ପାଇକମାଳ, ୨୬/୦୮ : ଫସଲ ଜଗିବା ହେଲା କାଳ। ଦମ୍ପତିଙ୍କୁ ଦଳିଦେଲା ଦନ୍ତା। ବରଗଡ଼ ଜିଲ୍ଲା ପଦ୍ମପୁର ଉପଖଣ୍ଡ ପାଇକମାଳ ଥାନା ଧାନ୍ଦୁପାଲି ଗାଁରେ ସୋମବାର ବିଳମ୍ବିତ ରାତିରେ ଏଭଳି ଅଭାବନୀୟ ଘଟଣା ଘଟିଛି। ମୃତକ ଦୁଇ ଜଣ ବଳରାମ ରଣା (୫୮ ବର୍ଷ) ଓ ସ୍ତ୍ରୀ ଶଶୀ ରଣା (୫୨ ବର୍ଷ) ବୋଲି ଜଣାପଡ଼ିଛି।
ସୂଚନାନୁଯାୟୀ, ଧାନ୍ଦୁପାଲି ଗାଁର ବଳରାମ ରଣା ଓ ତାଙ୍କ ସ୍ତ୍ରୀ ଶଶୀ ରଣା ବିଲରେ ପରିବା ଚାଷ କରିଥିଲେ। ସବୁଦିନ ପରି ଗତକାଲି ରାତିରେ ଉଭୟ ସ୍ଵାମୀ ସ୍ତ୍ରୀ ବିଲରେ ଫସଲ ଜଗିଥିଲେ। ବିଳମ୍ଵିତ ରାତିରେ ଏକ ବଣୁଆ ହାତୀ ଆକ୍ରମଣ କରିବାରୁ ସେମାନଙ୍କର ମୃତ୍ୟୁ ହୋଇଥିଲା। ମଙ୍ଗଳବାର ସକାଳୁ ତାଙ୍କ ପରିବାର ଲୋକ ବିଲକୁ ଯିବା ବେଳେ ଉଭୟଙ୍କ ମୃତଦେହ ଦେଖିଥିଲେ। ଫସଲ ନଷ୍ଟ ହୋଇଥିବା ଦେଖି ହାତୀ ଦଳି ଦେଇଥିବା ଜାଣିବାକୁ ପାଇଥିଲେ। ଏହି ଘଟଣା ପରେ ଗାଁରେ ଉତ୍ତେଜନା ପ୍ରକାଶ ପାଇଛି। ସ୍ଥାନୀୟ ଅଞ୍ଚଳରେ ବଣୁଆ ହାତୀ ବୁଲୁଛି ବୋଲି ବନ ବିଭାଗ କାହିଁକି ସତର୍କ କଲାନି ବୋଲି ଗ୍ରାମବାସୀ ପ୍ରଶ୍ନ କରିଛନ୍ତି। ଏହା ସହ ମୃତକଙ୍କ ପରିବାରକୁ ଅନୁକମ୍ପା ରାଶି ଦେବା ସହ ହାତୀକୁ ଘଉଡ଼ାଇବାକୁ ସ୍ଥାନୀୟ ଲୋକେ ଦାବି କରିଛନ୍ତି।
