ବାଙ୍ଗିରିପୋଷି,୫/୧: ମୟୁରଭଞ୍ଜ ଜିଲ୍ଲା ବାଙ୍ଗିରିପୋଷି ଦେଇ ଯାଇଥିବା ୪୯ ନମ୍ୱର ଜାତୀୟ ରାଜପଥର ଦ୍ୱାରଶୁଣି ଘାଟି ରାସ୍ତାରେ ପୁଣି ଘଟିଛି ଦୁର୍ଘଟଣା । ଏକ ଟ୍ରକ ବାଇକକୁ ଧକ୍କା ଦେବା ପରେ ସାମ୍ନାପଟୁ ଆସୁଥିବା ଅନ୍ୟ ଏକ ଟ୍ରକ ସହ ମୁହାଁମୁହିଁ ଧକ୍କା ହୋଇଛି। ଏଥିରେ ଜଣେ ଟ୍ରକ ଚାଳକ ଗୁରୁତର ଆହତ ହୋଇଥିବା ବେଳେ ବାଇକ ଚାଳକ ଅଳ୍ପକେ ବର୍ତ୍ତି ଯାଇଛନ୍ତି।
ସୂଚନା ମୁତାବକ, ଏକ ଆଇରନ ବୋଝେଇ ଟ୍ରକ ଦ୍ରୁତ ବେଗରେ ଘାଟି ତଳକୁ ଓହ୍ଲାଉ ଥିବା ବେଳେ ଭାରସାମ୍ୟ ହରାଇ ପ୍ରଥମେ ଜଣେ ବାଇକ ଚାଳକକୁ ଧକ୍କା ଦେଇଥିଲା। ତେବେ ବାଇକରେ ଥିବା ଶିକ୍ଷକ ଲକ୍ଷ୍ମଣ ବିସାନ ମୁର୍ମୁ ଡିଆଁ ମାରିଦେବାରୁ ଅଳ୍ପକେ ବର୍ତ୍ତୀ ଯାଇଥିବା ବେଳେ ଟ୍ରକଟି ବିପରୀତ ପାର୍ଶ୍ଵରୁ ଆସୁଥିବା ଅନ୍ୟ ଏକ ଟ୍ରକ ସହ ମୁହାଁମୁହିଁ ଧକ୍କା ହୋଇ ରାସ୍ତା ଉପରେ ରହି ଯାଇଥିଲା। ତେବେ ଆଇରନ ବୋଝେଇ ଟ୍ରକର ଚାଳକ ଗାଡ଼ି ମଧ୍ୟରେ ଚାପି ହୋଇ ରହିଯାଇଥିଲେ। ଖବର ପାଇ ବାଙ୍ଗିରିପୋଷି ଅଗ୍ନିଶମ କର୍ମଚାରୀ ଓ ପୁଲିସ ପହଞ୍ଚି ଡ୍ରାଇଭର କୁ ଗୁରୁତର ଅବସ୍ଥାରେ ଉଦ୍ଧାର କରି ଜାତୀୟ ରାଜପଥ ବିଭାଗ ଆମ୍ବୁଲାନ୍ସ ସାହାଯ୍ୟରେ ବାଙ୍ଗିରିପୋଷି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ଘଟଣା ସ୍ଥଳରେ ପୋଲିସ ପହଞ୍ଚି ୨ ଟ୍ରକକୁ ରାସ୍ତା ଉପରୁ ହଟାଇ ଯାତାୟତକୁ ପୁଣି ସ୍ୱାଭାବିକ କରିଛି।