ପୁରୀ,୧୪/୧୧: ତୁମକୁ କିଏ କହିଲା ମୋତେ ଏଠାକୁ ଆଣିବାକୁ... । ମୋର୍ କିଛି ହୋଇନି... । ମୋତେ ତୁରନ୍ତ ଛାଡ଼... । ଏମିତି ଚିତ୍କାର କରି କହୁଥିଲେ ଜଣେ ଯୁବତୀ । କୁମ୍ଭାରପଡ଼ା ଥାନା ଦୂଆରେ ଯୁବତୀ ଏଭଳି କହି ଉତ୍ପାତ ହେଉଥିବା ବେଳେ ବନ୍ଦ ଥିବା ଗେଟ୍ର ଅପରପାଶ୍ୱର୍ରେ ରହି ଧୀର ମନ୍ଥର ସ୍ୱରରେ ମା’ ବୋଲି ସମ୍ବୋଧନ କରି ବୁଝାଉଥିଲେ ଆଇଆଇସି । ଏମିତି ପ୍ରାୟ ୧୦ ମିନିଟ୍ ପରେ ଶେଷରେ ଯୁବତୀଙ୍କୁ ଡାକ୍ତରଖାନା ନେଇ ଚିକିତ୍ସା କରାଇବା ପରେ ଆଶ୍ରୟ ସ୍ଥଳୀରେ ଛାଡ଼ିଲା ପୁଲିସ । ମଙ୍ଗଳବାର ରାତିରେ ଏଭଳି ଏକ ଘଟଣା ଷ୍ଟେସନ୍ ରୋଡ୍ରୁ ଥାନା ଓ ଡାକ୍ତରଖାନାରୁ ସର୍ବୋଦୟ ନଗର ଅଞ୍ଚଳ ଯାଏ ଚର୍ଚ୍ଚାର ବିଷୟ ପାଲଟିଛି ।
ଖବର ଅନୁସାରେ କେନ୍ଦ୍ରାପଡ଼ାର ଜଣେ ଯୁବତୀ ତାଙ୍କ ବନ୍ଧୁଙ୍କ ସହ ପୁରୀ ଆସିଥିଲେ । ବନ୍ଧୁ ଜଣକ କେଉଁଆଡ଼େ ଚାଲି ଯାଇଥିବା ବେଳେ ଏକାକୀ ନିଶାସକ୍ତ ଅବସ୍ଥାରେ ଜିଲ୍ଲା ସ୍କୁଲ୍ ସମ୍ମୁଖ ଷ୍ଟେସନ୍ ରୋଡ୍ରେ ପଡ଼ିଥିଲେ ଯୁବତୀ । ରାତିରେ ପିସିଆର୍ ତାଙ୍କୁ ଉଦ୍ଧାର କରି ସିଧା ଥାନାକୁ ନେଇଆସିଥିଲା । ସେହି ସମୟରେ କିଛି ଅଭିଯୁକ୍ତଙ୍କୁ ଥାନା ଭିତରେ ଯାଞ୍ଚ୍ କରାଯାଉଥିବା ବେଳେ ଗେଟ୍ ବନ୍ଦ ଥିଲା । ଠିକି ଏତିକିବେଳେ ପହଞ୍ଚିଗଲେ ଯୁବତୀ । ଭ୍ୟାନ୍ରୁ କୁଦା ମାରି ଓହ୍ଲାଇବା ପରେ ଥାନା ଭିତରକୁ ଦୌଡ଼ି ଆସିଥିଲେ । ଗେଟ୍ର ଗୋଟିଏ ପାଶ୍ୱର୍ରେ ଯୁବତୀ ଓ ଅନ୍ୟ ପାଶ୍ୱର୍ରେ ଆଇଆଇସି ଜୟଦୀପ ମହାନ୍ତି । କାନ୍ଧରେ ତିନିଟି ତାରା ଦେଖି ବାବୁଙ୍କୁ ତେଢ଼ା ଚାହାଣୀ ମାରି ଯୁବତୀ ଆରମ୍ଭ କରିଥିଲେ ଚିତ୍କାର । ମୋର କିଛି ହୋଇନି ମୋତେ ଛାଡ଼ିଦିଅ କହି ଗୋଟିଏ ଜିଦ୍ରେ ଅଟଳ ଥିଲେ ଯୁବତୀ । ହେଲେ ଏଭଳି ଅସହାୟ ଅବସ୍ଥାରେ ତାଙ୍କୁ ଛାଡ଼ିବା ଅନୁଚିତ୍ ବୋଲି କହି ବୁଝାଇଥିଲେ ଆଇଆଇସି ଶ୍ରୀ ମହାନ୍ତି । କିନ୍ତୁ ଯୁବତୀ ନଛୋଡ଼ ବନ୍ଧା ।
ନିକଟ ଅତୀତରେ ଭରତପୁର ଥାନାର ଏଭଳି ଏକ ଘଟଣାକୁ ନେଇ ଥାନା ପୁଲିସ ଅଧିକାରୀ ଓ ମହିଳା କର୍ମଚାରୀ ଅତ୍ୟନ୍ତ ସନ୍ତର୍ପଣରେ ଯୁବତୀଙ୍କୁ ଘେରି ରହି ବୁଝାଶୁଝା କରିଥିଲେ ।ତାଙ୍କୁ ଛାଡ଼ିଲେ ସମସ୍ୟା ଓ ଥାନା ଭିତରେ ବସାଇଲେ ବି ଉନ୍ମତ୍ତ କାଣ୍ଡ ପାଇଁ କିଛି ବି ଅଘଟଣା ଘଟିବାର ଆଶଙ୍କାରେ ପଡ଼ି ବିଚରା ପୁଲିସ ହଟହଟା ହେଇଥିଲା । ଶେଷରେ ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟ ନେଇ ଚିକିତ୍ସା କରାଇଥିଲା ପୁଲିସ । ଡାକ୍ତରଖାନାରେ ବି ଯୁବତୀଙ୍କ ଉନ୍ମତ୍ତକାଣ୍ଡ ସୀମା ଟପିଥିଲା । ପୁଲିସର ଚଉଦ ପୁରୁଷ ଉଝାଳିବା ବେଳେ ଡାକ୍ତର ଓ କର୍ମଚାରୀମାନେ ମଧ୍ୟ ନାକେଦମ୍ ହୋଇଥିଲେ । ଚିକିତ୍ସା ପରେ ତାଙ୍କୁ ସ୍ୱେଚ୍ଛାସେବୀଙ୍କ ସହାୟତାରେ ସର୍ବୋଦୟ ନଗରସ୍ଥିତ ଆଶ୍ରୟ କେନ୍ଦ୍ରକୁ ନିଆଯାଇଥିଲା ।
