କଣ୍ଟାମାଳ,୧୦।୮ : ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକ ଅନ୍ତର୍ଗତ ଲମ୍ବସରି ରାଧାମାଧବ ହାଇସ୍କୁଲରେ ଛାତ୍ରୀଛାତ୍ରୀ ତୁଳନାରେ ଆବଶ୍ୟକ ଶ୍ରେଣୀ ଗୃହ  ନାହିଁ। ସେହିପରି  ୧୮ ବର୍ଷ ହେଲା ବିଦ୍ୟାଳୟ ବିଜ୍ଞାନ ଶିକ୍ଷକ ନାହାନ୍ତି। ସ୍କୁଲରେ ଅତିରିକ୍ତ ଶ୍ରେଣୀ ଗୃହ ନିର୍ମାଣ ଓ ବିଜ୍ଞାନ ଶିକ୍ଷକ ନିଯୁକ୍ତି ପାଇଁ ସାଧାରଣରେ ଦାବି ହେଉଛି।  

ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକ ଅନ୍ତର୍ଗତ ଲମ୍ବସରି ରାଧାମାଧବ ହାଇସ୍କୁଲ ନାମରେ ୧୯୯୬ମସିହାରେ ସ୍ଥାପନ କରାଯାଇଥିଲା l ଉକ୍ତ ବିଦ୍ୟାଳୟରୁ ଶିକ୍ଷା ଗ୍ରହଣ କରି ଏବେ ହଜାର ହଜାର ଛାତ୍ରଛାତ୍ରୀ ଦେଶର କୋଣ ଅନୁକୋଣରେ କାର୍ଯ୍ୟରତ ଅଛନ୍ତି l ଉକ୍ତ ବିଦ୍ୟାଳୟରେ ନବମ ଶ୍ରେଣୀ ରେ ୧୦୪ଜଣ ଛାତ୍ରଛାତ୍ରୀ ଓ ଦଶମ ଶ୍ରେଣୀରେ ୯୬ଜଣ ଛାତ୍ରଛାତ୍ରୀ ମିଶି୨୦୦ଜଣ ଛାତ୍ରଛାତ୍ରୀ ଏବେ ପଡ଼ୁଅଛନ୍ତି l ବର୍ତ୍ତମାନ ଦୁଇଟି ଶ୍ରେଣୀ ଗୃହରେ ୨୦୦ଜଣ ଛାତ୍ର, ଛାତ୍ରୀ ପଡୁଛନ୍ତି l ତେଣୁ ଉକ୍ତ ବିଦ୍ୟାଳୟରେ ଆଉ ଦୁଇଟି ଅତିରିକ୍ତ ଶ୍ରେଣୀ ଗୃହ ନିର୍ମାଣ କରାଯିବାକୁ ଦାବି ହେଉଛି l 

ସ୍କୁଲରେ ଛାତ୍ରଛାତ୍ରୀମାନେ ସାଇକେଲ ଗୁଡିକ ଖରା, ବର୍ଷାରେ ଏଣେତେଣେ ରଖୁଛନ୍ତି । ତେଣୁ ଗୋଟିଏ ସୁରକ୍ଷିତ ସ୍ଥାନରେ ରଖିବାକୁ ଏକ ସାଇକେଲ ଷ୍ଟାଣ୍ଡ ନିର୍ମାଣ କରାଯିବାକୁ ଛାତ୍ର, ଛାତ୍ରୀ ମାନେ ଦାବି କରୁଛନ୍ତି l ବିଦ୍ୟାଳୟର ଚାରିପଟେ ବାଉଣ୍ଡୁରୀ ନିର୍ମାଣ ମଧ୍ୟ ଅଧଖଣ୍ଡିଆରେ ପଡି ରହିଛି । ଫଳରେ ବିଦ୍ୟାଳୟ ଭିତରକୁ ଛେଳି, ଗାଈ, ବଳଦ ପଶି ଫୁଲଗଛ ମାନ ନଷ୍ଟକରି ଦେଉଛନ୍ତି l ପ୍ରାୟ ୧୮ ବର୍ଷ ହେବ ଉକ୍ତ ବିଦ୍ୟାଳୟରେ ବିଜ୍ଞାନ ଶିକ୍ଷକ ନଥିବାରୁ ବିଜ୍ଞାନ ପାଠ ପଢିବାରେ ଛାତ୍ରଛାତ୍ରୀମାନେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି l ତେଣୁ ଉକ୍ତ ବିଦ୍ୟାଳୟରେ ଅତିରିକ୍ତ ଶ୍ରେଣୀ ଗୃହ, ବାଉଣ୍ଡୁରୀ, ସାଇକେଲ ଷ୍ଟାଣ୍ଡ ନିର୍ମାଣ ଓ ବିଜ୍ଞାନ ଶିକ୍ଷକ ନିଯୁକ୍ତି ଦେବାକୁ ଶିକ୍ଷା ବିଭାଗ ଓ ପ୍ରଶାସନ ଦୃଷ୍ଟି ଦେବାକୁ ଛାତ୍ରଛାତ୍ରୀ ଓ ଅବିଭାବକ ମହଲରେ ଦାବି ହେଉଛି l