପକୂଳ ଓଡ଼ିଶାରେ ଡର ବଢ଼ାଇଲାଣି ।
