ୱାଶିଂଟନ,୨୦/୦୧: ସୋମବାର ଆମେରିକାର ୪୭ତମ ରାଷ୍ଟ୍ରପତି ଭାବେ ରିପବ୍ଲିକାନ ନେତା ଡୋନାଲ୍ଡ ଟ୍ରମ୍ପ ଶପଥ ଗ୍ରହଣ କରିବେ । ଉପରାଷ୍ଟ୍ରପତି ଭାବେ ଜେଡି ଭାନ୍ସ ମଧ୍ୟ ଶପଥ ନେବେ । ସ୍ଥାନୀୟ ସମୟ ସୋମବାର ମଧ୍ୟାହ୍ନ ୧୨ଟା (ଭାରତୀୟ ସମୟ ରାତି ୧୦ଟା ୩୦) ରେ କ୍ୟାପିଟଲ ରୋଟୁଣ୍ଡା (ସଂସଦର କେନ୍ଦ୍ରୀୟ ଗୋଲାକାର କକ୍ଷ)ରେ ଏହି ଶପଥ ଗ୍ରହଣ ସମାରୋହ ଅନୁଷ୍ଠିତ ହେବ । ଶପଥ ଗ୍ରହଣ ସମାରୋହ ଭାରତ ପକ୍ଷରୁ ସାମିଲ ହେବେ ବୈଦେଶିକ ମନ୍ତ୍ରୀ ଏସ୍. ଜୟଶଙ୍କର। କିନ୍ତୁ ତା ପୂର୍ବରୁ ରାତି ପ୍ରାୟ ୮ଟାରୁ ନାଚଗୀତ ଆରମ୍ଭ ହୋଇଯିବ । ପୂର୍ବରୁ କ୍ୟାପିଟଲ ସମ୍ମୁଖରେ ଶପଥ ଉତ୍ସବ ପାଇଁ ନିଷ୍ପତ୍ତି ନିଆଯାଇଥିଲା । କିନ୍ତୁ ଆମେରିକାରେ ଲାଗି ରହିଥିବା ତୁଷାର ଝଡକୁ ଦୃଷ୍ଟିରେ ରଖି ଶପଥ ସମାରୋହ ଇନ୍ଡୋରରେ ହିଁ କରାଯିବାକୁ ସ୍ଥିର ହୋଇଥିଲା । ଶପଥ ଗ୍ରହଣ କରିବା ପରେ ଟ୍ରମ୍ପ ଦେଶବାସୀଙ୍କୁ ସମ୍ବୋଧନ କରିବେ ।
ଆଗାମୀ ୪ ବର୍ଷରେ ତାଙ୍କ ସରକାରଙ୍କ କାର୍ଯ୍ୟକ୍ରମ କ’ଣ ରହିବ ତାହା ଉପରେ ସେ ସଂକ୍ଷେପ ସୂଚନା ଦେବେ । ସନ୍ଧ୍ୟାରେ ସେ କେତେକ ଇନାଗୁରାଲ ବଲ୍ରେ ସାମିଲ ହେବେ । ଇନାଗୁରାଲ ବଲ୍ ହେଉଛି କ୍ଷମତା ହସ୍ତାନ୍ତରଣର ଏକ ପାରମ୍ପରିକ ଉତ୍ସବ । ଏହା ଉଭୟ ଔପଚାରିକ ଓ ଅନୌପଚାରିକ ଭାବେ ହୋଇଥାଏ ।
