ଢେଙ୍କାନାଳ,୦୬/୧୦: କଳା, ସଂସ୍କୃତି ଓ ପରମ୍ପରାର ମାଟି ଢେଙ୍କାନାଳ । ଏଠାରେ ପ୍ରତ୍ୟେକ ପର୍ବପର୍ବାଣି ସଂସ୍କୃତି ଓ ଭାଇଚାରା ମଧ୍ୟରେ ପାଳନ କରାଯାଏ । ଆଜିଠୁ ଢେଙ୍କାନାଳର ଗଣପର୍ବ ମା’ ଲକ୍ଷ୍ମୀଙ୍କ ପୂଜା ଆରମ୍ଭ ହେବ । ଏହାକୁ ନେଇ ଚଳଚଞ୍ଚଳ ପୂଜା ମଣ୍ଡପ । ମା'ଙ୍କ ଭବ୍ୟ ଆଗମନ ପାଇଁ ଶେଷ ପର୍ଯ୍ୟାୟରେ ପହଞ୍ଚିଛି ପ୍ରସ୍ତୁତି ।
ସୋମବାର କଳସ ଯାତ୍ରା, ଆବାହନ ଆଦି ପୂଜା କରାଯାଇ ସଂଧ୍ୟାରୁ ମା'ଙ୍କୁ ଚକ୍ଷୁଦାନ କରାଯିବା ପରେ ବିଧିବଦ୍ଧ ଭାବେ ପୂଜା ଚାଲିବ । ଏଥର ୯ ଦିନ ବ୍ୟାପୀ ମା'ଙ୍କର ମୃଣ୍ମୟୀ ମୂର୍ତ୍ତିକୁ ପୂଜାର୍ଚ୍ଚନା କରାଯିବ । ୧୪ ତାରିଖ ଯାଏଁ ପୂଜା ଚାଲିବ । ୧୫ ତାରିଖ ବୁଧବାର ଭସାଣି ଉତ୍ସବ ଅନୁଷ୍ଠିତ ହେବ । ଜାତି, ଧର୍ମ, ବର୍ଣ୍ଣ ନିର୍ବିଶେଷରେ ସମସ୍ତ ପୂଜା ପ୍ରତିଷ୍ଠାନର କର୍ମକର୍ତ୍ତାମାନେ ଏକାଠି ହୋଇ ଜୋରଦାର୍ ପ୍ରସ୍ତୁତିରେ ଲାଗି ପଡ଼ିଛନ୍ତି । ପ୍ରଶାସନ ଓ ପୁଲିସ୍ ପକ୍ଷରୁ ପୂଜାକୁ ଶାନ୍ତିଶୃଙ୍ଖଳାର ସହ ସାରିବାକୁ ସମସ୍ତ ପ୍ରସ୍ତୁତି କରାଯାଇଛି । ମା'ଙ୍କର ମୃଣ୍ମୟୀ ମୂର୍ତ୍ତିରେ କାରିଗର ଶେଷସ୍ପର୍ଶ ଦେଇ ସାରିଛନ୍ତି । ସୁଦୃଶ ତୋରଣ ଓ ରଙ୍ଗିନ୍ ଆଲୋକମାଳାରେ ସହର ସଜେଇ ହୋଇଛି ।
ସହରର ପ୍ରବେଶ ପଥ କଲେଜ୍ ବାଇପାସ୍ରୁ ଆରମ୍ଭ କରି କୋରିଆଁ, ଭଗବାନପୁରଠାରୁ ବନମାଳିପ୍ରସାଦ ପର୍ଯ୍ୟନ୍ତ ୩୮ ଗୋଟି ପୂଜାମଣ୍ଡପରେ ଆବିର୍ଭାବ ହେବେ ମା' ପଦ୍ମାଳୟା । ସବୁଠି ଉତ୍ସାହ ଓ ଉଦ୍ଦୀପନା ଦେଖାଦେଲାଣି । ପାର୍ବଣରେ ସମଗ୍ର ସହର ଉତ୍ସବମୁଖର ହୋଇଉଠିଲାଣି । ରବିବାର ଛୁଟି ଦିନ ଥିବାରୁ ସଂଧ୍ୟାରୁ ପୂଜା ବଜାରକୁ ବେଶ୍ ସରଗରମ କରିଦେଲାଣି । ମା’ଙ୍କୁ ସ୍ୱାଗତ ପାଇଁ ରଙ୍ଗୀନ ଆଲୋକମାଳାରେ ନବବଧୂ ପରି ସଜେଇ ହୋଇଛି ସମଗ୍ର ସହର । ଐତିହ୍ୟ, ପୌରାଣିକ ଏବଂ ସାଂପ୍ରତିକ ବିଷୟବସ୍ତୁକୁ ଆଧାର କରି ଅଧିକାଂଶ ପୂଜା ମଣ୍ଡପରେ ସାଜସଜ୍ଜା ହୋଇଛି । ଆଖି ଝଲସାଇ ଦେବା ଭଳି ବିଜୁଳି ଆଲୋକ ଖଚିତ ହୋଇଛି । ମୀନା ବଜାର, କୈବଲ୍ୟ ବଜାର, ଗଣେଶ ବଜାର, ଗୁଡି଼ଆନାଳୀ, ଲକ୍ଷ୍ମୀ ବଜାର, ଦେଉଳସାହି ପ୍ରମୁଖ ପୂଜା ଅନୁଷ୍ଠାନଗୁଡ଼ିକ ପକ୍ଷରୁ ଚାନ୍ଦିମେଢ଼ କରାଯାଇଛି । ସେହିପରି ପ୍ରଥମଥର ପାଇଁ କାଞ୍ଚନ ବଜାର ପୂଜା ମଣ୍ଡପରେ ଚଳିତବର୍ଷ ଚାନ୍ଦିମେଢ଼ ଶୋଭା ପାଇବ । ଏହା ବ୍ୟତିତ ଅଧିକାଂଶ ପ୍ରତିଷ୍ଠାନରେ ମହାଲକ୍ଷ୍ମୀଙ୍କ ସୁନା, ରୁପାର ମୁକୁଟ ତିଆରି ହୋଇଛି ।
ଗଣେଶ ବଜାର, ବସ୍ଷ୍ଟାଣ୍ଡ, ଲକ୍ଷ୍ମୀ ବଜାର ପ୍ରଭୃତି ପୂଜା ପ୍ରତିଷ୍ଠାନ ପକ୍ଷରୁ ବିଶାଳ ତୋରଣ ନିର୍ମାଣ କରାଯାଇଛି । ପୂଜା ପାଇଁ ବିଭିନ୍ନ ସ୍ଥାନରୁ ଆସିଥିବା ଅସ୍ଥାୟୀ ଦୋକାନୀମାନେ ସେମାନଙ୍କ ପସରା ମେଲାଇଲେଣି । ମନୋରଞ୍ଜନ ପାଇଁ ରଥଗଡ଼ା, ମିନି ଷ୍ଟାଡିୟମ୍, ବି.ବି ହାଇସ୍କୁଲ୍, ଜୁବୁଲି ଟାଉନ୍ ଆଦି ପଡି଼ଆରେ ଭଳିକି ଭଳି ଦୋଳି ପଡ଼ିବା ପାଇଁ ପ୍ରସ୍ତୁତି ଚାଲିଲାଣି । ବିଭିନ୍ନ ପ୍ରକାର ଖାଦ୍ୟର ପସରା, ଢେଙ୍କାନାଳ ବରା, ହସ୍ତଶିଳ୍ପର ବିପଣନ ମୁଖ୍ୟ ଆକର୍ଷଣ ପାଲଟିବ । ଚଳିତବର୍ଷ ପାଗ ଅନୁକୂଳ ଦେଲେ ପୂଜା ବଜାରକୁ ସରଗରମ କରିବ ବୋଲି ପୂଜା କମିଟି ତଥା ସହରବାସୀ ଆଶା ବାନ୍ଧିଛନ୍ତି । ସେହିପରି ୮ ତାରିଖ ବୁଧବାରଠାରୁ ମହିଷାପାଟ ବାଇପାସ୍ ଛକ ନିକଟସ୍ଥ ପଡ଼ିଆଠାରେ ପଲ୍ଲିଶ୍ରୀ ମେଳା ଆରମ୍ଭ ହେବ । ଏହା ୧୪ ତାରିଖ ପର୍ଯ୍ୟନ୍ତ ଚାଲିବ । ମେଳାରେ ଗ୍ରାମାଞ୍ଚଳ କାରିଗରମାନଙ୍କ ଦ୍ୱାରା ପ୍ରସ୍ତୁତ ବିଭିନ୍ନ ହସ୍ତଶିଳ୍ପ, ଘରୋଇ ଉପକରଣ ସାମଗ୍ରୀର ପ୍ରଦର୍ଶନୀ ସହିତ ସ୍ୱାଦିଷ୍ଟ ଖାଦ୍ୟ ପ୍ରଦର୍ଶିତ ହେବ । ଏଥିଲାଗି ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି । ପୂଜା ସମୟରେ ଆଇନ୍ଶୃଙ୍ଖଳା ଓ ଟ୍ରାଫିକ୍ ପରିଚାଳନା ପାଇଁ ଜିଲ୍ଲା ପୁଲିସ୍ ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇଛି । ସହରରେ ଘେରାଏ ବୁଲି ଆସିଲେ ପୂଜାର ମାହୋଲ କିଭଳି ଅଛି ତାହା ବେଶ୍ ଅନୁଭବ କରି ହେଉଛି ।
ଚଳିତବର୍ଷ କାଞ୍ଚନ ବଜାର ପୂଜା ପ୍ରତିଷ୍ଠାନ ୭୫ ବର୍ଷ ପୂର୍ତ୍ତି ଅବସରରେ ହୀରକ ଜୟନ୍ତୀ ଉତ୍ସବ ପାଳନ କରିବାକୁ ଯାଉଛି । ଏଥିପାଇଁ ପୂଜା ପ୍ରତିଷ୍ଠାନର କର୍ମକର୍ତ୍ତାମାନଙ୍କ ମଧ୍ୟରେ ବେଶ୍ ଉତ୍ସାହ ପ୍ରକାଶ ପାଇଛି । ପୂଜା କମିଟି ପକ୍ଷରୁ ଦୁର୍ଗ ଶୈଳୀ ସଦୃଶ ତୋରଣ ନିର୍ମାଣ କରାଯାଇଛି । ପୂଜା ମଣ୍ଡପରେ ପୌରାଣିକ କଥାବସ୍ତୁକୁ ନେଇ ଦୃଶ୍ୟ ପ୍ରଦର୍ଶିତ ହେବ । ଏହି ଅବସରରେ ପୂଜା ପ୍ରତିଷ୍ଠାନ ପକ୍ଷରୁ ଆକର୍ଷଣୀୟ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବାର ଯୋଜନା ରହିଛି । ବହୁ ବିଶିଷ୍ଟ ବ୍ୟକ୍ତିବିଶେଷ ବିଭିନ୍ନ ସଂଧ୍ୟାରେ ଯୋଗଦେବାର କାର୍ଯ୍ୟକ୍ରମ ରହିଛି ।
ଜାତି, ଧର୍ମ, ବର୍ଣ୍ଣ ନିର୍ବିଶେଷରେ ଏକତା, ସଂହତି ଓ ଭାଇଚାରାର ନିଦର୍ଶନ ଢେଙ୍କାନାଳ ଲକ୍ଷ୍ମୀପୂଜା ୮୩ ବର୍ଷରେ ପଦାର୍ପଣ କରିଛି । ପ୍ରଥମେ ଚାଳ ଛପର ଘରେ ମାତ୍ର ୫ ଶହରୁ ୧ ହଜାରେ ଟଙ୍କାରେ ପୂଜା ହେଉଥିବାବେଳେ ଏବେ ପ୍ରତିଯୋଗିତାମୂଳକ ସାଜସଜ୍ଜାରେ ଲକ୍ଷାଧିକ ଟଙ୍କା ଖର୍ଚ୍ଚ ହେଉଛି । ହିନ୍ଦୁମୁସଲମାନ, ଶିଖ୍ ସମସ୍ତ ସଂପ୍ରଦାୟର ବ୍ୟକ୍ତିବିଶେଷ ଏକାଠି ହୋଇ ପୂଜାକୁ ଧୂମ୍ଧାମ୍ରେ ପାଳନ କରିବାକୁ ଲାଗି ପଡ଼ିଛନ୍ତି । ଅଧିକାଂଶ ପୂଜା ମଣ୍ଡପରେ ମୁସଲମାନର ସଂପ୍ରଦାୟର ନେତୃତ୍ୱ ନେଇ ସବୁ କାର୍ଯ୍ୟ ପରିଚାଳନା କରୁଛନ୍ତି । ଚଳିତବର୍ଷ ଢେଙ୍କାନାଳ ଲକ୍ଷ୍ମୀପୂଜାକୁ ରାଜ୍ୟ ସରକାରଙ୍କ ପକ୍ଷରୁ ମାନ୍ୟତା ସ୍ୱରୂପ ୩୮ଟି ପୂଜା ମଣ୍ଡପକୁ ୫୦ ହଜାର ଟଙ୍କା ଲେଖାଏଁ କରି ୧୯ ଲକ୍ଷ ଟଙ୍କା ଅନୁଦାନ ମଞ୍ଜୁର ହୋଇଛି ।
