ଭୁବନେଶ୍ୱର,୦୯/୧୦: ମା’ ଆସୁଛନ୍ତି । ସେଥିପାଇଁ ସମସ୍ତେ ଚଳଚଞ୍ଚଳ । ଏହାରି ଭିତରେ ପୂଜାକୁ ନେଇ ଆରମ୍ଭ ହୋଇଯାଇଛି ନୂଆ ଟ୍ରେଣ୍ଡ୍ । ଜଗଜ୍ଜନନୀଙ୍କ ଆସିବାର ବାର୍ତ୍ତା ଦେବା ପାଇଁ ମହିଳାଙ୍କ ଭିତରେ ଦେଖାଯାଉଛି ଉତ୍ସାହ ।
ମହିଳାମାନେ ମା’ଙ୍କର ବିଭିନ୍ନ ବେଶରେ ସଜେଇ ହୋଇ କରୁଛନ୍ତି ଫଟୋସୁଟ୍ । କିଏ ମା’ଙ୍କର ଶାନ୍ତ ରୂପକୁ ଧାରଣ କରୁଛନ୍ତି ତ ଆଉ କିଏ ଉଗ୍ର । ବିଶେଷକରି ପଶ୍ଚିମବଙ୍ଗରେ ମା’ ଦୁର୍ଗାଙ୍କୁ ଯେଉଁଭାବେ ପୂଜା କରାଯାଏ ତଥା ସେଠାରେ ଯେଭଳି ସାଜସଜ୍ଜା କରାଯାଇଥାଏ ସେହିଭଳି ଢଙ୍ଗରେ ମହିଳାମାନେ ସଜେଇ ହେଉଛନ୍ତି । ମୁଖ୍ୟତଃ ସେମାନେ ଧଳା-ନାଲି ମିଶ୍ରିତ ଶାଢ଼ି ପିନ୍ଧିବାକୁ ପସନ୍ଦ କରୁଛନ୍ତି । ଏଥିସହିତ ହାତରେ ପଦ୍ମଫୁଲ, ଝୁଣା ଦାନୀ, ପାନ ପତ୍ର, ଆଖିରେ କଜ୍ଜ୍ୱଳ, ସିନ୍ଥିରେ ଭରି ରହିଛି ସିନ୍ଦୂର, ଆଉ କପାଳରେ ମା’ ଦୁର୍ଗାଙ୍କ ଭଳି ରହୁଛି ତୃତୀୟ ନୟନ । ସେଥିପାଇଁ ବଜାରରେ ଓ ଅନ୍ଲାଇନରେ ବିଭିନ୍ନ ପ୍ରକାର ସାମଗ୍ରୀ ମିଳୁଛି । ଅଧିକାଂଶ ମହିଳା ଧଳା-ନାଲି ଶାଢ଼ି କିଣିବା ପାଇଁ ବଜାରରେ ଭିଡ଼ ଲଗାଉଥିବା ଦେଖିବାକୁ ମିଳୁଛି ।
ଏହାବାଦ୍ ବିଭନ୍ନ ନଦୀପଠାରେ ଫୁଟିଥିବା କାଶତଣ୍ଡୀ ଫୁଲ ନିକଟରେ ମଧ୍ୟ ମହିଳାମାନେ ଫଟୋସୁଟ୍ କରୁଛନ୍ତି । ବିଶେଷତଃ ଯୁବପିଢ଼ିଙ୍କ ଭିତରେ ଏହି ନୂଆ କ୍ରେଜ୍ ଦେଖାଦେଇଛି । ଏଥିପାଇଁ କେହି କେହି ନିଜ ମୋବାଇଲ କ୍ୟାମେରାର ସାହାଯ୍ୟ ନେଉଥିବା ବେଳେ ଆଉ କେହି ସ୍ୱତନ୍ତ୍ର ଭାବେ ଫଟୋଗ୍ରାଫରଙ୍କ ଦ୍ୱାରା ଫଟୋସୁଟ୍ କରାଉଛନ୍ତି । ବିଭିନ୍ନ ସାମାଜିକ ଗଣମାଧ୍ୟମରେ ଶାରଦୀୟ ପୂଜାର ବାର୍ତ୍ତା ସହିତ ଏହିସବୁ ଫଟୋ ପୋଷ୍ଟ କରାଯାଉଛି ।
