ଦାରିଙ୍ଗବାଡି,୧୩/୨(ଆପ୍ର): ଲୋକଙ୍କ ସୁରକ୍ଷା ପାଇଁ ସରକାର ସଡ଼କ ସୁରକ୍ଷା ଆଇନ ମାଧ୍ୟମରେ ଆଇନ ଉଲ୍ଲଂଘନକାରିଙ୍କ ଠାରୁ ମୋଟା ଅଙ୍କର ଜରିମାନା ଆଦାୟ କରୁଛନ୍ତି । ଅନ୍ୟ ପଟେ ରାସ୍ତା ଖାଲ ଖମା ଥିବା ଯୋଗୁଁ ରାସ୍ତାରେ ଦୁର୍ଘଟଣା ହୋଇ ଅନେକ ଲୋକ ଗୁରୁତର ଆହତ ହେଉଛନ୍ତି। ଲୋକଙ୍କ ସୁରକ୍ଷାକୁ ଦୃଷ୍ଟି ଆଗରେ ରଖି ରାସ୍ତାର ମରାମତି କରୁ ନାହିଁ ପ୍ରଶାସନ । ବର୍ଷ ବର୍ଷ ଧରି ରାସ୍ତା ମରାମତି ନହୋଇ ପଡ଼ି ରହୁଛି । ରାସ୍ତା ସାରା ଖାଲ ଖମାରେ ଭର୍ତ୍ତି ହୋଇ ରହିଥିବା ବେଳେ ମେଟାଲ ବାହାରି ରହିଛି । ଦନେକବାଡ଼ି-ସିର୍କାବର୍ଗ ଗ୍ରାମ୍ୟ ଉନ୍ନୟନ ବିଭାଗ ରାସ୍ତା ଏଭଳି ହୋଇଛି। ମରାମତି ଅଭାବରୁ ଏହା ଶୋଚନୀୟ ହୋଇପଡିଛି।
ଏହି ରାସ୍ତା ଉପରେ ସିର୍କାବର୍ଗ ପଞ୍ଚାୟତ ସମେତ କୋଟଗୋଡ଼ ବ୍ଲକର ଅନେକ ପଞ୍ଚାୟତ ନିର୍ଭର କରିଥାନ୍ତି। ୩ ବର୍ଷ ହେବ ରାସ୍ତା ଅବସ୍ଥା ଠିକ୍ ନାହିଁ । ଫଳରେ ଯାତାୟାତ ସମୟରେ ଅନେକ ଦୁର୍ଘଟଣା ଘଟୁଥିବା ଦେଖିବାକୁ ମିଳିଛି । ଉକ୍ତ ରାସ୍ତାର ରକ୍ଷଣାବେକ୍ଷଣା ପାଇଁ ଅନୁଦାନ ରହିଥିଲେ ସୁଦ୍ଧା ଆଜି ପର୍ଯ୍ୟନ୍ତ ତାହା ଖର୍ଚ୍ଚ ହୋଇ ପାରୁନଥିବା ବେଳେ ଠିକାଦାର ଜଣଙ୍କ ମନମାନି କରୁଛନ୍ତି । ଉକ୍ତ ରାସ୍ତାର ମରାମତି ନିମନ୍ତେ ସିର୍କାବର୍ଗ ସରପଞ୍ଚ ଚିରଞ୍ଜିବୀ ପ୍ରଧାନ ଓ ସମିତି ସଭ୍ୟ ଶ୍ୟାମଘନ ପ୍ରଧାନ ୮ ରୁ ୧୦ ଥର ଜିଲ୍ଲାପାଳ ଙ୍କ ଅଭିଯୋଗ ଶୁଣାଣି ରେ ଅଭିଯୋଗ କରିଥିବା ବେଳେ ମୁଖ୍ୟମନ୍ତ୍ରୀ ଅଭିଯୋଗ ପ୍ରକୋଷ୍ଠ ରେ ଅନଲାଇନ ମାଧ୍ୟମରେ ଏକାଧିକ ଥର ମଧ୍ୟ ଅଭିଯୋଗ କରିଛନ୍ତି । ହେଲେ ଆଜି ପର୍ଯ୍ୟନ୍ତ ରାସ୍ତା କାମ ହୋଇ ପାରୁ ନଥିବା ବେଳେ ଗ୍ରାମ୍ୟ ଉନ୍ନୟନ ବିଭାଗ ହାତ ଟେକି ଦେଇଛି । ବିଭାଗ ପକ୍ଷରୁ ତତ୍ପରତା ପ୍ରକାଶ ପାଉ ନଥିବା ବେଳେ ପ୍ରତ୍ୟେକ ଦିନ ଉକ୍ତ ରାସ୍ତାରେ ଦୁର୍ଘଟଣା ଘଟି ଲୋକେ ଆହତ ହେଉଛନ୍ତି । ଏଣୁ ଏଥି ପ୍ରତି ଦୃଷ୍ଟି ଦିଆ ଯାଇ ରାସ୍ତା ଶୀଘ୍ର ମରାମତି କରିବା ପାଇଁ ଅଞ୍ଚଳବାସୀ ଦାବି କରିଛନ୍ତି ।
