ଇସଲାମାବାଦ: ଗୋଟିଏ ମାସରେ ଦୁଇଥର ଭୁ-କମ୍ପରେ ଥରିଲାଣି ପାକିସ୍ତାନ। ଶନିବାର ପାକିସ୍ତାନରେ ରାତି ପ୍ରାୟ ୧ଟା ୪୪ ମିନିଟ୍ (IST) ସମୟରେ ରିକ୍ଟର ସ୍କେଲରେ ୪.୦ ତୀବ୍ରତାର ଏକ ମୃଦୁ ଭୂକମ୍ପ ଅନୁଭୁତ ହୋଇଛି। ଭାରତର ଜାତୀୟ ଭୂକମ୍ପ ବିଜ୍ଞାନ କେନ୍ଦ୍ର (NCS) ଅନୁସାରେ, ଏହି ଭୂକମ୍ପର କେନ୍ଦ୍ରସ୍ଥଳ ପାକିସ୍ତାନର କ୍ୱେତାଠୁ ମାତ୍ର କିଛି ଦୁରରେ ଥିବା ରେକର୍ଡ ହୋଇଛି।

ଏହି ଭୂକମ୍ପର ଝଟକା ଇସଲାମାବାଦ, ଲାହୋର, ରାୱଲପିଣ୍ଡି ଏବଂ ଅନ୍ୟାନ୍ୟ ନିକଟବର୍ତ୍ତୀ ଅଞ୍ଚଳରେ ଅନୁଭୂତ ହୋଇଥିଲା। ତେବେ, ପ୍ରାରମ୍ଭିକ ରିପୋର୍ଟ ଅନୁଯାୟୀ, ଏହି ଭୂକମ୍ପ ଯୋଗୁଁ କୌଣସି ଧନଜୀବନ କ୍ଷୟକ୍ଷତି କିମ୍ବା ଉଲ୍ଲେଖନୀୟ କ୍ଷତି ହୋଇନଥିବା ଜଣାପଡିଛି।

ଭୂତାତ୍ତ୍ୱିକ ଦୃଷ୍ଟିରୁ ପାକିସ୍ତାନ ଏକ ସକ୍ରିୟ ଭୂକମ୍ପପ୍ରବଣ ଅଞ୍ଚଳରେ ଅବସ୍ଥିତ। ଯେଉଁଥିରେ ହିନ୍ଦୁକୁଶ ଏବଂ ଅନ୍ୟାନ୍ୟ ପ୍ରମୁଖ ଫଲ୍ଟ ଲାଇନ୍ ରହିଛି। ଏହା ପୂର୍ବରୁ ମଧ୍ୟ ଚଳିତ ବର୍ଷ ଏପ୍ରିଲ ୩୦ ତାରିଖରେ ୪.୪ ତୀବ୍ରତାର ଏକ ଭୂକମ୍ପ ଏବଂ ଏପ୍ରିଲ ୧୨ ତାରିଖରେ ୫.୮ ତୀବ୍ରତାର ଏକ ଭୂକମ୍ପ ପାକିସ୍ତାନରେ ଅନୁଭୁତ ହୋଇଥିଲା।

ସ୍ଥାନୀୟ ପ୍ରଶାସନ ଏବଂ ପାକିସ୍ତାନ ବିପର୍ଯ୍ୟୟ ବିଭାଗ ପରିସ୍ଥିତି ଉପରେ ନଜର ରଖିଛନ୍ତି। ଏବଂ ଲୋକମାନଙ୍କୁ ସତର୍କ ରହିବାକୁ ପରାମର୍ଶ ଦେଇଛନ୍ତି। ଏହି ଭୂକମ୍ପ ସମ୍ପର୍କରେ ସାମାଜିକ ଗଣମାଧ୍ୟମରେ ମଧ୍ୟ ଅନେକ ପୋଷ୍ଟ ଭାଇରାଲ ହେବାରେ ଲାଗିଛି। ଯେଉଁଥିରେ ଲୋକମାନେ ନିଜର ଅନୁଭୂତି ବର୍ଣ୍ଣନା କରିଛନ୍ତି।

ଏହା ପାକିସ୍ତାନରେ ଏକ ମାସ ମଧ୍ୟରେ ଦ୍ୱିତୀୟ ଭୂକମ୍ପ ଘଟଣା। ଯାହା ଦେଶର ଭୂତାତ୍ତ୍ୱିକ ସକ୍ରିୟତାକୁ ପୁନର୍ବାର ସୂଚାଇଛି।