ନୂଆଦିଲ୍ଲୀ,୨୦।୧୧: ଉତ୍ତର ପ୍ରଦେଶ, ପଞ୍ଜାବ, କେରଳ, ମହାରାଷ୍ଟ୍ର ଓ ଉତ୍ତରାଖଣ୍ଡର ୧୫ଟି ବିଧାନସଭା ଆସନରେ ଉପନିର୍ବାଚନ ପାଇଁ ମତଦାନ ଚାଲିଛି। ୫ ରାଜ୍ୟର ଏହି ୧୫ଟି ଆସନରୁ ୯ଟି ଉତ୍ତର ପ୍ରଦେଶର ରହିଛି, ସେଠାରେ ନିର୍ବାଚନ ୨୦୨୭ର ସେମିଫାଇନାଲ ବୋଲି କୁହାଯାଉଛି। ୟୁପିର ୯ଟି ଆସନରେ ହେଉଥିବା ନିର୍ବାଚନ ସମୟରେ ଦେଖିବାକୁ ମିଳିଛି ଉତ୍ତେଜନା। କିଛି ଅଭିଯୋଗ ନେଇ ବିଜେପି ନିର୍ବାଚନ କମିଶନଙ୍କ ପାଖରେ ପହଁଞ୍ଚିଛି। ସେଭଳି ସମାଜବାଦୀ ପାର୍ଟି ସୋସିଆଲ ମିଡିଆ ମାଧ୍ୟମରେ ନିର୍ବାଚନ କମିଶନଙ୍କ ନିକଟରେ ୪୦ ରୁ ଅଧିକ ଅଭିଯୋଗ କରିଛି।
ବୁର୍କା ପିନ୍ଧିଥିବା ମହିଳା ଭୋଟରଙ୍କ ଚିହ୍ନଟ କରାଯିବା ନେଇ ବିଜେପି ନିର୍ବାଚନ କମିଶନଙ୍କୁ ଚିଠି ଲେଖିଛି। ସୀସାମଉରେ ବିଜେପି ପ୍ରାର୍ଥୀ ସୁରେଶ ଅବସ୍ଥୀଙ୍କ ଗାଡି ଉପରକୁ ପଥର ମାଡ ହୋଇଛି। ସୁରେଶ କହିଛନ୍ତି, ସେ ଏକ ଛକରେ ଯାଉଥିବା ସମୟରେ ତାଙ୍କ ଗାଡ଼ି ଉପରେ ପଥର ମାଡ ହୋଇଥିଲା। ଏହି ସମୟରେ ମୀରାପୁର ଆସନରେ ଭୋଟରମାନେ ପୋଲିସ ଉପରକୁ ଟେକାପଥର ମାଡ଼ କରିଥିଲେ। ସିସାମଉ, କୁଦରକି ଭଳି ଆସନରେ ବିବାଦ ଖବର ସାମନାକୁ ଆସିଛି। ସମାଜବାଦୀ ପାର୍ଟିର ଅଭିଯୋଗ ପରେ ନିର୍ବାଚନ କମିଶନ୍ ୭ ପୋଲିସ ଅଧିକାରୀଙ୍କୁ ସସପେଣ୍ଡ କରିଛି।
