ଆଠମଲ୍ଲିକ, ୨୯/୦୮ : ଋଣ ଟଙ୍କା ସୁଝି ପାରିଲେନି ବୋଲି ସର୍ବସମ୍ମୁଖରେ ଦଳିତ ମହିଳାଙ୍କୁ ଅକଥନୀୟ ନିର୍ଯାତନା। କଙ୍ଗାରୁ କୋର୍ଟରେ ଦଣ୍ଡ। ମୁହଁରେ କାଳି ଓ ବେକରେ ଚପଲମାଳ ପକାଇ ଗାଁ ଦାଣ୍ଡରେ ବୁଲାଇଲେ ମହିଳା। ଅନୁଗୁଳ ଜିଲ୍ଲା କିଶୋରନଗର ହଣ୍ଡପା ଥାନା ନାକଚି ପଞ୍ଚାୟତ କଣ୍ଡାହାଳ ଗ୍ରାମରେ ଏଭଳି ଅଭାବନୀୟ ଘଟଣା ଘଟିଛି। ଏହି ଘଟଣା ବେଳର ଭିଡିଓ ଏବେ ସୋସିଆଲ୍ ମିଡିଆରେ ଭାଇରାଲ୍ ହେଉଛି। ଏନେଇ ପୀଡ଼ିତା ଅଭିଯୋଗ କରିଥିଲେ ସୁଦ୍ଧା ପୁଲିସ କାର୍ଯ୍ୟାନୁଷ୍ଠାନ ଗ୍ରହଣ କରୁନି।
ସୂଚନାନୁଯାୟୀ, ହଣ୍ଡପା ଥାନା କଣ୍ଡାହାଳ ଗାଁର ଜଣେ ଦଳିତ ମହିଳା ଗାଁ କମିଟିରୁ ୨ ହଜାର ଟଙ୍କା ଋଣ ନେଇଥିଲେ। ଋଣ ସୁଝି ନପାରିବାରୁ କମିଟିର ମହିଳାମାନେ ତାଙ୍କୁ କଙ୍ଗାରୁ କୋର୍ଟରେ ଦଣ୍ଡିତ କରିଥିଲେ। ମୁହଁରେ କାଳି ଓ ବେକରେ ଚପଲମାଳ ପକାଇ ଗାଁ ଦାଣ୍ଡରେ ବୁଲାଇଥିଲେ। ଏନେଇ ପୀଡ଼ିତା ଗତ ୧୪ ତାରିଖରେ ହଣ୍ଡପା ଥାନାରେ ଏତଲା ଦେଇଥିଲେ। ମାତ୍ର ଘଟଣାକୁ ସ୍ଥାନୀୟ ପୁଲିସ, ପ୍ରଶାସନ, ଗାଁ କମିଟି ମିଶି ଚାପି ଦେଇଛନ୍ତି। ପୀଡ଼ିତା ମଧ୍ୟ ଏବେ ଗାଁରେ ନାହାଁନ୍ତି। ତାଙ୍କ ଉପରେ ଚାପ ପଡ଼ିଥିବା ଚର୍ଚ୍ଚା ହେଉଛି। ଏହି ଘଟଣା ବେଳର ଭିଡିଓ ଏବେ ସୋସିଆଲ୍ ମିଡିଆରେ ଭାଇରାଲ୍ ହେବା ପରେ ଘଟଣା ବିଷୟରେ ଜଣାପଡ଼ିଛି। ଏନେଇ କାର୍ଯ୍ୟାନୁଷ୍ଠାନ ଦାବି କରାଯାଇଛି।
