ନୂଆଦିଲ୍ଲୀ: ବିଜେପି ରେଖା ଗୁପ୍ତାଙ୍କୁ ଦିଲ୍ଲୀର ମୁଖ୍ୟମନ୍ତ୍ରୀ ଚୟନ କରିଛି, ଯେତେବେଳେ କି ପରଭେଶ୍ ବର୍ମାଙ୍କୁ ଉପମୁଖ୍ୟମନ୍ତ୍ରୀ କରାଯାଇଛି। ରେଖା ଗୁପ୍ତାଙ୍କ ଜନ୍ମ ୧୯ ଜୁଲାଇ ୧୯୭୪ରେ ହରିୟାଣାର ଜୁଲାନାରେ ହୋଇଥିଲା। ସେ ରାଷ୍ଟ୍ରୀୟ ସ୍ୱୟଂସେବକ ସଂଘର ଜଣେ ସକ୍ରିୟ ସଦସ୍ୟା ଥିଲେ। ତାଙ୍କର ରାଜନୈତିକ କ୍ୟାରିଅର ଦିଲ୍ଲୀ ବିଶ୍ୱବିଦ୍ୟାଳୟର ଦୌଲତ ରାମ କଲେଜରୁ ଆରମ୍ଭ ହୋଇଥିଲା। ୧୯୯୨ ମସିହାରେ, ସେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ଏବିଭିପି) ରେ ଯୋଗ ଦେଇଥିଲେ।

ଦିଲ୍ଲୀର ନୂତନ ମୁଖ୍ୟମନ୍ତ୍ରୀ ରେଖା ଗୁପ୍ତା ୧୯୯୪-୯୫ ମସିହାରେ ଦୌଲତ ରାମ କଲେଜର ସଚିବ ଏବଂ ପରେ ୧୯୯୫-୯୬ ମସିହାରେ ଦିଲ୍ଲୀ ବିଶ୍ୱବିଦ୍ୟାଳୟ ଛାତ୍ର ସଂଘର ସମ୍ପାଦକ ଭାବରେ କାର୍ଯ୍ୟ କରିଥିଲେ। ଏହା ପରେ ସେ ୧୯୯୬-୯୭ ମସିହାରେ DUSUର ସଭାପତି ହୋଇଥିଲେ। ୨୦୦୩-୨୦୦୪ ପର୍ଯ୍ୟନ୍ତ ସେ ଭାରତୀୟ ଜନତା ପାର୍ଟି ଯୁବ ମୋର୍ଚ୍ଚା ଦିଲ୍ଲୀର ସଚିବ ଭାବରେ କାର୍ଯ୍ୟ କରିଥିଲେ। ସେ ୨୦୦୭ ଏବଂ ୨୦୧୨ ରେ ଉତ୍ତର ପିତାମପୁରା (ୱାର୍ଡ-୫୪)ର କାଉନସିଲର ଭାବରେ ନିର୍ବାଚିତ ହୋଇଥିଲେ। ନଗର କାଉନସିଲର ହେବା ପରେ, ତାଙ୍କୁ ୨୦୦୭-୨୦୦୯ପର୍ଯ୍ୟନ୍ତ ମହିଳା କଲ୍ୟାଣ ଏବଂ ଶିଶୁ ବିକାଶ କମିଟିର ଅଧ୍ୟକ୍ଷା କରାଯାଇଥିଲା।

ରେଖା ଗୁପ୍ତା ୨୦୨୫ ଦିଲ୍ଲୀ ବିଧାନସଭା ନିର୍ବାଚନରେ ପ୍ରଥମ ଥର ପାଇଁ (ଶାଲିମାର ବାଗରୁ) ବିଧାୟକ ନିର୍ବାଚିତ ହୋଇଛନ୍ତି। ପୂର୍ବରୁ, ସେ ୨୦୧୫ରେ ଦିଲ୍ଲୀ ବିଧାନସଭା ନିର୍ବାଚନ ଲଢ଼ିଥିଲେ, କିନ୍ତୁ ଆମ ଆଦମୀ ପାର୍ଟି ପ୍ରାର୍ଥୀ ବନ୍ଦନା କୁମାରୀ ତାଙ୍କୁ ୧୦ ହଜାରରୁ ଅଧିକ ଭୋଟରେ ପରାସ୍ତ କରିଥିଲେ। ଏହା ପରେ, ୨୦୨୦ ମସିହାରେ ମଧ୍ୟ ସେ ବନ୍ଦନା କୁମାରୀଙ୍କ ଠାରୁ ୩୪୪୦ ଭୋଟରେ ପରାସ୍ତ ହୋଇଥିଲେ। ରେଖା ଗୁପ୍ତା ତାଙ୍କ ରାଜନୈତିକ କ୍ୟାରିୟର ସମୟରେ ସାଧାରଣ ଲୋକଙ୍କ ସହିତ ନିରନ୍ତର ଯୋଡ଼ି ହୋଇଛନ୍ତି ଏବଂ ଏହି ସମୟ ମଧ୍ୟରେ ସେ ଅନେକ ରାଜନୈତିକ ଏବଂ ସାମାଜିକ କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ।

ଦିଲ୍ଲୀ ବିଧାନସଭା ନିର୍ବାଚନରେ ବିଜେପିର ବିଜୟ ଉପରେ ରେଖା ଗୁପ୍ତା କହିଥିଲେ, "ସତ୍ୟ ଜନସାଧାରଣଙ୍କ ସାମ୍ନାରେ ଆସିଛି ଯେ ସେମାନେ(ଅରବିନ୍ଦ କେଜରିୱାଲ, ମନୀଷ ସିସୋଦିଆ) ସ୍ୱାର୍ଥପର। ସେମାନେ ଜନସାଧାରଣଙ୍କ ହିତରେ କିଛି କରି ନଥିଲେ। ସେମାନେ ପ୍ରକୃତରେ ଦିଲ୍ଲୀ ପାଇଁ ଏକ ବିପର୍ଯ୍ୟୟ ଥିଲେ ଏବଂ ଲୋକମାନେ ଏହା ବୁଝିପାରିଲେ।