ୱାଶିଂଟନ,୧୦/୧୧: ଆମେରିକାର ଭାବୀ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ନିଜ ନିର୍ବାଚନ ପ୍ରଚାରରେ ରୁଷ୍-ୟୁକ୍ରେନ୍ ଯୁଦ୍ଧ ରୋକିବାକୁ ବାରମ୍ବାର ପ୍ରତିଶ୍ରୁତି ଦେଇଥିଲେ । ସେ ନିର୍ବାଚିତ ହେବା ପରେ ବିଶେଷକରି ୟୁକ୍ରେନ୍ ଆଶ୍ୱସ୍ତ ହୋଇଛି । ଟ୍ରମ୍ପ୍ଙ୍କ ଜରିଆରେ ଶାନ୍ତି ଫେରିବ ବୋଲି ଦେଶବାସୀ ଆଶା ବାନ୍ଧିଛନ୍ତି । କୁହାଯାଉଛି ଯେ ଟ୍ରମ୍ପ୍ଙ୍କ ଟିମ୍ ଏବେଠାରୁ ଯୁଦ୍ଧ ରୋକି ଶାନ୍ତି ଫେରାଇ ଆଣିବା ଲାଗି ବିଭିନ୍ନ ରଣନୀତି ବନାଇବାରେ ଲାଗିପଡ଼ିଲେଣି ।
ରିପୋର୍ଟ ମୁତାବକ, ୭୮ ବର୍ଷୀୟ ଟ୍ରମ୍ପ୍ ୟୁକ୍ରେନ୍ ଯୁଦ୍ଧ ବନ୍ଦ ପାଇଁ ବିଭିନ୍ନ ଯୋଜନା ଉପରେ ବିଚାର କରୁଛନ୍ତି । ତନ୍ମଧ୍ୟରେ ୮୦୦ ମାଇଲ୍ (ପାଖାପାଖି ୧୩ ଶହ କିଲୋମିଟର) ର ବଫର୍ ଜୋନ୍ ପ୍ରତିଷ୍ଠା ପ୍ରସ୍ତାବ ରହିଛି । ରୁଷ୍ ଓ ୟୁକ୍ରେନ୍ ସେନା ମଝିରେ ଏହି ବଫର୍ ଜୋନ୍ ପ୍ରସ୍ତୁତ ହେବ । ଏଥିରେ କେବଳ ୟୁରୋପୀୟ ଓ ବ୍ରିଟିଶ ସୈନ୍ୟଙ୍କୁ ମୁତୟନ କରାଯିବ । ଆମେରିକା ନିଜ ସୈନ୍ୟ ନିୟୋଜିତ କରିବ ନାହିଁ କିମ୍ବା ୟୁରୋପୀୟ ଓ ବ୍ରିଟିଶ ସୈନ୍ୟଙ୍କୁ ଆର୍ଥିକ ପାରିଶ୍ରମିକ ଦେବନାହିଁ । ଏହି ବଫର୍ ଜୋନ୍ ହେବା ଦ୍ୱାରା ୟୁକ୍ରେନ୍ରେ ରୁଷ୍ କରିଥିବା ଏହାର ଆଞ୍ଚଳିକ ବିସ୍ତାରଣକୁ ବଜାୟ ରଖିବ ।
ଅନ୍ୟପକ୍ଷରେ ନାଟୋ (ନର୍ଥ ଆଟଲାଣ୍ଟିକ୍ ଟ୍ରିଟି ଅର୍ଗାନାଇଜେସନ)ରେ ସାମିଲ ହେବା ପାଇଁ ୟୁକ୍ରେନ୍ ଯେଉଁ ଯୋଜନା ରଖିଛି, ତାହାକୁ ୨୦ ବର୍ଷ ପାଇଁ ମନରୁ ପାସୋରି ଦେବ । ଅର୍ଥାତ୍ ଆଗାମୀ ୨୦ ବର୍ଷ ପର୍ଯ୍ୟନ୍ତ ୟୁକ୍ରେନ୍ ନାଟୋରେ ସାମିଲ ହୋଇପାରିବ ନାହିଁ । ବାସ୍ତବରେ ୟୁକ୍ରେନ୍ର ଏହି ଯୋଜନାକୁ ଆଧାର କରି ହିଁ ଯୁଦ୍ଧର ସୂତ୍ରପାତ ହୋଇଥିଲା । ରୁଷ୍ ଚାହୁଁ ନ ଥିଲା ଯେ ଏହାର ପଡ଼ୋଶୀ ଦେଶ ନାଟୋରେ ସାମିଲ ହେଉ । କାରଣ ୟୁକ୍ରେନ୍ ନାଟୋରେ ସାମିଲ ହେବା ଦ୍ୱାରା ଏହାର ସୀମାଞ୍ଚଳରେ ନାଟୋ ସୈନ୍ୟ ମୁତୟନ ହୋଇଥାନ୍ତେ । ଫଳରେ ସୀମାରେ ବିବାଦ ସୃଷ୍ଟି ହୋଇଥାନ୍ତା ।
ଅନ୍ୟପକ୍ଷରେ ଟ୍ରମ୍ପ୍ଙ୍କର ଏହି ଯୋଜନାକୁ ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନସ୍କି କେତେଦୂର ଗ୍ରହଣ କରିବେ, ତାହା ଦେଖିବାକୁ ହେବ । କାରଣ ଏହା ରୁଷ୍କୁ ଅଧିକ ସୁହାଇବ । ଜେଲେନସ୍କି ଏହା ପୂର୍ବରୁ ସତର୍କ କରାଇଥିଲେ ଯେ ରୁଷ୍କୁ କୌଣସି ପ୍ରକାରେ ଖୁସି କରାଇବା ଲାଗି ଯଦି ଶାନ୍ତି ଚୁକ୍ତି ହୁଏ, ତେବେ ଏହା ସମଗ୍ର ୟୁରୋପ ପାଇଁ ‘ଆତ୍ମହତ୍ୟା’ ଭଳି ହେବ । ଟ୍ରମ୍ପ୍ଙ୍କ ବିଚାରରେ ଆହୁରି ଅନେକ ଯୋଜନା ରହିଛି । କାହାକୁ ସେ କାର୍ଯ୍ୟକାରୀ କରିବେ, ତାହା ଉପରେ ସମସ୍ତଙ୍କ ନଜର।
ଜେଲେନ୍ସ୍କିଙ୍କ ସହ କଥା ହେଲେ ଟ୍ରମ୍ପ୍
ଆମେରିକା ରାଷ୍ଟ୍ରପତି ନିର୍ବାଚନ ଜିତିବା ପରେ ଡୋନାଲ୍ଡ ଟ୍ରମ୍ପ୍ ବୁଧବାର ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନସ୍କିଙ୍କୁ ଫୋନ୍ କରି କଥା ହୋଇଥିଲେ । ଉଭୟ ନେତା ୨୫ ମିନିଟ୍ ଧରି ଆଲୋଚନା କରିଥିଲେ । ତେବେ ଏହି ଆଲୋଚନାରେ ଆମେରିକାର ବିଶିଷ୍ଟ ବ୍ୟବସାୟୀ ଏଲନ୍ ମସ୍କ ବି ସାମିଲ ହୋଇଥିବା ଏକ ରିପୋର୍ଟରୁ ଜଣାପଡ଼ିଛି । ରିପୋର୍ଟ ମୁତାବକ, ଟ୍ରମ୍ପ୍ ଯୁଦ୍ଧରେ ସହାୟତା ଦେବା ପାଇଁ ଜେଲେନସ୍କିଙ୍କୁ ପ୍ରତିଶ୍ରୁତି ଦେଇଥିଲେ । ଟ୍ରମ୍ପ୍ କହିଥିଲେ, କୂଟନୀତିକୁ ଆଉ ଏକ ସୁଯୋଗ ଦିଆଯିବା ଉଚିତ । ମୁଁ କଥା ଦେଉଛି ମୋ ଦ୍ୱାରା ୟୁକ୍ରେନ୍ ନିରାଶ ହେବନାହିଁ । ଟ୍ରମ୍ପ୍ ଏହା କହିବା ପରେ ଏଲନ୍ ମସ୍କଙ୍କୁ ଫୋନ୍ ଧରାଇ ଦେଇଥିଲେ । ଏହାପରେ ଜେଲେନସ୍କି-ମସ୍କଙ୍କ ମଧ୍ୟରେ ଆଲୋଚନା ହୋଇଥିଲା । ୟୁକ୍ରେନ୍କୁ ଇଣ୍ଟରନେଟ୍ ସେବା ଯୋଗାଇଥିବାରୁ ଜେଲେନସ୍କି ତାଙ୍କୁ ଧନ୍ୟବାଦ ଦେଇଥିଲେ
