ୱାଶିଂଟନ,୦୩/୦୪: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ବୁଧବାର ରୋଜ ଗାର୍ଡେନଠାରେ ‘ମେକ୍ ଆମେରିକା ୱେଲ୍ଦି ଏଗେନ୍’ କାର୍ଯ୍ୟକ୍ରମରେ ଭାଷଣ ଦେଇ ନୂଆ ଆମଦାନି ଟାରିଫ୍ ଘୋଷଣା କରିଛନ୍ତି । ବିଭିନ୍ନ ଦେଶ ଉପରେ ‘ଯେସାକୁ ତେସା’ ନୀତିରେ ଏହି ଟାରିଫ୍ ଘୋଷଣା ହୋଇଛି । ତାଙ୍କ ଘୋଷଣା ଅନୁସାରେ ଭାରତୀୟ ସାମଗ୍ରୀ ଉପରେ ଆମେରିକା ୨୬% ଟାରିଫ୍ କଷିବ । ଏହାଛଡ଼ା ଦକ୍ଷିଣ କୋରିଆ ଉପରେ ୨୫%, ଜାପାନ ଉପରେ ୨୪%, ତାଇୱାନ ଉପରେ ୩୨% ଶୁଳ୍କ ଲାଗୁ କରାଯାଇଛି । ତେବେ ଆମେରିକାକୁ ଯେ କୌଣସି ଦେଶରୁ ଆମଦାନି ହେଉଥିବା ସମସ୍ତ ଦ୍ରବ୍ୟ ଉପରେ ଅନ୍ୟୂନ ୧୦% ଟାରିଫ୍ ଲାଗୁ କରାଯିବ ବୋଲି ଟ୍ରମ୍ପ୍ କହିଛନ୍ତି । ଏହା ବାଦ୍ ବିଭିନ୍ନ ଦେଶର ଉତ୍ପାଦ ଉପରେ ଭିନ୍ନ ଭିନ୍ନ ଶୁଳ୍କ ଲାଗୁ ହେବ । ଅଟୋମୋବାଇଲ କ୍ଷେତ୍ର ଉପରେ ୨୫% ଶୁଳ୍କ ଲାଗୁ ହେବ ।
ବ୍ରିଟେନ୍ ଉପରେ ୧୦%, ଭିଏତନାମ ଉପରେ ୪୬%, ସ୍ୱିଜରଲାଣ୍ଡ ଉପରେ ୩୪%, କାମ୍ବୋଡିଆ ଉପରେ ୪୯%, ଦକ୍ଷିଣ ଆଫ୍ରିକା ଉପରେ ୩୦%, ଇଣ୍ଡୋନେସିଆ ଉପରେ ୩୨%, ବ୍ରାଜିଲ ଉପରେ ୧୦% ଏବଂ ସିଙ୍ଗାପୁର ଉପରେ ୧୦% ଟାରିଫ୍ ଲାଗୁ ହେବ । ଚୀନ୍ର ସାମଗ୍ରୀ ଉପରେ ୩୪% ଶୁଳ୍କ ଲାଗୁ ପାଇଁ ଟ୍ରମ୍ପ୍ ଘୋଷଣା କରିଛନ୍ତି । ଅନ୍ୟପକ୍ଷରେ ୟୁରୋପୀୟ ସଂଘଠାରୁ ଆମେରିକା ଆମଦାନି କରୁଥିବା ସାମଗ୍ରୀ ଉପରେ ୨୦% ଟାରିଫ୍ ଲାଗୁ କରାଯିବ ।
ଏହି ପରିପ୍ରେକ୍ଷୀରେ ଟ୍ରମ୍ପ୍ କହିଛନ୍ତି, ବିଶ୍ୱ ବାଣିଜ୍ୟ ଆମେରିକୀୟ ଅର୍ଥନୀତିକୁ ଲୁଟିଛି । ଆମ ଦେଶ ଅନ୍ୟ ରାଷ୍ଟ୍ରଗୁଡ଼ିକ ଦ୍ୱାରା ଲୁଟ୍ର ଶିକାର ହୋଇଛି । ତେବେ ଟାରିଫ୍ ଦ୍ୱାରା ଆର୍ଥିକ ସଂକଟ ଆସିବ ନାହିଁ ବୋଲି ସେ କହିଛନ୍ତି । ଟ୍ରମ୍ପ୍ କହିଛନ୍ତି, ବିଦେଶରେ ନିର୍ମିତ ଅଟୋମୋବାଇଲ ଉପରେ ୨୫% ଟାରିଫ୍ ଲାଗୁ ହେବ ।
ଆମେରିକା ପାଇଁ ଆଜି ଐତିହାସିକ ଦିନ ବୋଲି ଟ୍ରମ୍ପ୍ କହିଛନ୍ତି । ଏହାକୁ ‘ଲିବରେସନ ଡେ’ ଭାବେ ମଧ୍ୟ ସେ ଅଭିହିତ କରିଛନ୍ତି । ଭାରତୀୟ ସମୟ ଅନୁସାରେ ବୁଧବାର ବିଳମ୍ବିତ ରାତି ପ୍ରାୟ ୧ଟା ୩୦ରେ ଟ୍ରମ୍ପ୍ ସାମ୍ବାଦିକ ସମ୍ମିଳନୀକୁ ସମ୍ବୋଧନ କରିଥିଲେ । ଅନ୍ୟପକ୍ଷରେ ଏହାକୁ ନେଇ ଭାରତ ସରକାର ଦେଶରେ କଣ୍ଟ୍ରୋଲ ରୁମ୍ ବନାଇଥିଲେ । ବାଣିଜ୍ୟ ତଥା ଶିଳ୍ପ ମନ୍ତ୍ରଣାଳୟ ଅଧିକାରୀ କଣ୍ଟ୍ରୋଲ ରୁମ୍ରେ ଉପସ୍ଥିତ ରହିବେ । ଆମେରିକା ଟାରିଫ୍ ଦ୍ୱାରା ଭାରତୀୟ ବାଣିଜ୍ୟ ଉପରେ କି ପ୍ରଭାବ ପଡ଼ିବ, ତାହାର ମୂଲ୍ୟାୟନ କରିବେ ।
