ଓ୍ବାଶିଂଟନ,୨୬।୭: ଆମେରିକା ରାଷ୍ଟ୍ରପତି ଡୋନାଲ୍ଡୋ ଟ୍ରମ୍ପଙ୍କ ତୁର୍କୀ ଯାତ୍ରା ବେଳେ ତାଙ୍କ ସୁରକ୍ଷାକୁ ନେଇ ବଡ଼ ଖୁଲାସା ହୋଇଛି। ଆମେରିକା ଗଣମାଧ୍ୟମର ରିପୋର୍ଟ ଅନୁସାରେ ବିଶ୍ବାସନୀୟ ଖବର ଇନପୁଟ୍ ପରେ ଟ୍ରମ୍ପଙ୍କୁ ଗସ୍ତ ସମୟରେ ମଝିରେ ନିଜର ବିମାନ ବଦଳାଇବାକୁ ପଡିଲା। କୁହାଯାଉଛି ଯେ, ବିପଦ ସିଧା ଟ୍ରମ୍ପ ଓ ତାଙ୍କ ବିମାନକୁ ଥିଲା। ସୁରକ୍ଷା ଏଜେନ୍ସି ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ତାଙ୍କୁ ନୂଆ ବିମାନ ବଦଳରେ ପୁରୁଣା ଏୟାରଫୋର୍ସ ୱାନ୍ରେ ଯିବାକୁ ପରାମର୍ଶ ଦେଇଥିଲା।
ନ୍ୟୁୟର୍କ ଟାଇମ୍ସ ଅନୁଯାୟୀ, ଟ୍ରମ୍ପ ନାଟୋ ସମ୍ମିଳନୀରେ ଯୋଗଦେବା ପାଇଁ ତୁର୍କୀର ରାଜଧାନୀ ଅଙ୍କାରାରେ ପହଞ୍ଚିଥିଲେ। ସେ କତର ଦ୍ୱାରା ଦିଆଯାଇଥିବା ଏକ ନୂତନ ବୋଇଂ 747-8 ବିମାନରେ ପହଞ୍ଚିଥିଲେ, କିନ୍ତୁ ଯାତ୍ରା ସମୟରେ ଆମେରିକୀୟ ଏଜେନ୍ସି ଇରାନ-ସମର୍ଥିତ ଗୋଷ୍ଠୀଙ୍କ ଠାରୁ ଗମ୍ଭୀର ବିପଦ ବିଷୟରେ ସୂଚନା ପାଇଥିଲେ। ଏହା ପରେ, ସିକ୍ରେଟ୍ ସର୍ଭିସ ଟ୍ରମ୍ପଙ୍କୁ ନୂତନ ବିମାନକୁ ତୁରନ୍ତ ଛାଡି ପୁରୁଣା ଏୟାର ଫୋର୍ସ ୱାନରେ ଫେରିବାକୁ ପରାମର୍ଶ ଦେଇଥିଲା। କାରଣ କତରରୁ ମିଳିଥିବା ନୂତନ ବିମାନର ସୁରକ୍ଷା କ୍ଷମତା ଏୟାର ଫୋର୍ସ ୱାନ ତୁଳନାରେ କମ୍ ଥିଲା।
ରିପୋର୍ଟରେ କୁହାଯାଇଛି ଯେ ଆମେରିକା ସରକାର ଏହି ବିପଦ ବିଷୟରେ ଗୁପ୍ତ ସୂଚନା ପାଇବା ମାତ୍ରେ, ସିକ୍ରେଟ୍ ସର୍ଭିସ୍ ରାଷ୍ଟ୍ରପତିଙ୍କୁ ସୁରକ୍ଷା ଦେବା ପାଇଁ ବିମାନକୁ ପରିବର୍ତ୍ତନ କରିବାକୁ ନିଷ୍ପତ୍ତି ନେଇଥିଲା। ଅଧିକାରୀଙ୍କ ଅନୁଯାୟୀ, ଏହି ବିପଦ କେବଳ ନୂତନ ବୋଇଂ 747-8 ପ୍ରତି ନୁହେଁ, ବରଂ ଟ୍ରମ୍ପ ଏବଂ ସେ ଯାତ୍ରା କରୁଥିବା ଯେକୌଣସି ବିମାନ ପ୍ରତି ମଧ୍ୟ ଥିଲା। ବିମାନ ବଦଳ ନିଷ୍ପତ୍ତି ଏକ ସାଧାରଣ ପ୍ରକ୍ରିୟା ବୋଲି କହିଛି ହ୍ୱାଇଟ୍ ହାଉସ୍ । ତେବେ ଅଧିକାରୀମାନେ ଏବେ ସ୍ୱୀକାର କରିଛନ୍ତି ଯେ ଇରାନରୁ ସୁରକ୍ଷା ବିପଦ ଯୋଗୁଁ ଏହି ନିଷ୍ପତ୍ତି ନିଆଯାଇଥିଲା। ଏହି ଘଟଣା ପରେ, କାତାରରୁ ମିଳିଥିବା ନୂତନ ବୋଇଂ 747-8 ବିମାନର ସୁରକ୍ଷା ଉପରେ ମଧ୍ୟ ପ୍ରଶ୍ନ ଉଠିଛି। ସାମ୍ବାଦିକଙ୍କ ସହ ଆଲୋଚନା ସମୟରେ ଟ୍ରମ୍ପ ଏହା ମଧ୍ୟ ଇଶାରା କରିଥିଲେ। ଆଣ୍ଟି ମିସାଇଲ ସିଷ୍ଟମ ନେଇ ସେ କହିଥିଲେ ଯେ ଏହା ଖୁବ୍ ଶୀଘ୍ର ଅତ୍ୟାଧୁନିକ ସୁରକ୍ଷା ବୈଶିଷ୍ଟ୍ୟ ସହିତ ସମ୍ପୂର୍ଣ୍ଣ ସଜ୍ଜିତ ହେବ।
ତେବେ ଟ୍ରମ୍ପ କହିଛନ୍ତି, ସୁରକ୍ଷା କାରଣ ନୁହେଁ। ଆମେରିକୀୟ ସୈନିକ କତର ଦେଇଥିବା ବିମାନକୁ ଦେଖିବା ସୁଯୋଗ ଦେବା ପାଇଁ ଏହି ପରିବର୍ତ୍ତନ କରାଯାଇଥିଲା। ତେବେ କିଛି ଆମେରିକୀୟ ଅଧିକାରୀ ହତ୍ୟା ଧମକ ପରେ ଏଭଳି ନିଷ୍ପତ୍ତି ନିଆଯାଇଥିବାର କହିଛନ୍ତି। କାରଣ ଟ୍ରମ୍ପଙ୍କ ତୁର୍କୀ ଗସ୍ତ ସମୟରେ, ଇରାନ ବିରୁଦ୍ଧରେ ଆମେରିକା ପୁଣି ଥରେ ସାମରିକ ଆକ୍ରମଣ ଆରମ୍ଭ କରିଥିଲା, ଯାହା ଦୁଇ ଦେଶ ମଧ୍ୟରେ ପୂର୍ବରୁ ଥିବା ଉତ୍ତେଜନାକୁ ଆହୁରି ତୀବ୍ର କରିଛି। ଶିଖର ସମ୍ମିଳନୀ ସମୟରେ, ଟ୍ରମ୍ପ ତାଙ୍କ ଉପରେ ଥିବା ବିପଦ ନେଇ କହିଛନ୍ତି, ‘ସେମାନେ ଆମେରିକାର ନେତାଙ୍କୁ, ଅର୍ଥାତ୍ ମୋତେ ଶେଷ କରିବାକୁ ଚାହାଁନ୍ତି। ମୁଁ ସେମାନଙ୍କ ପାଖରେ ଥିବା ପ୍ରତ୍ୟେକ ତାଲିକାରେ ଅଛି। ମୁଁ ଆଜି ସକାଳେ ଦେଖିଲି ଯେ ମୁଁ ସେମାନଙ୍କ ପାଖରେ ଥିବା ପ୍ରତ୍ୟେକ ତାଲିକାରେ ମୁଁ ଅଛି। ମୁଁ ଏପର୍ଯ୍ୟନ୍ତ ଟିକେ ଭାଗ୍ୟବାନ, କିନ୍ତୁ ସେହି ଭାଗ୍ୟ ସର୍ବଦା ସ୍ଥାୟୀ ନୁହେଁ।’ ଆମେରିକା ସିକ୍ରେଟ ସର୍ଭିସ କହିଛି, ଆମେରିକାର ଶୀର୍ଷ ନେତାଙ୍କ ବିରୋଧରେ ବିପଦ ସ୍ତର ଏପର୍ଯ୍ୟନ୍ତ ସର୍ବୋଚ୍ଚ ସ୍ତରରେ ପହଞ୍ଚିଛି।’
ଆହୁରି ପଢନ୍ତୁ : 2 Indian Sailors Missing : ରୁଷ୍-ୟୁକ୍ରେନ ଯୁଦ୍ଧରେ ପୁଣି ବାଣିଜ୍ୟିକ ଜାହାଜ ଉପରେ ଆକ୍ରମଣ , ସପ୍ତାହରେ ଏହା ଦ୍ୱିତୀୟ ହମଲା
