ଶଗଡ଼ଘାଟ,୧୫/୦୭: ବାଲେଶ୍ୱର ଫକୀର ମୋହନ ସ୍ୱୟଂଶାସିତ ମହାବିଦ୍ୟାଳୟରେ ଛାତ୍ରୀଙ୍କୁ ଅଧ୍ୟାପକଙ୍କ ନିର୍ଯାତନା ଘଟଣା ସାରା ରାଜ୍ୟରେ ଚହଳ ପକାଇଛି । ଏଭଳି ସମୟରେ ବଲାଙ୍ଗିର ଜିଲ୍ଲା ଟିଟିଲାଗଡ଼ ଡିଏଭି କଲେଜରେ ଜଣେ ବିଜ୍ଞାନ ଛାତ୍ରୀଙ୍କୁ ଅଧ୍ୟାପିକା ନିର୍ଯାତନା ଦେଇଥିବା ଅଭିଯୋଗ ହୋଇଛି । ଅଧ୍ୟାପିକା ଜଣକ ଛାତ୍ରୀଙ୍କୁ ବିଳମ୍ବରେ ଆସିଥିବା କହି ପ୍ରାକ୍ଟିକାଲ ପରୀକ୍ଷା ଦେବାରୁ ବାରଣ କରି ତଡ଼ିଦେବା ପରିବାର ସଦସ୍ୟ ଥାନାରେ ଅଭିଯୋଗ କରିଛନ୍ତି । ହେଲେ କଲେଜ ଅଧ୍ୟକ୍ଷ ଆପୋସ ବୁଝାମଣା କରି ମାମଲାକୁ ଚପାଇଦେବାକୁ ଉଦ୍ୟମ କରୁଥିବା ଜଣାପଡ଼ିଛି ।
ସୂଚନାଯୋଗ୍ୟ, ଛାତ୍ରୀଙ୍କୁ ସମ୍ପୃକ୍ତ ଅଧ୍ୟାପିକା ବହୁଦିନରୁ ବିଭିନ୍ନ ଆଳରେ ନିର୍ଯାତନା ଦେଇଆସୁଥିଲେ । ତିନିଦିନ ତଳେ ଅଧ୍ୟାପିକା ଅଚାନକ ସକାଳ ୭ଟା ୪୭ରେ ଛାତ୍ରୀଙ୍କୁ ମୋବାଇଲରେ ମେସେଜ୍ କରି ୯ଟାରେ ପ୍ରାକ୍ଟିକାଲ ପରୀକ୍ଷା ପାଇଁ ଆସିବାକୁ କହିଥିଲେ । ଛାତ୍ରୀ ଜଣକ ସାମାନ୍ୟ ବିଳମ୍ୱରେ ଆସିବାରୁ ତାଙ୍କୁ ଗାଳିଗୁଲଜ ସହ ପରୀକ୍ଷା ଦେବାରୁ ବାରଣ କରି ହଲ୍ରୁ ବାହାର କରିଦେଇଥିଲେ । ଛାତ୍ରୀ ଜଣକ ପ୍ରାକ୍ଟିକାଲ ପରୀକ୍ଷାରୁ ବଞ୍ଚିତ ହୋଇଛନ୍ତି । ଅପମାନର ଶିକାର ଛାତ୍ରୀ ଘର ଲୋକଙ୍କୁ ସମସ୍ତ ଘଟଣା କହିବା ପରେ ମା’,ବାପା ଓ ଭଉଣୀ କଲେଜକୁ ଯାଇ ଅଧ୍ୟକ୍ଷଙ୍କୁ ଲିଖିତ ଅଭିଯୋଗ କରିଥିଲେ । ଏଥିସହ ପୀଡ଼ିତା ଛାତ୍ରୀ ଜଣକ ଟିଟିଲାଗଡ଼ ଥାନାରେ ମଧ୍ୟ ଅଭିଯୋଗ କରିଛନ୍ତି ।
ହେଲେ ସୋମବାର କଲେଜ କର୍ତ୍ତୃପକ୍ଷ ଏକ ବୈଠକ କରି ମାମଲାକୁ ଚପାଇଦେବାକୁ ଉଦ୍ୟମ କରିଥିବା ଜଣାପଡ଼ିଛି । କଲେଜ ଅଧ୍ୟକ୍ଷ ନ୍ୟାୟ ପ୍ରଦାନ ବଦଳରେ ପୀଡ଼ିତା ଓ ପରିବାରବର୍ଗଙ୍କ ଦସ୍ତଖତ ନେଇ ମାମଲାକୁ ଚପାଇଦେବାକୁ ପ୍ରୟାସ କରିଥିବା ଚର୍ଚ୍ଚା ହେଉଛି । ଖବର ପାଇ ଗଣମାଧ୍ୟମ ପ୍ରତିନିଧି ପୀଡ଼ିତା ଛାତ୍ରୀ ଓ ତାଙ୍କ ପରିବାର ସଦସ୍ୟଙ୍କ ସହ କଲେଜକୁ ଯାଇ ଅଧ୍ୟକ୍ଷଙ୍କୁ ସାକ୍ଷାତ କରିଥିଲେ । ହେଲେ ଅଧ୍ୟକ୍ଷ ଗଣମାଧ୍ୟମକୁ କୌଣସି ପ୍ରତିକ୍ରିୟା ଦେବାକୁ ମନା କରିଦେଇଥିଲେ । ଏ ନେଇ ଥାନାଧିକାରୀ କଲ୍ୟାଣୀ ବେହେରାଙ୍କୁ ପଚାରିବାରୁ ଘଟଣାର ତଦନ୍ତ ଚାଲିଥିବା କହିଛନ୍ତି । ଜଣେ ଗରିବ ଛାତ୍ରୀ ବିଜ୍ଞାନ ପାଠ ପଢ଼ୁଥିବାବେଳେ ତାଙ୍କୁ ପ୍ରୋତ୍ସାହନ ଦେବା ବଦଳରେ ଅଧ୍ୟାପିକାଙ୍କ ଗାଳିଗୁଲଜ ଅଭିଭାବକଙ୍କୁ ନିରାଶ କରିଛି । ଏଦିଗରେ ଜିଲାପାଳ ସ୍ୱତନ୍ତ୍ର ଦୃଷ୍ଟିଦେଇ ପଦକ୍ଷେପ ନେବାକୁ ଦାବି ହେଉଛି ।
