ଭୁବନେଶ୍ୱର,୦୯/୧୦: ନିଦ ଭାଙ୍ଗିବା ଆଗରୁ ବେଲ୍ ମାରି ଉଠାଇଥିଲେ ସଫେଇ କର୍ମଚାରୀ । ଦରଜା ଖୋଲିଲାବେଳକୁ ସାର୍, ପୂଜା ବକ୍ସିସ୍... । କିଛି ମିନିଟ୍ ଯାଇନି ପହଞ୍ଚିଲେ ପେପର ହକର୍ । ସେଇ ସମାନ ଷ୍ଟାଇଲ୍, ସମାନ ଦାବି । ଆଜ୍ଞା, ଦଶରା ଖର୍ଚ୍ଚ । ସକାଳ ଆରମ୍ଭ ହେଉଛି ଦଶରା ବକ୍ସିସରୁ । ଏ ଦଶରା ବକ୍ସିସ୍ ଭାଇରସ୍ ଏବେ ଘରଠାରୁ ଅଫିସ, ସେଲୁନରୁ ହୋଟେଲ, ହାଟ ବଜାର ସବୁଠି ଗୋଡ଼ାଉଛି । ଯେତେ ଚେଷ୍ଟା କଲେ ବି ଏ ଜାଲରୁ ମୁକୁଳିବା କାଠିକର ପାଠ । ଦଶହରା ପାଇଁ ରାଜଧାନୀ ବଜାର ସରଗରମ । ପୂଜା ଖୁସି ପାଇଁ ସମସ୍ତେ ଉତ୍ସବ ମୁଖରିତ ହେଲେଣି । ଏମିତି ଏକ ବାତାବରଣ ଭିତରେ ସବୁବର୍ଷ ଭଳି ଏ ବର୍ଷ ବି ଦଶରା ବକ୍ସିସ୍ ପର୍ବ ଆରମ୍ଭ ହୋଇଯାଇଛି । ଯୁଆଡ଼େ ଯିବ, ଦଶରା ଖର୍ଚ୍ଚ କିମ୍ବା ବକ୍ସିସ୍ ଦାବି । ରାସ୍ତାରେ ଅଳିଆ ଗାଡ଼ି ରଖି ସଫେଇ କର୍ମଚାରୀ ବି ପହଞ୍ଚିଯାଉଛନ୍ତି ଘର ଘର ବକ୍ସିସ୍ ସଂଗ୍ରହରେ । ନିଦ ଭାଙ୍ଗୁ କି ନ ଭାଙ୍ଗୁ ବକ୍ସିସ୍ ନ ମିଳିବା ପର୍ଯ୍ୟନ୍ତ ନିୟମିତ ଅନ୍ତତଃ ଥରେ ଦୁଇଥର କଲିଂ ବେଲ୍ ବଜାଇବା ଥୟ । ନଚେତ ଗେଟ୍ ବାଡ଼େଇ ମଗାଯାଉଛି । ଘରେ ଖବରକାଗଜ ଦେଉଥିବା ବ୍ୟକ୍ତି ହୁଅନ୍ତୁ କି କ୍ଷୀର ଯୋଗାଉଥିବା ବ୍ୟକ୍ତି, ସମସ୍ତଙ୍କ ଦାବି ବର୍ଷରେ ଥରୁଟିଏ ସାର୍ ଦିଅନ୍ତୁ ।
ସ୍ଥିତି ଏମିତି ହେଲାଣି ପାନ ଦୋକାନ, ସେଲୁନକୁ ଯିବାକୁ ଡର ଲାଗିଲାଣି । ଦୋକାନକୁ ପଶୁ ପଶୁ କ୍ୟାସ୍ ବାକ୍ସ ଆଗରେ ଥୁଆ ହେଉଛି ଡବା । ସେଥିରେ ଲେଖା ଅଛି ଦଶରା ଖର୍ଚ୍ଚ । ସେଲୁନରେ ଚୁଟି କାଟୁଥିବା କର୍ମଚାରୀ ହୁଅନ୍ତୁ କି ହୋଟେଲରେ ଖାଦ୍ୟ ପରଷୁଥିବା କର୍ମଚାରୀ, ସମସ୍ତେ ଏମିତି ମାଗୁଛନ୍ତି । ପ୍ରତିଦିନ ଦେଖିଲେ ସାର୍ ଦେଲେନି କହି ମନେ ପକାଇ ଦେଉଛନ୍ତି । ୫୦/୧୦୦ରେ ବି ଅନେକ ମଙ୍ଗୁନାହାନ୍ତି । ଦାବି କରୁଛନ୍ତି- ଟିକିଏ ଅଧିକ ଦିଅନ୍ତୁ । ବର୍ଷରେ ଥରୁଟିଏ... ଆମେ ୪/୫ ଜଣ ଅଛୁ, ବାଣ୍ଟିଲେ କେତେ ପଡ଼ିବ । ଚେଞ୍ଜ୍ ନ ଥିଲେ କହିଲେ କିଏ କହୁଛନ୍ତି ଫୋନ୍ ପେ... କରିଦିଅନ୍ତୁ । ଦଶହରା ଖର୍ଚ୍ଚରେ ନୟାନ୍ତ ମଧ୍ୟବିତ୍ତ ଏବେ ଏହି ବକ୍ସିସ୍ ଭୟରେ ସେଲୁନ, ହୋଟେଲ ଯିବାକୁ ଡରିଲେଣି । ଅଫିସରେ ପାଣି, ଚା’ ଦେଉଥିବା କର୍ମଚାରୀ ବି ମନେପକାଇ ଦେଉଛନ୍ତି, ଛୁଟି ହୋଇଯିବ, ଶୀଘ୍ର ଦେଇ ଦିଅନ୍ତୁ... ।
