ନୂଆଦିଲ୍ଲୀ: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦାବି କରିଛନ୍ତି ଯେ,ଚାର୍ଲି କିର୍କଙ୍କ ହତ୍ୟାକାରୀ ଧରାପଡ଼ିଛି। ସୂଚନାଥାଉକି, ବୁଧବାର ଦିନ ଆମେରିକାର 'ଉଟା ଭ୍ୟାଲି ୟୁନିଭରସିଟି ' ପରିସରରେ ଆୟୋଜିତ ଏକ କାର୍ଯ୍ୟକ୍ରମ ସମୟରେ କିର୍କଙ୍କୁ ଗୁଳି କରି ହତ୍ୟା କରାଯାଇଥିଲା। ଏହି ଘଟଣା ସେତେବେଳେ ଘଟିଥିଲା ଯେତେବେଳେ କିର୍କ ଏକ ବିତର୍କରେ ଅଂଶଗ୍ରହଣ କରୁଥିଲେ। ଏହି ସମୟରେ ଆକ୍ରମଣକାରୀ ଦୂରରୁ କ୍ୟାମ୍ପସର ଛାତରୁ ଗୁଳି ଚଳାଇଥିଲେ। କିର୍କ ଟ୍ରମ୍ପଙ୍କ ଅତ୍ୟନ୍ତ ନିକଟତମ ସହଯୋଗୀଙ୍କ ମଧ୍ୟରୁ ଜଣେ ଥିଲେ।
ଗୁରୁବାର ଦିନ, ଫେଡେରାଲ ବ୍ୟୁରୋ ଅଫ୍ ଇନଭେଷ୍ଟିଗେସନ୍ (ଏଫବିଆଇ) ଚାର୍ଲି କିର୍କଙ୍କ ହତ୍ୟା ମାମଲାରେ ସନ୍ଦିଗ୍ଧ ବ୍ୟକ୍ତିଙ୍କ ଫଟୋ ଜାରି କରିଥିଲା। ଏଫବିଆଇ ସଲ୍ଟ ଲେକ୍ ସିଟି ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ପୋଷ୍ଟ କରି କହିଛି, "ଉଟା ଭ୍ୟାଲି ୟୁନିଭରସିଟି୍ରେ ଚାର୍ଲି କିର୍କଙ୍କ ହତ୍ୟାକାଣ୍ଡରେ ଏହି ସନ୍ଦିଗ୍ଧଙ୍କୁ ଚିହ୍ନଟ କରିବାରେ ଆମେ ଜନସାଧାରଣଙ୍କ ଠାରୁ ସାହାଯ୍ୟ ଲୋଡୁଛୁ। ତଦନ୍ତକାରୀ ସଂସ୍ଥା କହିଛି ଯେ କିର୍କଙ୍କ ଉପରେ ଆକ୍ରମଣର ସନ୍ଦିଗ୍ଧ ବ୍ୟକ୍ତି ଯେଉଁଠାରୁ ପଳାଇଥିଲା ସେହି ଅଞ୍ଚଳରୁ ଏକ ଅତ୍ୟାଧୁନିକ ରାଇଫଲ୍ ଉଦ୍ଧାର କରାଯାଇଛି।"
ସାମ୍ପ୍ରତିକ ସମୟରେ ଘଟିଥିବା ଘଟଣା ଗୁଡ଼ିକ ମଧ୍ୟରେ, ଏହାକୁ ଆମେରିକାରେ ହିଂସାର ସବୁଠାରୁ ଭୟଙ୍କର ଘଟଣା ଭାବରେ ବିବେଚନା କରାଯାଉଛି। ଅଧିକାରୀ ମାନେ କହିଛନ୍ତି ଯେ ୭,୦୦୦ ରୁ ଅଧିକ ସୁରାକ ଏବଂ ସୂଚନା ମିଳିଛି। ଅଧିକାରୀ ମାନେ ଏପର୍ଯ୍ୟନ୍ତ ସାର୍ବଜନୀନ ଭାବରେ ସନ୍ଦିଗ୍ଧ ବ୍ୟକ୍ତିଙ୍କ ନାମ ନେଇନାହାଁନ୍ତି କିମ୍ବା ଏହି ହତ୍ୟା ପଛରେ କୌଣସି କାରଣ ଦେଇନାହାଁନ୍ତି।
ତେବେ ପୂର୍ବରୁ ରାଷ୍ଟ୍ରପତି ଟ୍ରମ୍ପ ଚାର୍ଲି କିର୍କଙ୍କ ହତ୍ୟା ପାଇଁ ଶୋକ ପ୍ରକାଶ କରିଥିଲେ। କିନ୍ତୁ, ଏବେ ସେ ଏପରି କିଛି କରିଛନ୍ତି ଯାହା ଯୋଗୁଁ ତାଙ୍କୁ ପ୍ରବଳ ସମାଲୋଚନାର ସମ୍ମୁଖୀନ ହେବାକୁ ପଡୁଛି । ଟ୍ରମ୍ପ ଶୁକ୍ରବାର ୟାଙ୍କିଜ୍ ମ୍ୟାଚ୍ ରେ ଯୋଗଦେବା ପାଇଁ ନ୍ୟୁୟର୍କ ଆସିଥିଲେ। ଏହି ସମୟରେ ଟ୍ରମ୍ପ ତାଙ୍କ ଚେୟାରରେ ବସି 'ୱାଇଏମସିଏ' ଗୀତରେ ନାଚିବା ଆରମ୍ଭ କରିଥିଲେ। ଅନେକ ଥର ସେ ଠିଆ ହୋଇ ହଲି ମଧ୍ୟ ଥିଲେ। ଚାର୍ଲି କିର୍କଙ୍କ ହତ୍ୟାର ଦ୍ୱିତୀୟ ଦିନରେ, ଲୋକମାନେ ଟ୍ରମ୍ପଙ୍କ ଏହି କାର୍ଯ୍ୟକୁ ଭୁଲ ବୋଲି ଭାବି ସମାଲୋଚନା କରିବା ସହ ସେଠାରେ ତାଙ୍କର ଏହି କାର୍ଯ୍ୟକଳାପ ପାଇଁ ହଟ୍ଟଗୋଳ କରିବା ଆରମ୍ଭ କରିଥିଲେ।
