କଟକ, ୨୯/୦୯: ଦଶହରା ଭିଡ଼ରେ ପରିବାରକୁ ସାଙ୍ଗରେ ଧରି ଅଟୋରେ ବୁଲିବାର ମଜା ହିଁ କିଛି ଅଲଗା । କଟକ ଲୋକ ହୁଅନ୍ତୁ କି ବାହାର ଲୋକ ସଂଧ୍ୟା ହେବା ମାତ୍ରେ ଅଟୋରେ ବୁଲି ସହରର ସାଜସଜ୍ଜା ଓ ମଣ୍ଡପରେ ଦର୍ଶନ କରୁଛନ୍ତି । ପ୍ରତିବର୍ଷ ଭଳି ଏଥର ମଧ୍ୟ ପାର୍ବଣକୁ ଦୃଷ୍ଟିରେ ରଖି ଅଟୋ ଡ୍ରାଇଭର୍ଙ୍କ ଦ୍ୱାରା ଭଡା ବାବଦକୁ ସ୍ୱତନ୍ତ୍ର ପ୍ୟାକେଜ୍ କରାଯାଇଛି । ଏହା ସର୍ବନିମ୍ନ ୧୫ଶହ ଟଙ୍କାରୁ ଆରମ୍ଭ କରି ଦୁଇ ହଜାର ପର୍ଯ୍ୟନ୍ତ ରହିଛି । ତେବେ ଭିଡକୁ ଦୃଷ୍ଟିରେ ରଖି ଦିନକ ପୂର୍ବରୁ ଅଟୋ ବୁକିଂ କରିବାକୁ ପଡୁଛି ।
ଦଶହରାରେ କଟକ ସହରର ସାଜସଜ୍ଜା ସହ ମଣ୍ଡପରେ ମା’ଙ୍କ ଦର୍ଶନ, ଚାନ୍ଦିମେଢ଼ ଦେଖିବା ପାଇଁ ଲକ୍ଷାଧିକ ଲୋକଙ୍କ ସମାଗମ ହୋଇଥାଏ । ଭିଡକୁ ଦୃଷ୍ଟିରେ ରଖି ଅଧିକାଂଶ ଲୋକ ପରିବାର ସହିତ ଅଟୋରେ ବୁଲିବାକୁ ପସନ୍ଦ କରିଥାନ୍ତି । ପ୍ରତିଥର ଭଳି ଏଥର ମଧ୍ୟ ସପ୍ତମୀରୁ ଅଟୋ ଭଡା ଆଗୁଆ ବୁକିଂ କରାଯାଉଛି । ଦଶହରା ବୁଲା ପାଇଁ ଅଟୋ ଡ୍ରାଇଭରଙ୍କ ପକ୍ଷରୁ ପ୍ୟାକେଜ୍ କରାଯାଇଛି । ୧୫ଶହ ଟଙ୍କାରେ ପରିବାରଙ୍କୁ ମାଲଗୋଦାମ, ରାଣୀହାଟ, ମଙ୍ଗଳାବାଗ, ଚୌଧୁରୀ ବଜାର, ଚାନ୍ଦିନୀଚୌକ, ଶେଖ୍ ବଜାର ଆଦି ମଣ୍ଡପ ବୁଲାଯିବ । ତାପରେ ଲୋକଙ୍କ ଡିମାଣ୍ଡ୍ ଅନୁସାରେ ଖାନନଗର ସମେତ ପୂର୍ବାଞ୍ଚଳ ଆଦି ବୁଲାଇବେ ଅଟୋ ଚାଳକ । ଦଶହରା ସମୟରେ ହିଁ ଦୁଇ ପଇସା ଭଲ ରୋଜଗାର ଆଶାରେ ରହିଥାନ୍ତି ଅଟୋ ଚାଳକ । ରାତି ସାଢେ ୧୦ଟା ପର୍ଯ୍ୟନ୍ତ ବୁଲାଯିବ । ଟ୍ରାଫିକ୍ କଟକଣା ସାଙ୍ଗକୁ ଭିଡ ହେତୁ ଦର ବୃଦ୍ଧି ହୋଇଥିବା ଅଟୋ ଡ୍ରାଇଭର୍ ମହେନ୍ଦ୍ର ସାହୁ କହିଛନ୍ତି ।
