ନୂଆଦିଲ୍ଲୀ,୨।୧୨: ତ୍ରିପୁରାର ରାଜଧାନୀ ଅଗରତାଲାରେ ବାଂଲାଦେଶ ଆସିଷ୍ଟାଣ୍ଟ ହାଇକମିଶନରଙ୍କ କାର୍ଯ୍ୟାଳୟ ପରିସରରେ ଭଙ୍ଗାରୁଜା। ଏହି ଘଟଣାରେ କେନ୍ଦ୍ର ସରକାର ଚିନ୍ତା ପ୍ରକାଶ କରିଛନ୍ତି। ଏହା ସହ ରାଜଧାନୀରେ ଥିବା ହାଇକମିଶନ ଏବଂ ଅନ୍ୟ ସହରରେ ଥିବା ମିଶନ୍ର ସୁରକ୍ଷା ବଢାଇବାର ଆଶ୍ବସନା ଦେଇଛନ୍ତି। ବୈଦେଶିକ ମନ୍ତ୍ରଣାଳୟ ବୟାନ ଜାରି କରି କହିଛନ୍ତି, ବାଂଲାଦେଶର ଆସିଷ୍ଟାଣ୍ଟ ହାଇକମିଶନ ପରିସରରେ ଭଙ୍ଗାରୁଜା ହୋଇଛି। ଘଟଣା ଖୁବ୍ ଚିନ୍ତାଜନକ। ବୈଦେଶିକ ମନ୍ତ୍ରଣାଳୟ କହିଛି, କୌଣସି ପରିସ୍ଥିତିରେ ରାଜନୈତିକ ଓ ବାଣିଜ୍ୟ ଦୂତାବାସର ସମ୍ପତ୍ତିକୁ ଟାର୍ଗେଟ କରିବା ଉଚିତ ନୁହେଁ।’
ଏହା ସହ କେନ୍ଦ୍ର ଗୃହମନ୍ତ୍ରଣାଳୟ କହିଛି, ସରକାର ନୂଆଦିଲ୍ଲୀରେ ବାଂଲାଦେଶ ହାଇକମିଶନ୍ ଓ ଦେଶରେ ତାଙ୍କର ଥିବା ଆସିଷ୍ଟାଣ୍ଟ ହାଇକମିଶନ୍ ପାଇଁ ସୁରକ୍ଷା ବ୍ୟବସ୍ଥା ବଢାଇବା ପାଇଁ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ଏହି ବୟାନ ତ୍ରିପୁରାରେ ବାଂଲାଦେଶୀ ମିଶନ୍ର ଆଖପାଖରେ ବହୁ ଲୋକଙ୍କ ଦ୍ବାରା ଏକ ବିଶାଳ ରାଲି ବାହାର କରାଯିବାର କିଛି ଘଣ୍ଟା ପରେ ଆସିଛି। ଏଥିରେ ବାଂଲାଦେଶର ହିନ୍ଦୁ ସନ୍ଥ ଚିନ୍ମୟ କୃଷ୍ଣ ଦାସଙ୍କ ଗିରଫଦାରୀ ଓ ପଡୋଶୀ ଦେଶରେ ହିନ୍ଦୁଙ୍କ ଉପରେ ଆକ୍ରମଣ ବିରୋଧରେ ବିକ୍ଷୋଭ ପ୍ରଦର୍ଶନ ବେଳେ କରାଯାଇଥିଲା।
ସମାଚାର ଏଜେନ୍ସି ପିଟିଆଇର ସୂଚନା ଅନୁସାରେ, ସୋମବାର ୫୦ ରୁ ଅଧିକ ପ୍ରଦର୍ଶନକାରୀ ହାଇକମିଶନ୍ ପରିସରରେ ପଶି ଯାଇଥିଲେ। ଉଲ୍ଲେଖନୀୟ ଯେ, ଅଗରତାଲାରେ ବାଂଲାଦେଶର ସହାୟକ ହାଇକମିଶନ୍ କାର୍ଯ୍ୟାଳୟ ନିକଟରେ ବିଶ୍ବ ହିନ୍ଦୁ ପରିଷଦ ସମ୍ପର୍କିତ ହିନ୍ଦୁ ସଂଘର୍ଷ ସମିତିର ବ୍ୟାନର ତଳେ ଏକ ରାଲି ବାହାରିଥିଲା। କିଛି ରିପୋର୍ଟରେ କୁହାଯାଇଛି ଯେ, ପଡୋଶୀ ଦେଶରେ ସଂଖ୍ୟାଲଘୁଙ୍କ ବିରୋଧରେ ପ୍ରଦର୍ଶନକାରୀମାନେ କଥିତ ଭାବରେ ବାଂଲାଦେଶ ଆସିଷ୍ଟାଣ୍ଟ ହାଇକମିଶନରେ ଭଙ୍ଗାରୁଜା ହୋଇଛି।
