ବ୍ରହ୍ମଗିରି, ୦୭/୧୧: ମହିଳାଙ୍କ ବେକରେ ଗାମୁଛାରେ ପଥର ବନ୍ଧା ହୋଇଥିବା ଅବସ୍ଥାରେ ମିଳିଲା ମୃତଦେହ । ମୃତ ଅବସ୍ଥାରେ ଗାଁ ପୋଖରୀରେ ଭାସୁଥିବା ବେଳେ ଦେଖିଲେ ପରିବାର ଏବଂ ଗାଁ ଲୋକେ । ମୃତ ମହିଳା ମାନସ ରଞ୍ଜନ ଗୁଣ୍ଠଙ୍କ ପତ୍ନୀ ରିତାଞ୍ଜଳି ଗୁଣ୍ଠ ବୋଲି ଜଣାପଡିଛି । ପୁରୀ ଜିଲ୍ଲା ବ୍ରହ୍ମଗିରି ଥାନା ହରପଡ଼ା ଗାଁରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଗୁରୁବାର ସକାଳେ ହରପଡ଼ା ଗାଁ ପୋଖରୀରେ ଜଣେ ମହିଳାଙ୍କ ମୃତଦେହ ଦେଖିବାକୁ ପାଇଥିଲେ ଗାଁ ଲୋକେ । ଏହା ଦେଖି ତୁରନ୍ତ ମହିଳାଙ୍କ ପରିବାର ଲୋକଙ୍କୁ ଖବର ଦେଇଥିଲେ । ଖବର ପାଇ ପରିବାର ଲୋକେ ଆସି ଘଟଣାସ୍ଥଳରେ ପହଞ୍ଚି ଥିଲେ । ମହିଳାଙ୍କ ବେକରେ ଗାମୁଛାରେ ଏକ ପଥର ବନ୍ଧା ହୋଇଥିବା ଦେଖିଥିଲେ । ଏହା ଦେଖି ମହିଳାଙ୍କ ଶାଶୁ ଘର ଲୋକେ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ବ୍ରହ୍ମଗିରି ପୋଲିସ ପହଞ୍ଚି ମୃତଦେହ ଜବତ କରିଛି ।
ତେବେ ପାରିବାରିକ କଳହକୁ ନେଇ ଆତ୍ମହତ୍ୟା କରିଥିବା ଶାଶୁଘର ଲୋକେ କହୁଥିବା ବେଳେ ଝିଅକୁ ମାରି ପୋଖରୀରେ ଫିଙ୍ଗି ଦେଇ ଥିବା ବାପଘର ଲୋକେ ଅଭିଯୋଗ ଆଣିଛନ୍ତି । ମହିଳାଙ୍କ ସ୍ବାମୀ, ଦେଢ଼ଶୁର, ଯାଆ ଓ ପୁତୁରାଙ୍କ ନାଁରେ ବ୍ରହ୍ମଗିରି ଥାନାରେ ହତ୍ୟା ଅଭିଯୋଗ କରିଛନ୍ତି ବାପଘର ଲୋକେ । ପୋଲିସ ମୃତ ଦେହ ଜବତ କରିବା ସହିତ ତଦନ୍ତ ଆରମ୍ଭ କରିଛି । ରିତାଞ୍ଜଳୀଙ୍କ ୧୯୯୯ ମସିହାରେ ବିବାହ କରିଥିବା ବାପ ଘର ପକ୍ଷରୁ ସୂଚନା ମିଳିଛି । ବିଭିନ୍ନ ସମୟରେ ରିତାଞ୍ଜଳୀଙ୍କୁ ତାଙ୍କ ସ୍ଵାମୀ, ଦେଢ଼ଶୁର, ଯାଆ ମିଶି ନିର୍ଯାତନା ଦେଉଥିବା ଅଭିଯୋଗରେ ଉଲ୍ଲେଖ କରିଛନ୍ତି ।
