ପାରାଦୀପ,୧୪/୦୧: କୋକେନ୍ କାରବାର ଘଟଣାରେ ଭିଏତନାମର ଦେବୀ ଜାହାଜ ଗିରଫ ହେବା ଘଟଣାକୁ ୧୩ ମାସ ପୂରିଲାଣି । ଜାହାଜରେ ୨୧ ଜଣ କର୍ମଚାରୀ (କ୍ର୍ୟୁ ସଦସ୍ୟ) ଥିଲେ । ଗତ ଡିସେମ୍ବର ୨୨ ତାରିଖରେ ୬ ଜଣ ଜାହାଜ କର୍ମଚାରୀଙ୍କୁ ବଦଳ କରାଯାଇଥିଲା । ଜାହାଜର ପୁରୁଣା ୬ ଜଣ କର୍ମଚାରୀ ବାହାରିଥିଲେ ଓ ବଦଳରେ ନୂଆ ୬ ଜଣ କର୍ମଚାରୀ ଜାହାଜରେ ପଶିଥିଲେ । ଅନ୍ୟ ପୁରୁଣା୧୫ ଜଣ କର୍ମଚାରୀ (କ୍ର୍ୟୁ ସଦସ୍ୟ) ଙ୍କୁ ସୋମବାର ବଦଳ କରାଯାଇଛି । ଅର୍ଥାତ ଜାହାଜର ମୂଳ ୨୧ ଜଣ କର୍ମଚାରୀ ୧୩ ମାସ ଜାହାଜରେ ରହିବା ପରେ ସ୍ୱଦେଶ ଫେରିବେ । ବର୍ତ୍ତମାନ ନୂଆ କର୍ମଚାରୀ ବୁଇ ହାଆଙ୍ଗ ଥାଇ, ହାଆଙ୍ଗ ଭାନ, ଡାଙ୍ଗ ଥାନ ଫୁ, ଲାଇସେଟ୍ଟି ନଭିନଙ୍କ ସମେତ ମୋଟ ୧୭ ଜଣ ଜାହାଜରେ ପଶିଛନ୍ତି । ବାହାରିଥିବା ୧୫ କର୍ମଚାରୀଙ୍କୁ ରବିବାର ପାରାଦୀପର ଏକ ହୋଟେଲ୍ରେ ରଖାଯାଇଥିଲା ।
ସୋମବାର ସେମାନେ ପାରାଦୀପରୁ ଭୁବନେଶ୍ୱର ଯାଇଥିବା ବେଳେ ସେଠାରୁ ମୁମ୍ବାଇ, ହଂକଂ ଦେଇ ଭିଏତନାମ୍କୁ ଯିବେ ବୋଲି ସୂଚନା ମିଳିଛି । ଦୀର୍ଘ ୧୩ ମାସ ହେବ ଉକ୍ତ ଦେବୀ ଜାହାଜ ଗିରଫ ହୋଇ ସମୁଦ୍ର ଆଙ୍କରେଜ ଅଞ୍ଚଳରେ ରହିଛି । ଜାହାଜକୁ ଭିଏତନାମ୍ର ୨୧ ଜଣ ସଦସ୍ୟ ଜଗିଥିଲେ । ଏହି କର୍ମଚାରୀମାନେ ପାରାଦୀପରେ ଗିରଫ ହୋଇ ୧୩ ମାସ ରହିବା ପୂର୍ବରୁ ୧୦ ମାସ ଜାହାଜରେ କଟାଇଥିଲେ । ମୋଟାମୋଟି ଭାବେ ୨୩ ମାସ ନିଜ ପରିବାରଠାରୁ ସେମାନେ ଦୂରେଇ ରହିଥିଲେ । ଆଜି ମୁକ୍ତ ହୋଇ ସ୍ୱଦେଶ ପ୍ରତ୍ୟାବର୍ତ୍ତନ କରୁଛନ୍ତି । ଏହି ଜାହାଜ ୨୦୨୩ ନଭେମ୍ବର ୩୦ ତାରିଖରେ ୫ ନମ୍ବର ଗେଟ୍ରେ ଥିବା ବର୍ଥରେ ଲାଗିଥିଲା । କଷ୍ଟମ୍ସ୍ ବିଭାଗ ଜାହାଜରୁ ୨୨୦ କୋଟି ଟଙ୍କା ମୂଲ୍ୟର କୋକେନ୍ ଜବତ କରି ଜାହାଜକୁ ଗିରଫ କରିଥିଲା । ଗିରଫ ଓ ଅଟକ ସମସ୍ୟାର ସମାଧାନ ପାଇଁ ସ୍ଥାନୀୟ ପ୍ରଶାସନ ଏବଂ ଭିଏତନାମ୍ ସରକାରଙ୍କ କିଛି ପ୍ରତିନିଧିଙ୍କ ମଧ୍ୟରେ ଆଲୋଚନା କରାଯିବାର ଫଳ ସ୍ୱରୂପ ଜାହାଜରେ ଥିବା ସମସ୍ତ ୨୧ ଜଣ କର୍ମଚାରୀ ସ୍ୱଦେଶ ଫେରିଛନ୍ତି । ପ୍ରତିବଦଳରେ ମୋଟ ୧୭ ଜଣ ନୂଆ କର୍ମଚାରୀ ଜାହାଜରେ ପଶିଛନ୍ତି।
