ନୂଆଦିଲ୍ଲୀ, ୨୫/୦୭ : ଉପରାଷ୍ଟ୍ରପତି ପଦରୁ ଜଗଦୀପ ଧନଖଡ଼ଙ୍କ ଇସ୍ତଫା ପରେ ନିର୍ବାଚନ କମିଶନ(ଇସି) ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିଦେଇଛନ୍ତି। ନିର୍ବାଚକ ମଣ୍ଡଳୀ, ରିଟର୍ଣ୍ଣିଂ ଅଫିସର ଏବଂ ଆସିଷ୍ଟାଣ୍ଟ ରିଟର୍ଣ୍ଣିଂ ଅଫିସରଙ୍କୁ ନିଯୁକ୍ତ କରିଛନ୍ତି। ଏହା ସହ ଅନ୍ୟ ଜରୁରି ପ୍ରକ୍ରିୟାକୁ ଚୂଡ଼ାନ୍ତ ରୂପ ଦେବା ପାଇଁ ଇସି କାର୍ଯ୍ୟରେ ଲାଗିଛନ୍ତି। ଖୁବ୍ଶୀଘ୍ର ନିର୍ବାଚନ ତାରିଖ ଘୋଷଣା କରାଯିବ ବୋଲି ଜଣାପଡ଼ିଛି।
ନିୟମ ଅନୁଯାୟୀ, ଲୋକସଭାର ମହାସଚିବ କିମ୍ବା ରାଜ୍ୟସଭାର ମହାସଚିବଙ୍କୁ ପର୍ଯ୍ୟାୟକ୍ରମେ ରିଟର୍ଣ୍ଣିଂ ଅଧିକାରୀ ଭାବରେ ନିଯୁକ୍ତ କରାଯାଏ। ଗତ ଉପରାଷ୍ଟ୍ରପତି ନିର୍ବାଚନ ସମୟରେ, ଲୋକସଭାର ମହାସଚିବଙ୍କୁ ରିଟର୍ଣ୍ଣିଂ ଅଧିକାରୀ ଭାବରେ ନିଯୁକ୍ତ କରାଯାଇଥିଲା। ତେଣୁ, ନିର୍ବାଚନ କମିଶନ, ଆଇନ ଏବଂ ନ୍ୟାୟ ମନ୍ତ୍ରଣାଳୟ ସହିତ ପରାମର୍ଶ କରି ଏବଂ ରାଜ୍ୟସଭାର ଉପାଧ୍ୟକ୍ଷଙ୍କ ସମ୍ମତିରେ, ଆଗାମୀ ଉପରାଷ୍ଟ୍ରପତି ନିର୍ବାଚନ ପାଇଁ ରାଜ୍ୟସଭାର ମହାସଚିବଙ୍କୁ ରିଟର୍ଣ୍ଣିଂ ଅଧିକାରୀ ଭାବରେ ନିଯୁକ୍ତ କରିଛନ୍ତି। ଏହା ସହିତ, ରାଜ୍ୟସଭା ସଚିବାଳୟର ଯୁଗ୍ମ ସଚିବ ଗାରିମା ଜୈନ ଏବଂ ରାଜ୍ୟସଭା ସଚିବାଳୟର ନିର୍ଦ୍ଦେଶକ ବିଜୟ କୁମାରଙ୍କୁ ଉପରାଷ୍ଟ୍ରପତି ନିର୍ବାଚନରେ ସହାୟକ ରିଟର୍ଣ୍ଣିଂ ଅଧିକାରୀ ଭାବରେ ନିଯୁକ୍ତ କରାଯାଇଛି।
ପ୍ରକାଶ ଥାଉକି, ସୋମବାର ସ୍ଵାସ୍ଥ୍ୟଗତ କାରଣ ଦର୍ଶାଇ ଜଗଦୀପ ଧନଖଡ଼ ଉପରାଷ୍ଟ୍ରପତି ପଦରୁ ଇସ୍ତଫା ଦେଇଥିଲେ। ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ତାଙ୍କର ଇସ୍ତଫା ପତ୍ର ପଠାଇଥିଲେ। ଏହାକୁ ପ୍ରଥମିକତା ଦେଇ ରାଷ୍ଟ୍ରପତି ମଙ୍ଗଳବାର ଧନଖଡ଼ଙ୍କ ଇସ୍ତଫା ପତ୍ରକୁ ସ୍ଵୀକାର କରିଥିଲେ। ଏବେ ଏହି ପଦ ଲାଗି ଅନେକ ଦାବିଦାରଙ୍କ ନାଁ ଚର୍ଚ୍ଚାକୁ ଆସିଛି। ବିଜେପି ଏହି ପଦରେ ନିଜ ବିଚାରଧାରାର ଜଣେ କାର୍ଯ୍ୟକର୍ତ୍ତାଙ୍କୁ ପ୍ରାର୍ଥୀ କରିପାରେ ବୋଲି କୁହାଯାଉଛି । ଚର୍ଚ୍ଚାରେ ଥିବା ନାଁ ଭିତରେ ଏବେ କର୍ଣ୍ଣାଟକ ରାଜ୍ୟପାଳ ଥାୱରଚାନ୍ଦ ଗେହଲଟ୍ଙ୍କୁ ଦୃଢ଼ ଦାବିଦାର ବିବେଚନା କରାଯାଉଛି । ତାଙ୍କ ସହ ସିକ୍କିମ ରାଜ୍ୟପାଳ ଓମ୍ ପ୍ରକାଶ ମାଥୁର ମଧ୍ୟ ଏହି ଦୌଡ଼ରେ ସାମିଲ ଅଛନ୍ତି । ବିଜେପି ଏହାର ସହଯୋଗୀ ଦଳର ନେତାଙ୍କୁ ଉପରାଷ୍ଟ୍ରପତି କରାଇବା ବଦଳରେ ନିଜ ନେତାଙ୍କୁ ବାଛି ସହଯୋଗୀଙ୍କ ସମର୍ଥନ ହାସଲ ଲାଗି ଉଦ୍ୟମ କରୁଥିବା କୁହାଯାଉଛି । ୭୭ ବର୍ଷୀୟ ଗେହଲଟ୍ ରାଜ୍ୟସଭା ସଦସ୍ୟ ରହିବା ସହ କେନ୍ଦ୍ରମନ୍ତ୍ରୀ ପଦ ମଧ୍ୟ ସମ୍ଭାଳିଛନ୍ତି । ବିଜେପିରେ ସେ ସର୍ବୋଚ୍ଚ ନୀତି ନିର୍ଦ୍ଧାରକ ସଂସ୍ଥା ସଂସଦୀୟ ବୋର୍ଡର ସଦସ୍ୟ ଭାବେ କାର୍ଯ୍ୟ କରିଛନ୍ତି । ଦଳିତ ହେବା ଯୋଗୁ ଜାତୀୟ ସମୀକରଣରେ ସେ ଫିଟ୍ ହେଉଛନ୍ତି । ତାଙ୍କ ପାଖରେ ପ୍ରଶାସନିକ ଅଭିଜ୍ଞତା ମଧ୍ୟ ରହିଛି । ସେହିପରି ୭୩ ବର୍ଷୀୟ ଓମ୍ ମାଥୁର ଦଳର ଜଣେ ଦକ୍ଷ ନେତା । ନରେନ୍ଦ୍ର ମୋଦି ଗୁଜରାଟର ମୁଖ୍ୟମନ୍ତ୍ରୀ ଥିବାବେଳେ ଏହି ରାଜ୍ୟରେ ନିର୍ବାଚନ ପ୍ରଭାରୀ ଭାବେ ନିଯୁକ୍ତ ହୋଇଥିଲେ ମାଥୁର । ସେ ଆର୍ଏସ୍ଏସ୍ରେ ପ୍ରଚାରକ ମଧ୍ୟ ରହିଥିଲେ । ଏଥିସହ ଉପରାଷ୍ଟ୍ରପତି ପଦ ପାଇଁ ରାଜ୍ୟସଭା ଉପାଧ୍ୟକ୍ଷ ହରିବଂଶ ନାରାୟଣ ସିଂ, ବିହାର ମୁଖ୍ୟମନ୍ତ୍ରୀ ନୀତୀଶ କୁମାର, କଂଗ୍ରେସ ନେତା ଶଶି ଥରୁର ପ୍ରମୁଖଙ୍କ ସମେତ ବହୁ ନେତାଙ୍କ ନାଁ ଚର୍ଚ୍ଚାରେ ରହିଛି।
