ନାକଟିଦେଉଳ, ୨୬/୫(ଆପ୍ର): ଖାଳାଶୁଣୀ ଅଭୟାରଣ୍ୟରେ ବୃଦ୍ଧା ମାଈହାତୀର ମୃତ୍ୟୁ। ମୃତହାତୀର ବସୟ ପ୍ରାୟ ୫୦ରୁ ୬୦ବର୍ଷ ହେବ ବୋଲି ଜଣାପଡିଛି। ସେ ଗତ ମାର୍ଚ୍ଚ ମାସରୁ ଅସୁସ୍ଥ ଥିଲା। ବାମରା ବନ୍ୟପ୍ରାଣୀ ବନଖଣ୍ଡ କିସିଣ୍ଡା ରେଞ୍ଜ ଉପରମୁଣ୍ଡା ଫରେଷ୍ଟ ସେକ୍ସନ ହିକପାଲି ନିକଟ ପାହାଡ ଉପରେ ଗତକାଲି ତାର ମୃତ୍ୟୁ ହୋଇଛି। ଏ ନେଇ ବନ୍ୟପ୍ରାଣୀ ବିଭାଗ ଖବର ପାଇବା ପରେ ଆଜି ଘଟଣାସ୍ଥଳରେ ପହଞ୍ଚି ମୃତଦେହ ବ୍ୟବଚ୍ଛେଦ କରିଛି।
ବାମରା ବନ୍ୟପ୍ରାଣୀ ବନଖଣ୍ଡ ଅଧିକାରୀଙ୍କ ସୂଚନା ଅନୁସାରେ, ହିକପାଲି ଅଞ୍ଚଳରେ ଏହି ମାଈ ହାତୀଟି ବୁଲୁଥିଲା। ବୟସାଧିକ୍ୟ କାରଣରେ ସେ ଠିକ୍ ଭାବେ ଚାଲିପାରୁନଥିଲା। ତେଣୁ ସେ ଗତ ମାର୍ଚ୍ଚ ୧୯ ତାରିଖରୁ ଦଳଠାରୁ ଅଲଗା ରହୁଥିଲା। ଏହା ଉପରେ ଆମ କର୍ମଚାରୀ ନଜର ରଖିଥିଲେ। ହେଲେ ଗତ ୨୪ ତାରିଖରେ ସେ ପାହାଡ଼ ଉପରେ ଖସି ପଡିଥିଲା। ପ୍ରାଣୀ ଚିକିତ୍ସକଙ୍କ ଦ୍ବାରା ଚିକିତ୍ସା କରାଯାଇଥିଲା। କିନ୍ତୁ ୨୫ ତାରିଖ ସକାଳେ ତାର ମୃତ୍ୟୁ ହୋଇଥିଲା। ବନପ୍ରାଣୀ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ମୃତଦେହକୁ ଠାବ କରିଥିଲେ। ହାତୀର ମୃତଦେହଟି ୧୮୦୦ ଫୁଟ୍ ଉଚ୍ଚ ପାହାଡ଼ ଉପରେ ଥିଲା। ଯାହାକି ସେଠାକୁ ପହଞ୍ଚିବାକୁ ପ୍ରାୟ ୩ ଘଣ୍ଟା ସମୟ ଲାଗିଥିଲା। ଆଜି ତାର ଶବ ବ୍ୟବଚ୍ଛେଦ ହୋଇଛି। ପ୍ରାଥମିକ ତଦନ୍ତରୁ ବୟସଜନିତ କାରଣରୁ ହାତୀର ମୃତ୍ୟୁ ହୋଇଥିବା ଜଣାପଡିଛି। ହେଲେ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁ କାରଣ ସ୍ପଷ୍ଟ ହେବ।
