ଡେରାଡୁନ,୨୪/୧୧: ଆସନ୍ତାବର୍ଷ ଏପ୍ରିଲରେ ଉତ୍ତରାଖଣ୍ଡର ଡେରାଡୁନ ଅନ୍ତର୍ଗତ ରାଜପୁର ରୋଡ୍ରେ ଥିବା ରାଷ୍ଟ୍ରପତି ଆଶିୟାନା ସାଧାରଣ ଲୋକଙ୍କ ପାଇଁ ଖୋଲାଯିବ । ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ନିର୍ଦ୍ଦେଶ ପରେ ପ୍ରସ୍ତୁତି ଆରମ୍ଭ ହୋଇଛି । ରାଷ୍ଟ୍ରପତିଙ୍କ ପ୍ରମୁଖ ସଚିବ ଡକ୍ଟର ରାକେଶ ଗୁପ୍ତା ଡେରାଡୁନ ଗସ୍ତ କରି ରାଜ୍ୟର ବରିଷ୍ଠ ପଦାଧିକାରୀଙ୍କ ସହ ଏ ନେଇ ଏକ ଉଚ୍ଚସ୍ତରୀୟ ବୈଠକରେ ପ୍ରସ୍ତୁତିର ସମୀକ୍ଷା କରିଛନ୍ତି । ବୈଠକରେ ପିବିଜିର କମାଣ୍ଡିଂ ଅଫିସର କର୍ଣ୍ଣେଲ ଅମିତ ବରୱାଲ ଓ ରାଷ୍ଟ୍ରପତିଙ୍କ ସଚିବାଳୟର ଅଫିସର ଅନ୍ ସ୍ପେଶାଲ ଡ୍ୟୁଟି ସ୍ୱାତୀ ଶାହି ପ୍ରମୁଖ ଉପସ୍ଥିତ ଥିଲେ ।
୧୮୬ ବର୍ଷ ତଳର ତଥା ୨୧ ଏକର ପରିମିତ ଏହି ବଙ୍ଗଳା ଓ ତାର ପରିସରକୁ ବର୍ତ୍ତମାନ ରାଷ୍ଟ୍ରପତିଙ୍କ ଅଙ୍ଗରକ୍ଷୀ ରେଜିମେଣ୍ଟ ବ୍ୟବହାର କରିଆସୁଛନ୍ତି । ପରିଦର୍ଶକଙ୍କୁ ମୁଖ୍ୟ ଅଟ୍ଟାଳିକା ସହ ସେଠାରେ ଥିବା ୨୫୧ ବର୍ଷ ତଳର ପିବିଜି ରେଜିମେଣ୍ଟର ଐତିହ୍ୟ ଏବଂ ୧୮୬ ବର୍ଷ ତଳର ଅଶ୍ୱାରୋହୀ ବ୍ୟବସ୍ଥା ବୁଲି ଦେଖିପାରିବେ । ଏଥିସହ ଉକ୍ତ ବଙ୍ଗଳା ପରିସରରେ ଏକ ସୁନ୍ଦର ଉଦ୍ୟାନ, କଫିଘର, ପାର୍କିଂ ଏବଂ ବିଦ୍ୟୁତ ସୁବିଧା ରହିଛି । ଦେଶବ୍ୟାପୀ ବିଭିନ୍ନ ସ୍ଥାନରେ ଥିବା ରାଷ୍ଟ୍ରପତି ନିବାସ ଓ ନିଳୟ ସାଧାରଣ ଲୋକଙ୍କ ପାଇଁ ଖୋଲିବାକୁ ଶ୍ରୀମତୀ ମୁର୍ମୁ ଆଗ୍ରହ ପ୍ରକାଶ କରିବା ପରେ ଏଭଳି ପଦକ୍ଷେପ ନିଆଯାଉଛି ।
ହାଇଦ୍ରାବାଦରେ ରାଷ୍ଟ୍ରପତି ନିଳୟମ ଓ ମାସୋବ୍ରାରେ ରାଷ୍ଟ୍ରପତି ନିବାସ ଭଳି ପ୍ରେସିଡେନ୍ସିଆଲ ଇଷ୍ଟେଟ ମଧ୍ୟ ରହିଛି । ତେବେ ରାଷ୍ଟ୍ରପତି ଆଶିୟାନା ହେବ ପ୍ରଥମ ପ୍ରେସିଡେନ୍ସିଆଲ ଇଷ୍ଟେଟ ଯାହାକି ସକ୍ରିୟ ଥିବା ପିବିଜିକୁ ସାଧାରଣ ଲୋକଙ୍କ ପାଇଁ ଖୋଲାଯାଉଛି। ଦର୍ଶକମାନେ ଏଠାରୁ ଭାରତର ରାଷ୍ଟ୍ରପତି ଓ ସାମରିକ ଐତିହ୍ୟ ସମ୍ପର୍କରେ ବହୁ କିଛି ଜାଣିପାରିବେ ।
