ନୂଆଦିଲ୍ଲୀ,୨୫/୦୮: ଏସିଆ କପ୍ ୨୦୨୫ ପୂର୍ବରୁ ଟିମ୍ ଇଣ୍ଡିଆର ସ୍ପନସରଶିପରୁ ହଟିବାକୁ ଡ୍ରିମ ୧୧ ନିଷ୍ପତ୍ତି ଗ୍ରହଣ କରିଛି । ଏନ୍ଡି ଟିଭିର ଏକ ରିପୋର୍ଟ ମୁତାବକ, ୯ ସେପ୍ଟେମ୍ବରରୁ ଆରମ୍ଭ ହେବାକୁ ଥିବା ଏସିଆ କପ୍ ଲାଗି ଭାରତୀୟ ଟିମ୍ରେ ଡ୍ରିମ ୧୧ର ବ୍ରାଣ୍ଡିଂ ନଜର ଆସିବା କଷ୍ଟକର ହେବ । ଅନଲାଇନ ଗେମିଂ ବିଲ୍ ପାସ୍ ହେବା ପରେ ଡ୍ରିମ୍ ୧୧ ଭଳି ରିୟଲ ମନି ଗେମ୍ ପ୍ଲାଟଫର୍ମ ଗୁଡ଼ିକୁ ବ୍ୟାନ କରାଯାଇଥିଲା ।
୨୦୨୩ରେ ଡ୍ରିମ ୧୧ ବିସିସିଆଇ ସହ ୩୫୮ କୋଟି ଟଙ୍କା ମୂଲ୍ୟରେ ୩ ବର୍ଷ ଲାଗି ସ୍ପନସରଶିପ ଚୁକ୍ତି କରିଥିଲା । ଏହା ୨୦୨୬ ଯାଏ ରହିଥିଲା । ଏହି ଡିଲ୍ ଅଧିନରେ ପ୍ରତି ଘରୋଇ ମ୍ୟାଚ୍ ଲାଗି ବିସିସିଆଇକୁ ୩ କୋଟି ଏବଂ ଅନ୍ତର୍ଜାତୀୟ ମ୍ୟାଚ୍ ଲାଗି ୧ କୋଟି ଟଙ୍କା ମିଳୁଥିଲା । ଚୁକ୍ତି ଶେଷ ହେବା ଯୋଗୁ ଏବେ ବିସିସିଆଇ ନୂଆ ସ୍ପନଶର ଖୋଜୁଥିବା କୁହାଯାଉଛି ।
