ନୂଆଦିଲ୍ଲୀ,୦୫/୧୧: ଆମେରିକା ନିର୍ବାଚନ ଫଳାଫଳକୁ ଅପେକ୍ଷା କରିରହିଛି ସମଗ୍ର ବିଶ୍ୱ । ବିଶ୍ୱର ସର୍ବବୃହତ୍ ଅର୍ଥନୀତିରେ ନିର୍ବାଚନ ଫଳାଫଳ ସମଗ୍ର ବିଶ୍ୱ ଅର୍ଥବ୍ୟବସ୍ଥାକୁ ପ୍ରଭାବିତ କରିବା ସ୍ୱାଭାବିକ । ଏଭଳି ସ୍ଥିତିରେ ଆଶଙ୍କାରେ ଅଛନ୍ତି ବଜାର ନିବେଶକ । ବିଶ୍ୱ ବଜାରଗୁଡ଼ିକ ରିପବ୍ଲିକାନ୍ ପାର୍ଟି ପ୍ରାର୍ଥୀ ଡୋନାଲ୍ଡ ଟ୍ରମ୍ପଙ୍କ ବିଜୟ ନେଇ ପ୍ରସ୍ତୁତ ହେଉଛନ୍ତି । କାହାର ବିଜୟ ବଜାର ପାଇଁ କିଭଳି ରହିବ ତାହାକୁ ନେଇ ବିଭିନ୍ନ ପ୍ରକାର ମତ ଦେଉଛନ୍ତି ବଜାର ବିଶେଷଜ୍ଞ ।
ବଜାର ବିଶେଷଜ୍ଞଙ୍କ କହିବାନୁସାରେ, ଡେମୋକ୍ରାଟିକ୍ ପାର୍ଟି ପ୍ରାର୍ଥୀ କମଳା ହାରିସ୍ଙ୍କ ବିଜୟ ଅର୍ଥନୀତି, ଇକ୍ୱିଟି ଏବଂ ଅନ୍ୟାନ୍ୟ ଆସେଟ୍ କ୍ଲାସ୍ଗୁଡ଼ିକ ପାଇଁ ନ୍ୟୁଟ୍ରାଲ ରହିବ । କରଣ ବର୍ତ୍ତମାନ ଯାହା ଢ଼ାଞ୍ଚା ରହିଛି ତାହାକୁ କମଳା ଜାରି ରଖିବେ । କିନ୍ତୁ ଟ୍ରମ୍ପଙ୍କ ବିଜୟ ବିକାଶମୁଖୀ ବଜାର, ଇକ୍ୱିଟି ଏବଂ କରେନ୍ସିଗୁଡ଼ିକ ଉପରେ ପ୍ରଭାବ ପକାଇବ । ଆଇସିଆଇସିଆଇ ବ୍ୟାଙ୍କର ଅର୍ଥନୈତିକ ଗବେଷଣା ମୁଖ୍ୟ ସମୀର ନାରଙ୍ଗ କୁହନ୍ତି, ଯଦି ଟ୍ରମ୍ପ ରାଷ୍ଟ୍ରପତି ଭାବେ ନିର୍ବାଚିତ ହୁଅନ୍ତି, ତେବେ ସୁଧ ହାର ବଢ଼ିବ, ସୁନା ମହଙ୍ଗା ହେବ ଏବଂ ଡଲାରର ପ୍ରଭାବ ବୃଦ୍ଧି ପାଇବ । ଅନ୍ୟପକ୍ଷରେ, ଅଶୋଧିତ ତୈଳ ଦର କମିପାରେ । ସେହିଭଳି କମଳା ହାରିସ୍ଙ୍କ ବିଜୟ ଦ୍ୱାରା ସୁଧ ହାର କମିବ ଏବଂ ଡଲାର ଫ୍ଲାଟ୍ ରହିପାରେ ।
ବିଶେଷଜ୍ଞଙ୍କ ମତରେ, ଟ୍ରମ୍ପଙ୍କ ବିଜୟ ଭାରତ ଉପରେ ସକାରାତ୍ମକ ପ୍ରଭାବ ପକାଇବ । ଏହାର କାରଣ ହେଉଛି ଭାରତର ଘରୋଇ ଚାହିଦା-ପରିଚାଳିତ ଅଭିବୃଦ୍ଧି ମଡେଲ । କମୋଡିଟି ଦର ହ୍ରାସ, ସପ୍ଲାଏ ଚେନ୍ ସିଫ୍ଟ ଏବଂ ବୈଦେଶିକ ନୀତିର ସୁବିଧା ଭାରତକୁ ମିଳିବ। ଅଶୋଧିତ ତୈଳ ଦର କମିବା ଦ୍ୱାରା ବିପିସିଏଲ୍, ଆଇଓସିଏଲ୍ ଏବଂ ଏଚ୍ପିସିଏଲ୍ ଭଳି ତୈଳ ମାର୍କେଟିଂ କମ୍ପାନିଗୁଡ଼ିକ ପାଇଁ ଟ୍ରମ୍ପଙ୍କ ବିଜୟ ସକାରାତ୍ମକ ରହିବ ।
ଅନ୍ୟପକ୍ଷରେ, ଓଏନ୍ଜିସି, ଅଏଲ୍ ଇଣ୍ଡିଆ ଏବଂ ଗେଲ୍ ପାଇଁ ଏହା ନକାରାତ୍ମକ ରହିବ । ଟ୍ରମ୍ପଙ୍କ ସୁରକ୍ଷାବାଦୀ ନୀତି ଏବଂ ବାଣିଜ୍ୟିକ କଟକଣା ଆମେରିକାର ଅଭିବୃଦ୍ଧିକୁ ମଜଭୂତ କରିପାରେ । ଅନ୍ୟପକ୍ଷରେ, କମଳା ହାରିସ୍ଙ୍କ ବିଜୟ ଉଭୟ ବିଶ୍ୱ ଏବଂ ଆମେରିକା ଅର୍ଥନୀତି ଢ଼ାଞ୍ଚାକୁ ଅପ୍ରଭାବିତ କରିପାରେ । ଇକ୍ୱିଟି ବଜାର, ଶକ୍ତି ଦର, ସୁନା ଦର, ମୂଳ ଧାତୁ ଦର ଏବଂ ବିଶ୍ୱ ୟୁଏସ୍ଡି ଉପରେ ପ୍ରଭାବ ନ୍ୟୁଟ୍ରାଲ ରହିବ ।
