ନୂଆଦିଲ୍ଲୀ,୦୪/୦୪: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବେପରୁଆ ବାଣିଜ୍ୟ ନୀତି ସମଗ୍ର ବିଶ୍ୱ ଅର୍ଥବ୍ୟବସ୍ଥାକୁ କରିବ ଲାଇନଚ୍ୟୁତ । ଏଥିରୁ ନିଜେ ବି ବର୍ତ୍ତିପାରିବନି ଖୋଦ୍ ଆମେରିକା । ଟ୍ରମ୍ପଙ୍କ ପାଗଳାମି ବିଶ୍ୱ ଅର୍ଥବ୍ୟବସ୍ଥା ପାଇଁ ମହଙ୍ଗା ପଡ଼ିବାକୁ ଯାଉଛି । ଲିବରେଶନ ଡେ’ ନାଁରେ ଆମେରିକା ରାଷ୍ଟ୍ରପତି ଦେଇଥିବା ଶୁଳ୍କ ଚୋଟ୍ ଏକ ବଡ଼ ଧରଣର ମାନ୍ଦାବସ୍ଥାକୁ ଡାକି ଆଣିବ ବୋଲି କହିଛନ୍ତି ପ୍ରମୁଖ ଅର୍ଥନୀତିଜ୍ଞ ସ୍ୱାମୀନାଥନ ଆୟର ।
ଟ୍ରମ୍ପଙ୍କ ଯେସାକୁ ତେସା ଆମଦାନୀ ଶୁଳ୍କ ନୀତି ଯୋଗୁ ଘମାଘୋଟ ହେବ ବାଣିଜ୍ୟ ଯୁଦ୍ଧ । ‘ଲିବରେଶନ୍ ଡେ’ କହି ବିଭିନ୍ନ ରାଷ୍ଟ୍ରଗୁଡ଼ିକ ଉପରେ ତଗ୍ଡ଼ା ଶୁଳ୍କ ଘୋଷଣା କରିଛନ୍ତି ଟ୍ରମ୍ପ । ଏହାକୁ ସେ ‘ଲିବରେଶନ୍ ଡେ’ ବଦଳରେ ‘ରିସେସନ୍ ଡେ’ କହିବା ଯଥାର୍ଥ ହେବ ବୋଲି ଶ୍ରୀ ଆୟର କହିଛନ୍ତି ।
ଆୟର କହିଛନ୍ତି ଯେ, ଆମେରିକାର ଏହି ନୀତି ବିଶ୍ୱ ଯୋଗାଣ ଶୃଙ୍ଖଳକୁ ବାଧାପ୍ରାପ୍ତ କରିବା ସହ ଅର୍ଥନୈତିକ ବିକାଶ ଆଗରେ ବାଧକ ସାଜିବ । ଏହାସହିତ ବିଶ୍ୱ ଅର୍ଥନୀତିକୁ ମାନ୍ଦାବସ୍ଥାକୁ ଠେଲିଦେବ । ଟ୍ରମ୍ପଙ୍କ ଏ ନୀତିକୁ ଶ୍ରୀ ଆୟର ‘ଆର୍ଥିକ ପାଗଳାମି’ ବୋଲି ସମ୍ବୋଧିତ କରିଛନ୍ତି । ଏହାକୁ ସେ ୧୯୩୦ ଦଶକର ସୁରକ୍ଷାବାଦୀ ସ୍ମୁଥ୍-ହଲି ଶୁଳ୍କ ସହ ତୁଳନା କରିଛନ୍ତି । ପ୍ରକାଶଯୋଗ୍ୟ, ୧୯୩୦ର ଏହି ନୀତି ଦ୍ୱାରା ବଡ଼ ଧରଣର ମାନ୍ଦାବସ୍ଥାର ସୂତ୍ରପାତ ହୋଇଥିଲା, ଯାହା ଆମେରିକା ସହ ସମଗ୍ର ବିଶ୍ୱ ଅର୍ଥନୀତିକୁ ବର୍ବାଦ କରିଦେଇଥିଲା । ଟ୍ରମ୍ପଙ୍କ ଶୁଳ୍କ ନୀତି ବାଣିଜ୍ୟ ଯୁଦ୍ଧକୁ ତୀବ୍ର କରିବା ସହ ବଡ଼ ଧରଣର ବିଶ୍ୱ ଆର୍ଥିକ ମାନ୍ଦାବସ୍ଥାର ସୂତ୍ରପାତ କରିବ ବୋଲି ଆୟର କରିଛନ୍ତି ।
ଟ୍ରମ୍ପଙ୍କ ନୂଆ ନୀତି ଅଧୀନରେ ଆମେରିକାକୁ ଭାରତର ରପ୍ତାନି ଉପରେ ୨୭% ଶୁଳ୍କ ଲାଗିବ । ଚୀନ୍ ଉପରେ ୩୪% ଶୁଳ୍କ ଲଦିଛି ଆମେରିକା । ଭିଏତ୍ନାମ ଉପରେ ୪୬% ଏବଂ ୟୁରୋପୀୟ ସଂଘ ଉପରେ ୨୦% ଶୁଳ୍କ ଘୋଷଣା କରିଛନ୍ତି ଟ୍ରମ୍ପ । ପ୍ରଭାବିତ ହେବାକୁ ଥିବା ଅନ୍ୟ ରାଷ୍ଟ୍ରଗୁଡ଼ିକ ମଧ୍ୟରେ ଦକ୍ଷିଣ କୋରିଆ ଉପରେ ୨୫%, ଜାପାନ ଉପରେ ୨୪%, ତାଇୱାନ ଉପରେ ୩୨% ଏବଂ ବ୍ରିଟେନ୍ ଉପରେ ୧୦% ଶୁଳ୍କ ଘୋଷଣା ହୋଇଛି । ସୁଇଜରଲାଣ୍ଡ ଏବଂ ବ୍ରାଜିଲ ଯଥାକ୍ରମେ ୩୪% ଏବଂ ୧୦% ଶୁଳ୍କ ଗଣିବେ । ଏହାସହିତ ଆମେରିକା ସମସ୍ତ ଆମଦାନି ଉପରେ ୧୦%ର ମୂଳ ସୁଧ ପ୍ରଚଳନ କରିବ ।
ଏସବୁ ପଦକ୍ଷେପ ଦ୍ୱାରା ଆମେରିକା ସର୍ବବୃହତ୍ ବିନିର୍ମାଣ ଶକ୍ତି ପାଲଟିବ ବୋଲି ଟ୍ରମ୍ପ ଦାବି କରୁଥିବାବେଳେ ଏହାକୁ ଖାରଜ କରିଛନ୍ତି ଆୟର । ସେ କହିଛନ୍ତି ଯେ, ଏହା ଏକ ବିପର୍ଯ୍ୟୟ । ଆର୍ଥିକ ସୁଧାର ବଦଳରେ ଏହା ଆଣିବ ଆର୍ଥିକ ବିପତ୍ତି । ବିଶ୍ୱ ଅର୍ଥନୀତି ପୂର୍ବରୁ ହିଁ ଆହ୍ୱାନର ସାମ୍ନା କରୁଛି । ଅର୍ଥନୀତିଜ୍ଞମାନେ ମାନ୍ଦାବସ୍ଥାର ପୂର୍ବାନୁମାନ କରୁଛନ୍ତି । ବର୍ତ୍ତମାନ ଆମେରିକାର ଏହି ଶୁଳ୍କ ବାଣ ଯୋଗୁ ବିଶ୍ୱ ଜିଡିପି ଖସିବ, ଆମେରିକା ଏବଂ ଭାରତର ଜିଡିପି ବି ଖସିବ ।
ଶ୍ରୀ ଆୟର ଆଇଫୋନ୍ ନିର୍ମାତା ଆପଲ୍ର ଉଦାହରଣ ଦେଇଛନ୍ତି । ସେ କହିଛନ୍ତି ଯେ, ଭାରତରେ ଏହାର ଏକ ବିଶାଳ ପ୍ଲାଣ୍ଟ ରହିଛି । କିନ୍ତୁ ଉଚ୍ଚ ଶୁଳ୍କ ଯୋଗୁ ଏହା ରପ୍ତାନି କରିବାକୁ ସମର୍ଥ ହେବ କି? ଏହା ଅତ୍ୟନ୍ତ କଷ୍ଟକର ହେବ । ସବୁ ପ୍ରକାର କ୍ଷେତ୍ର ପ୍ରଭାବିତ ହେବ । ଫଳସ୍ୱରୂପ ଭାରତ, ଆମେରିକା ଏବଂ ମୋଟାମୋଟି ଭାବେ ବିଶ୍ୱ ଅର୍ଥନୀତି ବର୍ବାଦ ହୋଇଯିବ ।
୧.୩ ପ୍ରତିଶତକୁ ଖସିଯିବ ବିଶ୍ୱ ରପ୍ତାନି ଅଭିବୃଦ୍ଧି
ଏଚ୍ଏସ୍ବିସି ରିସର୍ଚ୍ଚର ଏକ ରିପୋର୍ଟ ଅନୁସାରେ, ଟ୍ରମ୍ପଙ୍କ ଶୁଳ୍କ ନୀତି ଯୋଗୁ ଆମେରିକାରେ ଚାହିଦା ପ୍ରଭାବିତ ହେବ । ଏହା ଦ୍ୱାରା ବିଶ୍ୱ ରପ୍ତାନି ଅଭିବୃଦ୍ଧି ୨୦୨୫-୨୬ରେ ୧.୩%କୁ ଖସିଯିବ, ଯାହାକି ୨୦୨୪ରେ ୨.୯% ଥିଲା । ଅନିଶ୍ଚିତତା ଯୋଗୁ ବିଶ୍ୱ ବଜାରରେ ନିବେଶ ପ୍ରଭାବିତ ହେବ ଏବଂ ଅର୍ଥନୀତିଗୁଡ଼ିକ ଉପରେ ନିବେଶକଙ୍କ ଆସ୍ଥା କମିଯିବ ।
ରପ୍ତାନିଭିତ୍ତିକ କ୍ଷେତ୍ରରେ ବାଧା ପାଇବ ନିବେଶ
ଶ୍ରୀ ଆୟର କହିଛନ୍ତି, ଶେଷରେ ଏହା କୁହାଯିବ ଯେ, ଭାରତ ଏହି ସଂକଟ ଦ୍ୱାରା ଭୟଙ୍କର ଭାବେ ପ୍ରଭାବିତ ହେବ । ଆମେରିକୀୟ ବାଣିଜ୍ୟ ନୀତିକୁ ନେଇ ଅନିଶ୍ଚିତତା ଯୋଗୁ ଭାରତର ରପ୍ତାନିଭିତ୍ତିକ କ୍ଷେତ୍ରରେ ନିବେଶ କରିବା ପାଇଁ ବିଦେଶୀ ଉତ୍ପାଦନକାରୀମାନେ ଦୂରେଇ ରହିବେ । ଭାରତର ମହତ୍ୱାକାଂକ୍ଷୀ ପିଏଲ୍ଆଇ ସ୍କିମ୍କୁ ଆମେରିକାର ଶୁଳ୍କନୀତି ପ୍ରଭାବିତ କରିବ । ଆପଲ୍ ଭଳି କମ୍ପାନିଗୁଡ଼ିକ ଭାରତରେ ସେମାନଙ୍କ ନିବେଶ ଯୋଜନା ଉପରେ ପୁନର୍ବିଚାର କରିପାରନ୍ତି ।
